1 Ne cok goŋ Salomo mo joŋ yeɓ yaŋ Masǝŋ daŋ vǝrri, so woo fan mai daŋ pah ah David mo nǝǝ rǝk ɓo mor Dǝɓlii - vãm solai, vãm kaŋnyeeri tǝkine fan yeɓ manyeeki ah daŋ, ge rǝk ɓǝr yaŋ rǝk fan yaŋ Masǝŋ.
Ɓaŋra sunduku gbanzah ge yaŋ Masǝŋ ne ko
2 So goŋ Salomo tai zaluu ma pel zahban Israel, ne ma pel zahzum ɓǝǝ ra daŋ ka mo taira ge yaŋ Jerusalem mor ka ɓaŋ sunduku gbanzah Dǝɓlii gin Sion yaŋ David ka ga yaŋ Masǝŋ ne ko. 3 Za Israel daŋ taira ge wo goŋ gŋ, ne cok ah ka fĩi jul yo, a joŋra pǝzyil fĩi patǝ rǝŋ ahe. 4 Ne cok zaluu Israel daŋ mo taira ge vǝrri, so Lewitien ɓaŋra sunduku gbanzahe, 5 kalra ge yaŋ Masǝŋ ne ko. Za joŋzahsyiŋ ne Lewitien so ɓaŋra tal mbǝro taini, ne fan ma joŋ yeɓ ɓǝr ah ra daŋ kal ge yaŋ Masǝŋ ne ko. 6 Goŋ Salomo ne za Israel mo taira ɓo pel sunduku gbanzah daŋ, ŋgomra pǝsǝ̃ǝ ne dǝǝ joŋ syiŋ ne ko, pãa ah ka gak kee ya. 7 So za joŋzahsyiŋ ɓaŋra sunduku gbanzah Dǝɓlii kal ge yaŋ Masǝŋ ne ko, ge kanra pǝ cok matǝdaŋdaŋ tǝɗe', kǝsyil yee cerubim mo syel ɓo. 8 Yee ɓǝǝ mo syel ɓo, rii sunduku gbanzah tǝkine kǝndaŋ ma ɓaŋ ah ra daŋ. 9 Dǝɓ gak kwan zah kǝndaŋ ah ra nǝfah kǝpel cok matǝdaŋdaŋ tǝɗe', amma dǝɓ ka gak kwan nǝfah kǝ pǝ cok maki ah ra ya. Kǝndaŋ ah ra a no gŋ ŋhaa tǝ'nahko. 10 Fan ki kǝka ɓǝr sunduku ah ya, sai tǝsal ma'ah matǝ gwa mai Mosus mo rǝk ge ɓǝr ah tǝ waa Sinai, ne cok mai Dǝɓlii mo gbǝ zah ne za Israel fahfal mo pǝ̃ǝra gin sǝr Egiɓ.
Yǝk Dǝɓlii
11-14 Za joŋzahsyiŋ daŋ ara gŋ, dǝɓ ka fii ɓǝ kul ɓǝǝ mo woŋ ɓo camcam ya, zyeɓra suu ɓǝǝ ɓo. Lewitien ma ɗǝǝra lǝŋ daŋ: Asaf, Heman, ne Jedutun ne zahzum ɓǝǝ camcam daŋ ɓaara mbǝro marwãh ahe. Uura kah cok joŋ syiŋ nǝfah kǝmorcomzah'nan ne koŋkeere jol tǝkine tǝnjuŋni. Za joŋzahsyiŋ ma ulra kokõorĩi temere ne jemma gwa ara kah ɓǝǝ ta. A ɗǝǝra lǝŋ yii Dǝɓlii ne ko, ne ul kokõorĩi, woŋ koŋkeere, tǝkine fakyẽm manyeeki ah ra daŋ, kyaŋ ah ra a ga zahki ne fahlii ahe. A ɗǝǝra lǝŋ faa: Na joŋ osoko nyi Dǝɓlii, mor ako ye Dǝɓ sãhe, 'yah ah ga lii ga lii. Ne cok za joŋzahsyiŋ mo pǝ̃ǝra gin yaŋ Masǝŋ, ne pel gwari sǝ, swãh ge baa yaŋ ah kǝrkǝrri, yǝk Dǝɓlii sǝǝ cok gŋ, za joŋzahsyiŋ gak ka piira soo ga joŋ yeɓ ɓǝǝ gŋ yao.
© Bible Moundang © Alliance Biblique du Tchad, 1996.
