Yeɓ Salomo mo joŋni
(1 ZaG 9:10-28)1 Ne cok Salomo mo vuu yaŋ Masǝŋ ne yaŋ goŋ ah daŋ, yeɓ ah joŋ syii jemma gwa. 2 So vuu yaŋ maluu camcam mai goŋ Hiram mo nyi nyi ko, so pea za Israel ka mo ge kaara gŋ. 3 Salomo so re sǝr Hamat ne Zoba, 4 so vuu yaŋ Tadmor mai mo kǝsyicokki, vuu yaŋ maluu camcam mo pǝ sǝr Hamat moo taira farel gŋ. 5 Salomo so vuu yaŋ maluu manyeeki ah faɗa: Bet-Horon ma kǝsǝŋ ne Bet-Horon ma morkǝsǝŋ daŋ. Ara ye yaŋ maswah ah ma ne ɓaale tǝkine fan ma coo zahfah ka mo gak gbǝr ka, 6 so vuu yaŋ Baalat, ne yaŋ maluu mai mo tai farel ɓo gŋ, ne yaŋ maluu mai pǝr ah ra ne muŋta sal ah ra mo gŋ, tǝkine yaŋ mai mo zyeɓ ɓǝ ah ɓo ka vuu yaŋ Jerusalem ne pǝ sǝr Liban ne pǝ sǝr goŋ ah daŋ. 7-8 Salomo woo morsǝ̃ǝ Kanaanien mai daŋ mo coŋ ɓo za Israel mo ik ra pǝ wul a, mo so kaara ɓo pǝ sǝr ah ge tǝ yeɓ ne swahe. Zan ah a naiko: Hetien, Amorien, Perisien, Hevien, ne Jebusien. Morsǝ̃ǝ za mai ciŋra byak ɓo ŋhaa tǝ'nahko. 9 Amma Salomo joŋ dǝɓ Israel ne swah ka ga tǝ yeɓ ah vaŋno ya. Za Israel ara ye sooje ah ra, zaluu pel ahe, zaluu sooje ma lwaa ɓǝ muŋta sal ah ra, ne za pǝr ahe. 10 Goŋ Salomo rǝk zaluu 250 ka mo ẽera za yeɓ tǝ yeɓ yaŋ mai mo tǝ vuuko camcam daŋ.
11 Salomo ɓaŋ mawin ah mǝlaŋ goŋ sǝr Egiɓ gin pǝ yaŋ David mai mo yaŋ Jerusalem kal ge pǝ yaŋ mai mo vuu ɓo nyi ko ne ko. Mor Salomo faa mo kaako pǝ yaŋ goŋ David goŋ Israel ka, mor cok mai sunduku gbanzah Dǝɓlii mo gŋ a daŋdaŋ. 12 Salomo joŋ syiŋ wo Dǝɓlii tǝ cok joŋ syiŋ mai mo vuuko ɓo zah yaŋ Masǝŋ. 13 So a joŋ syiŋ suŋwii ne zah'nan mai mo nǝǝra ɓo mor Dǝɓlii daŋ, tǝgbana ɓǝ lai Mosus mo faa ɓo, ne zah'nan com yakke, fĩi mafuu mo ciŋ ɓe moo joŋra fĩi ahe, tǝkine fĩi mai moo joŋra pǝzyil syii ɓal sai: fĩi farel ma bai fan mbǝ̃ǝre, fĩi tai fagwahlle , ne fĩi julli. 14 So tǝgbana ɓǝ lai mai pah ah David mo zyeɓ kan ɓo, rǝk za joŋzahsyiŋ tǝ yeɓ ɓǝǝ ne kul ɓǝǝ camcam, tǝkine Lewitien mai moo gbahra jol za joŋzahsyiŋ ne ɗǝǝ lǝŋni tǝkine yeɓ ɓǝǝ manyeeki. So Salomo zyeɓ za ma byak zahfah yaŋ Masǝŋ ne kul ɓǝǝ camcam, mor ka zah'nan Masǝŋ daŋ mo byakra zahfah yaŋ Masǝŋ tǝgbana mai David dǝɓ Masǝŋ mo cuu fahlii ah ɓo. 15 Ɓǝ mai David mo cuu nyi za joŋzahsyiŋ ne Lewitien tǝ ɓǝ yaŋ rǝk fan tǝkine ɓǝ yeɓ manyeeki ah daŋ yaŋra ɓǝ ah ya.
16 Ne cok ah ɓǝ yeɓ mai Salomo mo foo ka joŋ daŋ, joŋ vǝr tǝɗe' tǝŋ daga kpii mor yaŋ Masǝŋ mo kpii, ŋhaa vǝr ahe. Yeɓ ah daŋ joŋ ne fahlii ahe. 17 So goŋ Salomo ur kal ge Esion-Geber ne Elat mai mo pǝ cok zyii dah ma kah mabii ma ɗii ne Akaba pǝ sǝr Edom. 18 Goŋ Hiram pee dah ge nyi gŋ ne jol za yeɓ ah ne zaluu dah mai mo tǝra ɓǝ dah ɓo pǝlli. Ara ne zaluu yeɓ dah Salomo, kalra ge sǝr Efir, ɓaŋra vãm kaŋnyeeri gŋ ge wo goŋ Salomo ne ko, a gwari ne ton jemma tǝtǝl yea.
© Bible Moundang © Alliance Biblique du Tchad, 1996.
