1 Aru za ma joŋ yeɓ ne Masǝŋ, ru tǝ lai we, we soɓ gboŋgboŋ mai Masǝŋ mo joŋ ɓo wo ɓii muŋ tǝkol ka. 2 Mor Masǝŋ faa ɓǝ ah ɓo pǝ Ɗerewol:
Ne zah'nan joŋ gboŋgboŋ me laa pǝǝ ɓo,
Ne zah'nan ǝ̃ǝre me gbah jol ɓo.
We ẽe! Cok matǝ zǝzǝ̃ǝ zah'nan nyiŋ gboŋgboŋ Masǝŋ mo joŋ ɓo yo, tǝ'nahko zah'nan ǝ̃ǝr o.
3 Ru tǝ 'yah ka dǝɓ mo lwaa faa ɓǝɓe' tǝ yeɓ ɓuu ka, mor ah ru tǝ kyeɓ ka koo ne fahlii fẽene daŋ ru joŋ dǝɓ ɓee tǝ ɓal ka. 4 Amma ne fahlii rõm ɓǝ mai ru tǝ rõm pǝlli ne laa bone, cuu syak tǝkine ɓǝ swaa daŋ mai cuu: aru ye za yeɓ Masǝŋ. 5 Za loɓra ru, gbahra ru ge daŋgai, gaŋra ɓǝ tǝ ɓuuru, ru laa bone gaɓ yeɓɓe, ru kaa bai nǝnǝmmi wala bai farel comki. 6 Aru cuu ge lal ru ye za yeɓ Masǝŋ ne fahlii goŋga ɓuuru, ne fatan ɓuuru, ne rõm ɓǝ ɓuuru, tǝkine ɓǝ sãh ɓuuru, ne Tǝ'yak Matǝdaŋdaŋ, ne 'yah ɓuu mo ne goŋga, 7 ne ɓǝ cuu tǝ goŋga ɓuuru, tǝkine swah Masǝŋ. Aru joŋ yeɓ ne njaŋ ɓuu tǝgbana fan salle, mor ka ruu sal ne tǝkine byak suu ɓuu gwa daŋ. 8 A yiira ru, so a cuura swãa ɓuuru, a faara ɓǝɓe' tǝ ɓuuru, a so faara ɓǝ sãh tǝ ɓuu ta, a kwanra ru na za berre, amma aru ye za ma faa goŋga. 9 Aru na za mai za mo tǝra ya, so za daŋ tǝra ru ɓe. Aru tǝgbana za mai mo wukra ɓo, so aru no ne cee, awe laŋ we tǝ kwanne. A loɓra ru, so ikra ru pǝ wul a. 10 A ɓeɓra zahzyil nyi ru, so ru laa pǝ'nyah zah'nan daŋ. Aru ye za syakke, so ru kǝ̃ǝ za ne fan pǝlli. Aru na za ma bai fanne, amma goŋga ah ye ɓe, aru ne fan daŋ.
11 Awe Korintien, ru faa ɓǝ ge ɓo nyi we lal wat, zahzyil ɓuu gbǝr ge ɓo lal ka ɓii gǝǝ ta. 12 Aru coo zahzyil ka ɓii ya, amma awe ye coo ma ɓii ɓo ka ɓuuru. 13 So me tǝ faa ɓǝ wo ɓii tǝgbana awe ye wee ɓe, we yea ne ɓǝ foo ɓuu tǝgbana mai ru ne ɓǝ foo ɓii ta. We gbǝr zahzyil ɓii nyi ru pǝ'ahe.
Lai tǝ ɓǝ fan joŋ za bai iŋni
(Pǝ̃ǝ 34:14-16)14 We tai ki ne za ma bai iŋ ah ka, mor ɓǝ ah ka gak gan a. Fan masãh ah a gak tai ki ne fan maɓe' suu ɗǝne? Cokfãi ne cokfuu a gak taira ki ɗǝne? 15 Kristu ne Satan a gak taira ki ɗǝne? Dǝɓ iŋ a gak tai ki ne dǝɓ ma bai iŋ ah ɗǝne? 16 Yaŋ Masǝŋ a gak tai ki ne masǝŋ za bai iŋ ra ɗǝne? Mor ana ye yaŋ Masǝŋ ma ne cee, tǝgbana Masǝŋ ne suu ah mo faa:
Me ga zyeɓ cok kal ɓe wo ɓǝǝ me ga kaa kǝsyil ɓǝǝra,
Me ye ga yea Masǝŋ ɓǝǝra,
A ga ciŋra za ɓe.
17 Mor ah Dǝɓlii faa:
We ur soɓ ra, we woŋ ki ne ra,
We tai ki ne za ma ne 'nahm ka syaŋsyaŋ,
Ka me ga nyiŋ we.
18 Ame ye ga yea pa ɓiiri,
We ye ga yea wee ɓe mawǝǝ ne woi ɓe,
Dǝɓlii ma ne swah daŋ faa naiko.
© Bible Moundang © Alliance Biblique du Tchad, 1996.
