Nyi fan eklesia
1 Wee pa ɓe, ru 'yah we tǝ ɓǝ gboŋgboŋ mai Masǝŋ mo joŋ kǝsyil eklesia sǝr Makedonia. 2 Liira ra ne bone camcam mai mo pǝ̃ǝra pǝzyil ahe, amma laara pǝ'nyah pǝlli. Ara pǝsyak pǝlli, ne daŋ laŋ nyira fan pǝlli ne zahzyil vaŋno. 3 Me tǝ faa nyi we goŋga, nyira tǝgbana mai moo gakra, ŋhaa so kal tǝ mai moo gakra laŋ ta, nyira ne 'yah zahzyilli. 4 Pǝǝra ru pǝlli ka rǝ lwaa fahlii ka pee fan gbah jol za Masǝŋ ma sǝr Yudea ne ko. 5 So joŋra fan ah kal tǝ mai ru lǝŋ ɓo. Kǝpel ah nyira suu ɓǝǝ nyi Dǝɓlii, so mor 'yah Masǝŋ nyira suu ɓǝǝ nyi ru ta. 6 Mor ah ru pǝǝ Titus ka mo geko wo ɓii ka gbah jol ɓii ga pel ne yeɓ sãh mai mo tǝŋko mor ahe, ka we lwaa vǝr yeɓ 'yah maiko. 7 Awe ye za joŋ pǝ fan daŋ: pǝ iŋni, pǝ ɓǝ faani, pǝ fatanne, pǝ 'yah gbah jolle, tǝkine 'yah ɓuuru. So ru 'yah ka we yea za joŋ pǝ yeɓ 'yah mai ta.
8 Ɓǝ mai me tǝ faa nyi we, ɓǝ lai ye ka, amma me tǝ faa ɓǝ tǝwon mai za ki mo ne ko mor ka lii 'yah ɓiiri. 9 Mor we tǝ gboŋgboŋ mai Dǝɓlii man Yesu Kristu mo joŋ ɓe: pa joŋ ye ko, so joŋ suu ah ciŋ pa syak mor ɓiiri, mor ka joŋ we ciŋ za joŋne.
10 Ɓǝ mai me tǝ cuu ɓǝ foo ma zahzyil ɓe ye gai we: a pǝsãh ka we ge pel ne yeɓ mai we tǝŋ daga syiitǝkŋ. Awe ye tǝŋ kǝpelle, awe tǝŋ joŋ yeɓ ah kǝpel laŋ to ya, amma awe ne ɓǝ foo yeɓ ah ta. 11 Zǝzǝ̃ǝko we ge pel ne ko, ka we vǝr yeɓ ahe, we yea ne 'yah ka vǝr yeɓ ah tǝgbana mai we zyeɓ ɓǝ ah ɓo ka joŋni, we joŋ yeɓ ah ne fan mai mo no jol ɓiiri. 12 Mor we ne 'yah nyi ah ne zahzyil ɓe, Masǝŋ ga nyiŋ fan nyi ɓii mai we lwaa ɓo ka nyini, ka uu tǝ ɓǝ fan mai mo ka mor jol ɓii ra ya.
13 Me ka tǝ kyeɓ ka gbah jol za ki ka so rǝk faswaa tǝ ɓii ne ɓǝ ah ya, amma mor ka we yea zahki. 14 Ne cok mai we ne fan pǝlli ɓe, ka we gak gbah jol za mai fan mo ka jol ɓǝǝr a, ka comki ɓe fan mo jol ɓǝǝ pǝlli laŋ, mo gak gbahra jol ɓii ta, mor ka we yea zahki. 15 Tǝgbana Ɗerewol mo faa:
Dǝɓ mo woo ɓo pǝlli ɓe,
Ka ka ne fan pǝlli ya.
Dǝɓ mo woo biŋ ɓe,
Fan ki ka pee ko ya.
Titus ne za ma ne ki
16 Ru joŋ osoko nyi Masǝŋ mor ur koŋ ɓii pǝ zahzyil Titus tǝgbana ru ka ga gbah jol ɓiiri. 17 Laa pǝǝ ɓuu ru pǝǝ ko, ɓaa laŋ a ne 'yah ka zye ge wo ɓiiri. 18 Ru pee we pa man maki ah vaŋno ne ki mai eklesia daŋ moo sãara ko mor yeɓ cuu Ɓǝ'nyah mai moo cuuko. 19 Mai to laŋ ya, so eklesia nǝǝra ko ɓo ka mo kyãhko gwǝǝ ne ru, ne cok ru tǝ joŋ yeɓ 'yah mai mor ka yii yǝk Dǝɓlii tǝkine cuu gin lal aru tǝ 'yah gbah jol za ki.
20 Aru tǝ ɗuu galle, mor ka za mo faara ɓǝɓe' tǝ ɓuu tǝ fahlii lak malii mai ru tǝ joŋ yeɓ ah ka. 21 Aru ka ne 'yah joŋ fan masãh ah ne nahnǝn Dǝɓlii to ya, amma ru 'yah ka joŋ ne nahnǝn dǝfuu ta.
22 So aru pee naa pa man maki ne ra ta, aru lii ko ɓo zahlǝŋ pǝpãa ɓe, cẽecẽe ru lwaa a ga pel ne 'yah gbah jolle. Amma zǝzǝ̃ǝko a ne ɓǝ foo ɓii pǝ zahzyil ah pǝlli, so a ne 'yah gbah jol pǝ'manne. 23 Mǝ Titus, ako ye patǝ gwa ɓe, a joŋ yeɓ ne me mor ka gbah jol ɓiiri. Wee pa man mai mo tǝ gara ne ki eklesia ye pee ra ɓo, a joŋra yeɓ mor yii yǝk Kristu. 24 We 'yah ra nǝn za daŋ, ka eklesia daŋ mo tǝra: ɓǝ yii suu mai ru yii ne ɓǝ ɓii, ɓǝ ah goŋga yo.
© Bible Moundang © Alliance Biblique du Tchad, 1996.
