Gbah jol za iŋ manyeeki
1 Ɓǝ gbah jol za Masǝŋ ma sǝr Yudea, ka pǝsãh ka me so ŋwǝǝ ɓǝ ah nyi we yao. 2 Mor me tǝ ɓǝ 'yah gbah jol mai we ne ɓe, ame yii suu ɓe ne ɓǝ ɓii wo eklesia ma sǝr Makedonia, me faa: “Wee pa man ma sǝr Grek daŋ zyeɓra suu ka nyi fan ah ɓo daga syiitǝkŋ dai.” So ɓǝ ɓii ur tǝwon pǝ zahzyil za pǝlli kǝsyil ɓǝǝra. 3 So zǝzǝ̃ǝko me pee wee pa man marai wo ɓiiri, mor ka ɓǝ mai ru yii suu ne tǝ ɓǝ ɓii mo so ciŋ ɓǝ kol ka. Amma me 'yah we zyeɓ suu ɓii kaa ɓo ne tǝgbana mai me faa ɓo, 4 mor ka eklesia sǝr Makedonia mo gera ne me ɓe, mo so ge lwaara we zyeɓ suu ɓii kaa ɓo ne ya ɓe, swãa ga re ru pǝlli tǝkine we daŋ tǝ ɓǝ sãh mai ru faa ɓo tǝ ɓiiri. 5 Me foo a pǝsãh ka me faa nyi wee pa man rai ka mo ɗah syeera ge pel ɓe, mor ka zyeɓ ɓǝ fan nyi ma ne 'yah mai we faa ɓǝ ah ɓo ka nyini, ka ne cok me ge dai ɓe, me ge kwo we tǝ nyi ne 'yah zahzyilli, bai doole.
6 Me 'yah we foo ɓǝ maino: dǝɓ mo ruu nah fan ge sǝŋ biŋ, a ga lwaa fan ah biŋ ta. Dǝɓ mo ruu ge sǝŋ pǝ'manne, a ga lwaa pǝ'man ta. 7 Koo zune daŋ mo nyiko na zahzyil ah mo foo ɓo, bai mgbǝr ɓǝ gŋ wala bai doole. Mor Masǝŋ 'yah dǝɓ mo nyi ne zahzyil pǝ'nyahre. 8 Masǝŋ a ne swah ka nyi fan mai we ne 'yah ah daŋ nyi we pǝlli, mor ka cẽecẽe we yea ne fan mai daŋ we ne 'yah ahe, ka we ge pel ne ko ne joŋ yeɓ sãh camcam daŋ. 9 Tǝgbana Ɗerewol mo faa:
“Ako yee wom fan nyi za syakke,
Kwan syak ah ga lii ga lii”.
10 Masǝŋ ako yee nyi nah fan nyi pa ma ruu fan tǝkine farel ka renne, a ga nyi nah fan mai we ne 'yah ah daŋ nyi we, a so ga joŋ ka fan ah mo joŋ pǝlli, mor ka lee syẽm yeɓ tǝ goŋga ɓii mo ge pel pǝlli ta. 11 A ga joŋ we yea pǝkǝ̃ǝ pǝlli, mor ka cẽecẽe ne cok daŋ we gak syel jol ɓiiri, mor ka za pǝlli mo joŋra osoko nyi Masǝŋ mor fan nyi ɓii we pee ɓo ne jol ɓuuru. 12 Mor yeɓ mai we tǝ joŋ ka mor ka gbah jol za Masǝŋ nai to ya, amma ɓǝ ah a no na fan mai ka mo joŋ za pǝlli mo joŋra osoko nyi Masǝŋ. 13 Mor yeɓ ah a ga cuu cok ul ɓii we gŋ taŋraŋ, so za pǝlli a ga yiira Masǝŋ mor iŋ ɓii mai we cuu ge ɓo lal ne mai we tǝ laa zah Ɓǝ'nyah Kristu. So a ga joŋra osoko nyi Masǝŋ ne ɓǝ fan nyi ɓii mai we tǝ wom fan sãh ɓii ne ra tǝkine za daŋ. 14 A ga juura pel wo Masǝŋ mor ɓii ne foo ɓǝ ɓii pǝ zahzyil pǝ'manne, mor gboŋgboŋ malii mai Masǝŋ mo joŋ ɓo wo ɓiiri. 15 Osoko Masǝŋ mor fan nyi ah malii mai ɓǝ ah mo kal tǝ faa ga zah ɓo!
© Bible Moundang © Alliance Biblique du Tchad, 1996.
