Lee yaŋ Samaria tǝkine mai mo woora za Israel kal ne ko
1 Ne cok Akas mo kaa goŋ Yuda syii jemma, Hosea we Ela kaa goŋ Israel ne ko. Kaa goŋ yaŋ Samaria syii doraŋ. 2 Joŋ fan maɓe' ah pel Dǝɓlii, amma ne daŋ laŋ ka tǝgbana mǝ za goŋ Israel ma kǝpel ah ra ya. 3 Salmanasar goŋ Asiria pǝ̃ǝ sal ge zah ahe. Hosea ciŋ dǝɓ ma joŋ yeɓ mor ahe, a sǝǝ gǝraama nyi ko. 4 Amma goŋ Asiria laa ɓǝ yella mai Hosea mo tǝ joŋni, mor pee za kal ge wo goŋ sǝr Egiɓ ma ɗii ne So, so zyii sǝǝ gǝraama nyi goŋ Asiria yao. Mor ah goŋ Asiria gbǝ ko ɓoo ge daŋgai. 5 So fahfal ah goŋ Asiria pǝ̃ǝ sal ge tǝ sǝr ah daŋ, ge zah Samaria, ryaŋ yaŋ ah syii sai. 6 Ne cok Hosea mo kaa goŋ syii doraŋ, goŋ Asiria re yaŋ Samaria ne ko, so woo za Israel kal ge sǝr Asiria ne ra. Ge soɓ ra kaa yaŋ Hala kah el Habor pǝ sǝr Gozan tǝkine pǝ yaŋ maluu pǝ sǝr Media.
7 Fan ah joŋ nai mor za Israel joŋra faɓe' wo Dǝɓlii Masǝŋ ɓǝǝ mai mo pǝ̃ǝ ne ra gin sǝr Egiɓ jol goŋ Farao, mor a syeera mor masǝŋ ki ra. 8 A syeera mor zah fan joŋ za mai Dǝɓlii mo nĩi ra pel ɓǝǝ myah ge ɓo lalle, tǝkine syee mor ɓǝ lai mai za goŋ Israel mo kanra ɓo. 9 Za Israel a lal joŋra fan mai mo ka pǝsãh ka joŋ ya wo Dǝɓlii Masǝŋ ɓǝǝra. Vuura cok joŋ syiŋ ma tǝgee sǝŋ ah ra pǝ yaŋ ɓǝǝ maluu mai mo ne ɓaale daŋ ta. 10 Rǝkra foto masǝŋ za ki tǝkine ma ɗii ne Astarte tǝgee mawah ah ra tǝkine mor kpuu maluu ah ra daŋ. 11 A tǝǝra ɓǝrdi pǝ cok joŋ syiŋ ma tǝgee ah ra, tǝgbana za mai Dǝɓlii mo nĩi ra pel ɓǝǝ myah ge lalle. A joŋra yeɓ maɓea ah ra mor ka ɓeɓ zahzyil nyi Dǝɓlii ne ko. 12 A syeera mor masǝŋ ki ra mai Dǝɓlii mo faa nyi ra: We joŋ ka.
13 Amma Dǝɓlii lai za Israel ne za Yuda ne zah profetoen ne zah za ma kwanra ɓǝ ma ga joŋ pel daŋ, faa: We soɓ fahlii ɓe' ɓii we tǝ syee gŋ, we gbǝ ɓǝ faa ɓe ra ne ɓǝ lai ɓe mai daŋ me faa ɓo nyi pa ɓii lii ra mai me pee ge ɓo wo ɓii ne zah za yeɓ ɓe profetoen. 14 Amma za Israel zyii laara ya, yerra zahzyil ɓǝǝ tǝgbana pa ɓǝǝ lii mo yerra, zyii nyiŋra ɓǝ Dǝɓlii Masǝŋ ɓǝǝr a. 15 Syẽara ɓǝ lai ah tǝkine ɓǝ gbanzah ah mai mo gbǝ ne pa ɓǝǝ lii ra tǝkine lai mai mo lai ra. So syeera mor masǝŋ makol ah ra, so ciŋra fan kol ta. A syeera mor za mai mo kaara ɓo kah ɓǝǝra. Dǝɓlii faa nyi ra mo joŋra fan na ra ka. 16 Soɓra ɓǝ faa Dǝɓlii Masǝŋ ɓǝǝra, coora wee dǝǝ gwa ne vãmme, zyeɓra foto Astarte, a syeera mor fan camcam mai mo no coksǝŋ, a juura pel wo Ba'al. 17 A joŋra syiŋ suŋwii nyi masǝŋ ki cam ne wee ɓǝǝ mawǝǝ ne maŋwǝǝre, a ẽera ciŋ tǝkine kyãh ne fasaa, soɓra suu ɓǝǝ ɓo mor ka joŋ fan maɓe' ah wo Dǝɓlii ka ɓeɓ zahzyil nyi ko. 18 Dǝɓlii ɓaŋ kpãh tǝ za Israel pǝlli, woo ra pel ah myah ge lalle, sai soɓ ban Yuda to.
19 Amma za Yuda laŋ gbǝra ɓǝ faa Dǝɓlii Masǝŋ ɓǝǝ mo faa ya, so kal tǝ syeera mor ɓǝ zahsyiŋ Israel. 20 Dǝɓlii myah morsǝ̃ǝ Israel daŋ ge lalle, tǝr ra ge falle, soɓ ra ge mor jol za ma myah zana, woora ra pel ah myah ge lalle.
21 Ne cok mo woŋra ki ne za Israel ma morsǝ̃ǝ David, so za Israel ma ban tǝ jemma ɓaŋra Jeroboam we Nebat kan goŋ ɓǝǝ ne ko. Amma Jeroboam cak gin tǝ fahlii syee mor Dǝɓlii ne za Israel, zaŋ ra dan ge pǝ faɓe' malii ah ne ko. 22 A joŋra faɓe' mai Jeroboam moo joŋ daŋ, soɓra ge lal koo vaŋno ya, 23 ŋhaa Dǝɓlii woo za Israel pel ah myah ge lal tǝgbana mo faako ɓǝ ah nyi za yeɓ ah profetoen. Woo za Israel gin sǝr ɓǝǝ kal ge sǝr Asiria ne pǝɗǝk ŋhaa tǝ'nahko.
Woora za ki ge rǝk Samaria
24 Goŋ Asiria ge ne za ki daga sǝr Babilon, ne sǝr Kut, ne mǝ Ava, ne Hamat tǝkine Sefarvaim, ge rǝk ra yaŋ Samaria maluu camcam pǝ cok za Israel, kaara gŋ. 25 Ne cok mo tǝŋra kaa gŋ, ka ɗuura Dǝɓlii ya, mor ah Dǝɓlii pea ɓol ge kǝsyil ɓǝǝra, ɓol ah ik za ki kǝsyil ɓǝǝra. 26 Faara nyi goŋ Asiria: Za mai mo woo ra ge ɓo ne mo rǝk ra ɓo pǝ yaŋ Samaria maluu camcam, tǝra fahlii syee mor masǝŋ sǝr mai ya, mor ah pea ɓol ge ɓo kǝsyil ɓǝǝra. Mo ẽe ɗǝ, ɓol ah ra tǝ ik za pǝlli, mor zan ah tǝra fahlii syee mor masǝŋ sǝr mai ya. 27 Goŋ Asiria faa: Sai mo ɓaŋra pa joŋzahsyiŋ vaŋno kǝsyil za mai me woo ra gin ŋhaa ge ne ko, ka mo pii sooko ge kaa ŋhaako, ka mo cuuko fahlii syee mor masǝŋ sǝr ah nyi ra. 28 Dǝɓ vaŋno kǝsyil za joŋzahsyiŋ mai mo woora ra gin Samaria, kalle, ge kaa yaŋ Betel. Cuu fahlii ɗul Dǝɓlii nyi ra.
29 Amma za mai mo ge ɓo gŋ zune daŋ a zyeɓ masǝŋ ahe, a ga rǝk ra ɓǝr yaŋ pǝ cok ma tǝgee mai Samarien mo joŋra ɓo. Za camcam daŋ a joŋra pǝ yaŋ ɓǝǝ mai mo ge kaara ɓo gŋ naiko: 30 za Babilon zyeɓra Sukot-Benot, za Kut zyeɓra Nergal, za Hamat zyeɓra Asima, 31 za Ava zyeɓra Niɓkas ne Tartak, mǝ za Sefarvaim a joŋra syiŋ suŋwii ne wee ɓǝǝ mor ka yii masǝŋ ɓǝǝ Adrammelek ne Anammelek ne ko. 32 A ɗuura Dǝɓlii ta, a nǝǝra za ki rǝk kǝsyil ɓǝǝ tǝgbana za joŋzahsyiŋ mor cok ma tǝgeere, za joŋzahsyiŋ ah a joŋra syiŋ mor ɓǝǝ ɓǝr yaŋ pǝ cok joŋ syiŋ ma tǝgeere. 33 A ɗuura Dǝɓlii, amma a syeera mor masǝŋ ɓǝǝ tǝgbana zahsyiŋ ah mai mo yea tǝ joŋra sǝr ɓǝǝra.
34 Wee ɓǝr ɓǝǝ a syeera mor ɓǝ zahsyiŋ matãa camcam ŋhaa tǝ'nahko. Ka ɗuura Dǝɓlii tǝkine joŋ fan tǝgbana ɓǝ lai ah ne fahlii ah ra mo cuu ɓo, koo pǝ ɓǝ lai ah ne ɓǝ faa Dǝɓlii mo faa ɓo nyi wee Yakuɓ mai moo ɗii ne Israel ya. 35 Dǝɓlii gbǝ zah ne ra faa nyi ra: We ɗuu gal masǝŋ ki ra ka, we kea ge sǝŋ pel ɓǝǝ ka, we ŋgom fan joŋ syiŋ pel ɓǝǝ ka. 36 Amma we ɗuu Dǝɓlii mai mo pǝ̃ǝ ne we daga sǝr Egiɓ ne swah ah malii, we juupel wol ahe, we ŋgom fan joŋ syiŋ pel ah to. 37 Sai zah'nan Masǝŋ daŋ we gbǝ ɓǝ lai ah ra, ne fahlii ah ra mo cuu ɓo, ne ɓǝ nyi ah ra tǝkine ɓǝ faa ah mai mo ŋwǝǝ ɓo nyi we. We ɗuu gal masǝŋ ki ra ka. 38 We yaŋ ɓǝ gbanzah mai me gbǝ ɓo ne we ka, we ɗuu gal masǝŋ ki ra ka syaŋsyaŋ. 39 Amma we ɗuu gal Dǝɓlii Masǝŋ ɓiiri. Ako ye ga ǝ̃ǝ we gin mor jol za syiŋ ɓii daŋ.
40 Amma zyii laara ya, so kal tǝ joŋra fan na matãa.
41 Za mai a ɗuura Dǝɓlii, amma a syeera mor masǝŋ ɓǝǝ ra ta. So wee ɓǝǝra, ne wee ɓǝr wee ɓǝǝra, a joŋra fan tǝgbana pa ɓǝǝ ra ŋhaa tǝ'nahko.
© Bible Moundang © Alliance Biblique du Tchad, 1996.
