Jehu kaa goŋ tǝ za Israel
1 Comki profeto Elisa ɗii dǝɓ vaŋno kǝsyil profetoen Masǝŋ faa nyi ko: Mo baŋ sãh ɓo, mo ɓaŋ gbel nǝm mor jolle, mo ge Ramot ma Giliat. 2 Ne cok mo ge dai gŋ ɓe, mo ge kyeɓ Jehu we Yusafat we Nimsi. Mo lwaa ko ɓe, ka mo faa nyi ko kǝsyil wee pam mo urko ge, ka mo ge ɓǝr yaŋ maki ah ne ki. 3 Mo ɓaŋ gbel nǝmmi, ka mo syee nǝm ge tǝl ah mo faa: Dǝɓlii faa: Me syee nǝm ge tǝ ɓo ka mo kaa goŋ tǝ za Israel. So ka mo coo zahfah ge tǝl ah mo hǝǝ kalle, mo gbǝ rol ka.
4 We tǝbanna dǝɓ yeɓ profeto Masǝŋ kal ge Ramot ma Giliat. 5 Ne cok mo ge daini, ge lwaa zaluu sooje haira ɓo wo ki, faa nyi dǝɓlii sooje vaŋno: Me no ne ɓǝ ka faa nyi mo. Jehu fii ko: Mo ne ɓǝ ka faa nyi zu kǝsyil ɓuu ne? Zyii zah ah faa: Me ne ɓǝ ka faa nyi mo dǝɓlii sooje. 6 So Jehu ur kal ge ɓǝr yaŋ ne ki, we tǝbanna syee nǝm ge nyi tǝtǝl faa: Dǝɓlii Masǝŋ Israel faa: Me syee nǝm tǝ ɓo ka mo kaa goŋ tǝ za ɓe Israel. 7 Sai mo ik za yaŋ dǝɓlii ɓo Akaɓ ge lalle. Me ga faŋ val syim za yeɓ ɓe profetoen ne syim za yeɓ ɓe manyeeki ah daŋ tǝ Jesabel. 8 Za yaŋ Akaɓ daŋ a ga vǝr tǝɗe'. Me ga vǝr za yaŋ Akaɓ tǝɗe', koo mo byak ah yo, koo mo dǝɓ ma ne tǝtǝl suu ah yo daŋ, kǝsyil za Israel ga lalle. 9 Me ga joŋ yaŋ Akaɓ tǝgbana yaŋ Jeroboam we Nebat, tǝgbana yaŋ Baasa goŋ Israel. 10 Amma mǝ Jesabel goo ga re wul ah pǝ 'wah Jezereel, dǝɓ ka cii ko ya. So we tǝbanna gbǝr zahfah hǝǝ kalle.
11 Jehu pǝ̃ǝ ge lal kal ge wo za yeɓ dǝɓlii ah Akaɓ. Fiira ko faa: Jam ye ne? Tǝcem mai ge wo ɓo mor fẽene? Zyii zah ɓǝǝ faa: Awe tǝ dǝɓ ŋhaa ne ɓǝ faa ah laŋ ɓe. 12 Faara: Mo laa ɗah ber ɗǝ, mo faa ɓǝ nyi ru o. So faa nyi ra: Faa nyi me nai sye nai sye, faa: Dǝɓlii faa zye syee nǝm ɓo tǝ ɓe kan goŋ Israel ɓo ne ko. 13 Urra ne pel gwari, woora mbǝro ɓǝǝ rǝk ge mor ɓal Jehu, ulra kokõorĩi, ɓyaŋra ɓǝ faa: Jehu kaa goŋ ɓe!
Jehu i Jehoram pǝ wulli
14 Ne cok ah Jehu we Yusafat we Nimsi ur ɓǝ ne Jehoram naiko. Amma ka Jehoram ne za Israel daŋ tǝ byakra Ramot ma Giliat tǝ ɓǝ Hazayel goŋ sǝr Siria. 15 Amma goŋ Jehoram ge ɓo Jezereel mor ka kiŋ nwãh ah mai Sirien mo dǝra ko ne cok mo tǝ ruu sal ne Hazayel goŋ sǝr Siria. Jehu faa nyi za mai mo no ne ki: We 'yah ka me kaa goŋ ɓii ɓe, dǝɓ mo pǝ̃ǝ gin tǝgǝǝ yaŋ nyee ka ga faa ɓǝ ah Jezereel ka.
16 Jehu yee muŋta pǝr ahe, ur kal ne ka ga Jezereel, mor Jehoram swǝ ɓo ne syem gŋ ŋhaako. Amma ka Akazia goŋ Yuda ge ɓo tǝ ẽe Jehoram. 17 Pa byak cok uu tǝ yaŋ mai moo byakra cok gŋ Jezereel, kwo kul sooje Jehu tǝ ginni. So faa: Me kwan kul dǝfuu tǝ ginni. Jehoram faa: Mo pee dǝɓ vaŋno ne pǝr ka mo ge zyaŋko tǝ ɓǝǝ ka mo fii ko: Jam ye ne? 18 Dǝɓ ki yee pǝr kal ge zyaŋ tǝ Jehu ne ko, faa: Goŋ faa me fii mo: Mo ge ɓo jam ye ne? Jehu zyii zah ah faa: Ɓǝ jam saaŋ mo ɗǝne? Mo syee ge fahfal ɓe nyeeno. Pa byak cok kŋ kee ɓǝ ah nyi goŋ faa: Papee dai wo ɓǝǝ ɓe, so pii soo ge yao. 19 So pee dǝɓ patǝ gwa ah kal ne pǝr kpǝ, dǝɓ ah ge dai wo ɓǝǝ faa: Goŋ faa me fii we: Ɗah jam no wo ɓii ne. Jehu zyii zah ah faa: Ɓǝ jam saaŋ mo ɗǝne? Mo pii soo ge fahfal ɓe nyeeno. 20 Pa ma byak cok kee ɓǝ ah nyi goŋ faa: Dǝɓ ah ge dai wo ɓǝǝ ɓe, so pii soo ge yao. Dǝɓ mai mo tǝ gin ne pǝr a ɗaŋ pǝr tǝgbana Jehu we Nimsi, mor a ɗaŋ pǝr tǝgbana tǝgwĩi. 21 So Jehoram faa: We ɓaŋ muŋta sal saa nyi pǝrri. Saara muŋta nyi pǝr ahe. So Jehoram goŋ Israel ne Akazia goŋ Yuda pǝ̃ǝra, zune kǝsyil ɓǝǝ daŋ yee muŋta mǝ ah ɓo. Kalra ne ka ga zyaŋ tǝtǝl Jehu. Ge zyaŋra ne ki pǝ 'wah Nabot Jezereeliyo.
Jehu i Jehoram pǝ wulli
22 Ne cok Jehoram mo kwo Jehu, fii ko faa: Mo ge ɓo jam ko ye ne Jehu? So Jehu zyii zah ah faa: Jam fẽe ye ɗah ma ɓo Jesabel moo joŋ ɓǝǝre, so za ẽe ciŋ ah mo pǝlli ta ne? 23 Jehoram jin kal ne ɗulli, ɓyaŋ ɓǝ faa: Ge ɓo kal mana, Akazia! 24 Amma Jehu woo saŋ ne swah dǝ ko gin falsah ŋhaa guu pǝ̃ǝ ge dai zahgbelsyimmi, so lee ge ɓǝr muŋta ahe. 25 Jehu faa nyi pa ma gbah jol ah Bitkar: Mo ɓaŋ wul ah ɓoo ge pǝ 'wah Nabot Jezereeliyo. Mor comki ne cok na tǝ syee mor pah ah Akaɓ ne pǝrri, Dǝɓlii faa ɓǝ mai tǝtǝl ahe, 26 faa: Me ga faŋ val syim Nabot ne mǝ wee ah tǝ Akaɓ pǝ 'wah maiko. Mo ɓaŋ wul Jehoram mo ɓoo ge pǝ 'wah tǝgbana Dǝɓlii mo faa ɓo.
Jehu i Akazia pǝ wulli
27 Ne cok Akazia goŋ Yuda mo kwo naiko, ɗuu ɓaŋ fahlii ma ga Bet-Hagan. Amma Jehu foo mor ah ge gŋ, faa nyi za mo dǝra ko ge pǝ muŋta ah ne guu. Dǝra ko tǝgee Gur kah Jebleam, ŋhaa ɗuu ge dai Megiddo ge wǝ gŋ. 28 Za yeɓ ah ɓaŋra wul ah ne muŋta kal ge yaŋ Jerusalem ne ko. Ge ciira ko pǝ pal mǝ ah kah pah ah ra pǝ yaŋ David.
29 Ne cok Jehoram we Akaɓ mo kaa goŋ syii jemma tǝtǝl vaŋno, Akazia kaa goŋ Yuda ne ko.
Wul Jesabel
30 Jehu kal ge yaŋ Jezereel. Ne cok Jesabel mo laa ɓǝ ahe, kan sǝŋgin ge mor nǝnni, zyeɓ fagai ah ge wo suu. So maa tǝtǝl zahtǝwoo yaŋ ẽe cok ge lalle. 31 Ne cok Jehu mo ge zahpiicelle, Jesabel faa: Zimri pa in dǝɓlii ɓo, mo no jam ne? 32 Jehu ɓaŋ nahnǝn ẽe cok zahtǝwoo faa: Azu ye nyee ne me ne? Azu ye ne? Syẽe gwa koo sai ẽera cok ge wol ah zahtǝwoo. 33 Jehu faa: We ɓaŋ ko ɓoo ge sǝŋ. Ɓaŋra ko ɓoo ge sǝŋ, syim ah 'men ge wo yaŋ tǝkine pǝr ah ra daŋ. Pǝr so dahra ko ne ɓalle.
34 So Jehu dan kal ge ɓǝr yaŋ, ge re farelle, zwǝ fanne. Fahfal ah so faa: We ge ẽe wul mawin zahyee ko, we cii ko, mor mǝlaŋ goŋ yo. 35 Kalra ge ka ɓaŋ ko ciini. Amma ge lwaara yao, sai gbeltǝtǝl ah ne ɓal ah ra tǝkine jol ye coŋ ɓo to. 36 Pii soora ge kee ɓǝ ah nyi Jehu, so Jehu faa: Ɓǝ mai Dǝɓlii mo faa ne zah dǝɓ yeɓ ah Elias Tisbiyo ye joŋ ɓo, faa: Goo ga re nǝǝ Jesabel pǝ 'wah Jezereel. 37 Wul Jesabel a ga yea pǝ 'wah Jezereel tǝgbana farenjẽa, dǝɓ ka gak faa Jesabel kŋ ko ye nyeeno ya.
© Bible Moundang © Alliance Biblique du Tchad, 1996.
