David ne Batseba
1 Na tǝ'nanki ah ne cok zah bam mai za goŋ moo pǝ̃ǝra ruu sal ne ko, David pee Joaɓ ne za yeɓ ah tǝkine za Israel daŋ, ge ikra Ammonien, so ryaŋra yaŋ Rabba. Ne cok ah ka David kaa mǝ ah ɓo yaŋ Jerusalem fahfalle.
2 Comki ne lil David ur gin tǝ faswul ah tǝ kyãh zahdǝǝ yaŋ goŋ ahe, uu zahdǝǝ yaŋ goŋ kwo mawin ki tǝ er bii, mawin ah pǝsãh no cam. 3 David pepee fii ɓǝ mawin ahe, amma faara nyi ko: Batseba mǝlaŋ Eliam mawin Urias Hetiyo yo. 4 So David pee za ka mo ge ɗiira ko ge ne ko. Batseba ge yaŋ David, so David swǝ ne ki. (Ka Batseba er bii ŋwǝǝ saŋ ɓo zǝ̃ǝ ba.) Fahfal ah so pii soo kal ge fah yaŋ ahe. 5 Mawin ge gbǝ ɓilli, so pepee wo David faa: Me ne ɓilli.
6 So David pepee wo Joaɓ faa: Mo pee Urias Hetiyo gee me. Joaɓ so pee Urias ge wo David. 7 Ne cok Urias mo ge dai wol ahe, David so fii jam Joaɓ zah ah ne za sal tǝkine ɓǝ salle. 8 So David faa nyi Urias: Mo ge yaŋ ɓo, mo ge 'yak nje ɗao. Urias pǝ̃ǝ gin yaŋ goŋe, so goŋ pee farel ma zah ah mor ahe. 9 Amma Urias swǝ zahɓel goŋ ŋhoo ne za ma byak dǝɓlii ahe, zyii ga yaŋ ah ya. 10 Ge faara nyi David: Urias ge yaŋ ah ya. David fii Urias: Mo gee gwǝǝ ge ɓo ya ne? Mor fẽe mo ge yaŋ ɓo ya ne? 11 Urias zyii zah David faa: Sunduku Dǝɓlii ne za sal Israel ne za sal Yuda haira ɓo pǝ jul cokki, dǝɓlii ɓe Joaɓ ne sooje dǝɓlii ɓe goŋ daŋ swahra ɓo cokki, ka ma ɓee gur me kal ge yaŋ ɓe ka ren fan ne zwan fan tǝkine swan ne mawin ɓe ne? Dǝɓlii no, tǝtǝl ɓo no sǝŋ ta, me ka joŋ fan mai ya syaŋsyaŋ. 12 So David faa nyi Urias: Mo kaa nyee tǝ'nah ɗao faɗa, tǝ'nan ɓe me ga nyi fahlii nyi mo ba. Urias so zok yaŋ Jerusalem com moo wõi kpǝ ŋhaa tǝ'nan ahe. 13 Tǝ'nan ah David ɗii ko ka mo reko farel wol ahe, David nyi yim nyi ko zwǝ ŋhaa tǝǝ ne ko. Amma ne lil ah Urias ur ka ga swan sǝŋ tǝ faswul ah wo za ma byakra dǝɓlii ahe, amma ge yaŋ ah ya.
14 Tǝ'nan ah ne zah'nan David ŋwǝǝ ɗerewol wo Joaɓ pee ge ne jol Urias. 15 Ŋwǝǝ ɓǝ pǝ ɗerewol ah naiko: Mo kan Urias ge pǝ cok sal magaɓ ahe, ka we pii soo gin mor ah ka mo ira ko pǝ wulli. 16 Ne cok Joaɓ mo ryaŋ yaŋ Rabba, ɓaŋ Urias uu pǝ cok mai ako mo tǝ ɓo, za sal maswah ah gŋ. 17 Za yaŋ ah pǝ̃ǝra ruu sal ne Joaɓ, ikra za kǝsyil za Israel pǝlli, kǝsyil za ma byak David laŋ wukra pǝlli, Urias wǝ gŋ ta.
18 Joaɓ pepee kee ɓǝ sal nyi David tǝkine fan mai mo joŋ ɓo gŋ daŋ. 19 Faa nyi pa pee ah naiko: Ne cok mo ge kee ɓǝ sal nyi goŋ vǝr daŋ ɓe, 20 so ka goŋ mo ɓaŋ kpãh mo faa: We tǝɓ ge wo yaŋ ah gwari ka ruu sal mor fẽene? We tǝ sõone a 'nǝǝra fan tǝ korvuur a ne? 21 Azu ye i Abimelek we Gideon pǝ wul sye ne? Madǝwin ye ka 'nǝǝ tǝkǝǝnin tǝ korvuu ge tǝl ah ɓoo ko ne pǝ wul Tebes ya ne? We ge kah ɓaale ah gwari mor fẽene ɓe, ka mo so faa nyi ko: Dǝɓ yeɓ ɓo Urias Hetiyo wǝ ɓe ta.
22 Pa pee ah kal o. Ne cok mo ge daini, ge kee ɓǝ mai Joaɓ mo peeko ne daŋ nyi David. 23 Pa pee ah zyii zah David faa: Zan ah ge urra ne ru ne swahe, pǝ̃ǝra ge lwaa ru lalle, so ru nĩi ra ge kan zahfah yaŋ taa. 24 Za ma ne saŋ 'nǝǝra guu tǝ ɓaale sǝŋ ge tǝ ɓuuru, jwǝǝra za ki kǝsyil ɓuuru, za ki kǝsyil ɓuu wukra ɓe, dǝɓ yeɓ ɓo Urias Hetiyo laŋ wǝ ɓe ta.
25 So David faa nyi pa pee: Mo ge faa nyi Joaɓ sye: Mo soɓ ɓǝ ah nǝǝ zahzyil ɓo ka, mor sal sye a nĩi dǝɓ mai tǝ'nahko, so tǝ'nan laŋ a nĩi dǝɓ ma ŋhaano, mo ruu sal ne yaŋ ah ne swahe, we re yaŋ ahe. Mo ge swaa zahzyil Joaɓ naiko.
26 Ne cok mawin Urias mo laa wor ah Urias wǝ ɓe, yeyee wul wor ahe. 27 So zah'nan yee wul ah mo vǝr o, David pepee ge ɓaŋ ko ge yaŋ ah ne ko, kanne. Byaŋ we wor ne ki vaŋno. Amma yeɓ mai David mo joŋ a pǝɓe' pel Masǝŋ.
© Bible Moundang © Alliance Biblique du Tchad, 1996.
