David kee za Israel ne za Yuda
(1 KeeƁ 21:1-27)1 Dǝɓlii ɓaŋ kpãh tǝ za Israel faɗa. So ur David tǝ ɓǝǝra, faa nyi ko: Mo ge kee pãa za Israel tǝkine za Yuda daŋ. 2 Goŋ faa nyi Joaɓ dǝɓlii sal ah mai moo yea ma wol ahe: Mo ge kyãh kǝsyil ban Israel, mo tǝŋ daga Dan ŋhaa mo dai Beerseba, mo ge kee zana, mor ka me tǝ pãa ɓǝǝra.
3 Joaɓ zyii zah goŋ faa: Dǝɓlii Masǝŋ ɓo mo ɓoo za ge pel zahlǝŋ temere ka dǝɓlii ɓe goŋ mo ẽere. Amma ko dǝɓlii ɓe goŋ 'yah joŋ nai mor fẽene? 4 Amma ne daŋ laŋ goŋ pee ne ɓǝ ah wo Joaɓ ne zaluu sal mbaŋ. Joaɓ tǝkine zaluu sal manyeeki ah urra gin pel goŋ mor ka ga kee za Israel.
5 Yeera el Yordan ge ɗǝrra Aroyer nǝfah jokǝsãh yaŋ mai mo pǝ el Gad gwari ne Jaizer. 6 Urra gin gŋ kal ge Giliat tǝkine Kades ma sǝr Hetien. Fahfal ah so gera Dan ne Sidon tǝkine sǝr ma kah ah ra daŋ. 7 Gera yaŋ ma ne ɓaale ma ɗii ne Tirus tǝkine yaŋ maluu sǝr Hevien ne Kanaanien daŋ. So kalra ge fah morkǝsǝŋ sǝr Yuda yaŋ Beerseba. 8 Kyãhra sǝr ah daŋ, ge daira yaŋ Jerusalem tǝ fĩi doraŋ ka zah'nan joŋ ɓo tǝl ah jemma gwa ɓe. 9 Joaɓ ge nyi pãa za mai mo keera nyi goŋe. Kǝsyil za Israel za ma nen gak ruu sal 800.000. Za ma gak ruu sal kǝsyil za Yuda laŋ ara 500.000.
10 Fahfal David mo kee zana, zahzyil so nǝǝ ko. David faa nyi Dǝɓlii: Me joŋ faɓe' malii ɓo ne joŋ ɓǝ naiko, amma zǝzǝ̃ǝko Dǝɓlii, mo rwah faɓe' dǝɓ yeɓ ɓo ge lalle, mor me joŋ tǝgwĩi ɓo pǝ'man no cam.
11 Ne cok David mo ur ne zah'nanne, Dǝɓlii faa ɓǝ nyi profeto Gad pa ẽe cok David: 12 Mo ge faa nyi David: Dǝɓlii faa sye: Me rǝk fan pel ɓo sai ka mo nǝǝ ne suu ɓo gin gŋ vaŋno ka me joŋ fan ah wo ɓo. 13 Gad ge wo David, ge kee ɓǝ ah nyi ko. Faa nyi ko: Koŋ mo wǝ sǝr ɓo syii sai ne? Wala mo 'yah ɗuu gal pel za syiŋ ɓo fĩi sai ka tǝ foora mor ɓo ne? Koo syem maɓe' ah ye mo ge sǝr ɓo zah'nan sai ne? Zǝzǝ̃ǝko mo nǝǝ gin gŋ o, ka mo faa nyi me, ka me ge faa ɓǝ ah nyi dǝɓ mai mo pee me ge.
14 David zyii zah Gad faa: Me dan pǝzyil ɓǝ swaa pǝ'man ɓe. Amma pǝram na lee ge jol Dǝɓlii, mor kwan syak ah pǝ'manne, me 'yah me lee ge jol dǝfuu ya. 15 David nǝǝ syemme, ne cok ah ka cok saŋ alkamaari yo. Dǝɓlii pee syem maɓe' ge kǝsyil za Israel daga zah'nan ŋhaa dai cok ah mo cuu ɓo, syem ah ik za pǝ wul daga Dan ŋhaa Beerseba joŋ ujenere jemma rǝŋ. 16 So Angelos Dǝɓlii ɓoo tǝtǝl ka ga yaŋ Jerusalem mor ka vǝr zan ahe, so Dǝɓlii soɓ joŋ ɓǝɓe' wo yaŋ ahe. Faa nyi angelos ma ik zana: Kii ɓe, mo soɓ o! Amma angelos ge dai pǝ cok ɗuu sor Araona Jebusiyo.
17 Ne cok David mo kwo angelos ma ik zana, so faa nyi Dǝɓlii: Mo ẽe, ame ye pa joŋ faɓe', ame ye joŋ ɓǝɓe' ah ɓo. Amma pǝsǝ̃ǝ rai ma ɓǝǝ joŋra fẽene? Oseni pǝram mo i me tǝkine za ɓe.
18 Com ah Gad ge wo David, faa nyi ko: Mo ur mo ge vuu cok joŋ syiŋ wo Dǝɓlii pǝ cok ɗuu sor Araona Jebusiyo. 19 David ur kal ge na ɓǝ faa Gad mo faa nyi ko, tǝgbana mai Dǝɓlii mo faa ɓo. 20 Araona ɓaŋ nahnǝn ẽe cokki, kwo goŋ ne za yeɓ ah tǝ ginra wol ahe. Pǝ̃ǝ ge kea sǝŋ pel goŋ ɗǝŋ tǝtǝl ge tǝ sǝrri. 21 Araona faa: Dǝɓlii ɓe goŋ ge ɓo wo dǝɓ yeɓ ah ɗǝne? David faa nyi ko: Me ge ɓo ka lee cok ɗuu sor ɓo mor ka vuu cok joŋ syiŋ wo Dǝɓlii gŋ ka syem ɓe' nyẽe mo soɓ zana. 22 Araona so faa nyi David: Dǝɓlii ɓe goŋ mo ɓaŋ o, mo joŋko syiŋ gŋ na zahzyil ah mo 'yahe. Dǝǝ joŋ syiŋ suŋwii ah ra nyẽeno, kpuu ɗuu sor tǝkine kpuu zahsol dǝǝ ah ra laŋ a mor ka cok wii. 23 Dǝɓ yeɓ dǝɓlii ɓe goŋ nyi mai nyi goŋ daŋ. So Araona faa nyi goŋe: Dǝɓlii Masǝŋ ɓo mo nyiŋ syiŋ ɓo. Cok joŋ syiŋrĩ
24 Amma goŋ faa nyi Araona: Ka nai ya, me ga lee jol ɓo lee, me 'yah joŋ syiŋ suŋwii wo Dǝɓlii ɓe bai lee fan ah lee ya. David lee cok ɗuu sor ah ne dǝǝ ah ra vãm solai jemma dappe. 25 David vuu cok joŋ syiŋ gŋ wo Dǝɓlii, joŋ syiŋ suŋwii gŋ tǝkine syiŋ ma nyi jam. So Dǝɓlii kwo syak tǝ sǝr ahe, syem ɓe' soɓ za Israel.
© Bible Moundang © Alliance Biblique du Tchad, 1996.
