David kaa kacella
(1 KeeƁ 18:1-17)1 Fahfal ah David ik Filistien, joŋ ra wuu syellele, David nyiŋ yaŋ maluu jol Filistien.
2 So ik Moabien ta. Joŋ ra swah ge sǝŋ, a kee za sai, a woo gin gŋ gwa ik ga lalle. Moabien so ciŋra byak sǝǝ gǝraama nyi David.
3 So David i Hadadezar we Rehoɓ goŋ Zoba ne cok ka tǝ ga nyiŋ sǝr goŋ ah matãa kah el Efrat. 4 David gbah za pǝr 1.700 ne mǝǝna 20.000. David cee gah pǝr ma kwak muŋta sal daŋ, sai soɓ pǝr ma nǝn kwak muŋta sal temere vaŋno to.
5 Sirien ma yaŋ Damaskus gera ka gbah jol Hadadezar goŋ Zoba, amma so David ik za kǝsyil Sirien 22.000. 6 So David rǝk za byak cok pǝ Siria ma Damaskus daŋ, Sirien so ciŋra byak David, a sǝǝra gǝraama nyi ko. Pǝ cok daŋ David moo ga gŋ, Dǝblii soɓ ko kaa kacella. 7 David woo bal sal vãm kaŋnyeeri za yeɓ Hadadezar kal ge yaŋ Jerusalem ne ko. 8 Betak ne Berotai ye yaŋ maluu pǝ sǝr Hadadezar, so goŋ David woo vãm syẽ gŋ pǝlli ta.
9 Ne cok Toi goŋ Hamat mo laa David ik za sal Hadadezar tǝɗe', 10 Toi pee nan ah Yuram ge wo goŋ David ka haozah wol ah tǝkine joŋ osoko nyi, mor ruu sal ne Hadadezar so nĩi ko ɓe ta. Mor Hadadezar a ruu sal ne Toi cẽecẽe. Yuram ge ne vãm solai ne vãm kaŋnyeeri tǝkine vãm syẽ mor jolle. 11 So goŋ David nǝǝ vãm ah mor yeɓ Dǝɓlii, tǝgbana mai mo nǝǝ vãm solai ne vãm kaŋnyeeri ma kǝpel mai moo woo jol za mai mo nĩi ra daŋ, 12 ne mǝ Edomien, Moabien, Ammonien, Filistien, ne Amalekien, tǝkine fan ma lwaa zah sal mai mo nyiŋ jol Hadadezar.
13 Ne cok David mo ge ik Edomien pǝ el Tǝm ujenere jemma tǝtǝl nama, so mo pii soo ge yaŋ, tǝɗii ah zooni. 14 So rǝk za byak cok pǝ sǝr Edom daŋ. Edomien ciŋra byak sǝǝ gǝraama nyi David. Pǝ cok daŋ David moo ga gŋ Dǝɓlii soɓ ko kaa kacella.
15 David kaa goŋ tǝ za Israel daŋ, joŋ fan sãh tǝkine ŋgoŋ kiita matǝ goŋga tǝ zan ah daŋ. 16 Joaɓ we Seruja ye dǝɓlii salle, Yusafat we Akilut ye wajiiri. 17 Sadok we Akitoɓ ne Abiatar we Akimelek za joŋzahsyiŋ ye ra, Seraja pa ŋwǝǝ fan o. 18 Benaja we Jehojada ye dǝɓlii za ma byak David, Keretien ne Peletien. Wee David laŋ ara ye za joŋzahsyiŋ ta.
© Bible Moundang © Alliance Biblique du Tchad, 1996.
