Haozah woli
1 Ame Paulus, Silas, ne Timoteus, ru pee leetǝr mai wo eklesia yaŋ Tessalonika, mai mo ye mǝ Masǝŋ Pa mana, ne Dǝɓlii Yesu Kristu.
2 Masǝŋ Pamme, ne Dǝɓlii Yesu Kristu mo joŋ gboŋgboŋ wo ɓii tǝkine nyi jam nyi we.
Kiita ma ne cok gin Kristu
3 Wee pamme, a wo ɓuu na doole, ne cok daŋ ru yea ma ne joŋ osoko nyi Masǝŋ tǝ ɓǝ ɓiiri. A pǝsãh ka ru joŋ naiko, mor iŋ ɓii tǝ ga pel pǝlli, tǝkine 'yah mai wee 'yah ki ne ko tǝ ga pel pǝ'manne. 4 Mor ahe, aru tǝ yii suu ne ɓǝ ɓii pǝ eklesia Masǝŋ daŋ. Mor we uu ɓo pǝswah tǝkine iŋ ɓii kǝsyil bone daŋ, ne mai mo tǝ foora mor ɓii we tǝ rõm gŋ.
5 Ɓǝ ah cuu njaŋ kiita Masǝŋ ɓo, mor ka we gak kii nǝn pǝ koŋ dan Goŋ Masǝŋ mai we tǝ laa bone mor ahe. 6 Mor Masǝŋ a ga joŋ ɓǝ ah pǝsãhe, a ga soo za ma cuura bone nyi we ne bone ta. 7 A ga nyi 'yak nyi we za ma laa bone tǝkine ru. A ga joŋ nai ne cok mai Dǝɓlii Yesu moo ga gee coksǝŋ ge ne angeloi ah maswahe, 8 ne mabǝlaowii mor jolle, mor ka ŋgoŋ kiita tǝ za mai mo tǝra Masǝŋ ya, tǝkine za mai mo zyii ka syeera mor Ɓǝ'nyah Dǝɓlii man Yesu ya. 9 A ga lwaara kiita magaɓ ma muŋ ɓǝǝ ga lii, a ga woŋra ne Masǝŋ tǝkine yǝk ah ma'man daŋ pǝɗǝkki. 10 Ne cok zah'nan mai moo ga ge ne ko, za mǝ ah daŋ a ga yiira ko, a ga yea pǝyǝk pǝzyil za mai mo nyiŋ ko ɓo daŋ. Awe laŋ we ga yea kǝsyil ɓǝǝ ta, mor we nyiŋ ɓǝ mai ru cuu nyi we ɓe.
11 Mor ahe, cẽecẽe ru juupel mor ɓiiri, ru fii Masǝŋ man mor ka mo joŋ we kii nǝn pǝkoŋ ɗii ah mo ɗii we ɓo ka syeeni, ru pǝǝ ko ka mo joŋ we ne swah ah ka we baa cyõ ne 'yah joŋ fan sãhe, ka mo joŋko yeɓ iŋ ɓii vǝr tǝ fahlii masãhe. 12 Mor ne fahlii mai we ga yii tǝɗii Dǝɓlii man Yesu pǝyǝkki, so we ga yea pǝyǝk wol ahe, mor gboŋgboŋ Masǝŋ mana ne Dǝɓlii Yesu Kristu.
© Bible Moundang © Alliance Biblique du Tchad, 1996.
