Dǝɓ Ma Ŋwookyaŋ
1 Ru pǝǝ we, wee pa ɓuuru, mor ɓǝ gin Dǝɓlii man Yesu Kristu, ne mai mo tǝ ga tai na wol ahe, 2 we soɓ ɓǝ foo ɓii kiŋ tǝtǝl nyi we ne ɓǝ ah gwari nai sǝ ka, wala ne ɗuu gal ka faa zah'nan gin Dǝɓlii ge ɓe ka - koo dǝɓ ki mo tǝ faa ŋ zye lwaa ɓǝ ah gin wo Masǝŋ, koo pǝ ɓǝ cuuni, koo ne faa aru ye ŋwǝǝ ɓǝ ah ɓo nyi we pǝ leetǝr daŋ. 3 We soɓ za joŋ tǝgwĩi ne we koo ne fahlii fẽene ka. Mor zah'nan ah ka ge ya ba, sai ɓǝ ŋwookyaŋ malii ah ma fahfal tǝ lii a ge kǝpel ɗǝ, tǝkine Dǝɓ Ma Ŋwookyaŋ mai ɓǝ muŋ ah mo kan ɓo kǝpelle. 4 A ga cak ɓǝ fẽene fẽene daŋ mai dǝfuu mo tǝ juupel wol ahe, tǝkine fan mai daŋ dǝfuu mo tǝ kwan na masǝŋ. A ga ɓaŋ suu ah yii ga sǝŋ tǝtǝl ɓǝǝ daŋ, ŋhaa a ga dan ga ɓǝr yaŋ Masǝŋ a kaa gŋ, a ga joŋ suu ah na Masǝŋ.
5 We foo ɓǝ ah me faa nyi we ne cok me yea wo ɓii ya ne? 6 Fan ma cak gin ah zǝzǝ̃ǝ a no, awe tǝ fan ah laŋ ɓe. Dǝɓ Ma Ŋwookyaŋ a ga ge ne cok ah mai mo cuu ɓo. 7 Mor swah ɓǝ tǝsyeɓ ɓǝɓe' tǝ joŋ o, amma fan mai mo tǝ ga joŋ, ka joŋ ya ba, sai ka dǝɓ ma cak ah tǝɓ ge lal nǝkah ɓe. 8 So Dǝɓ Ma Ŋwookyaŋ a ga ge, Dǝɓlii Yesu ga i ko pǝ wul ne tǝ'yak pǝ zah ahe, a ga muŋ ko ne yǝk ah mai moo ga ge ne ko ne cok gin ahe. 9 Dǝɓ Ma Ŋwookyaŋ a ga ge ne swah Satan, a ga joŋ dǝǝbǝǝri camcam ne yeɓ matǝ gǝriŋ ah tǝkine ber ma'man ahe. 10 A ga joŋ zahban ɓǝɓe' camcam mor ka zyak za mai moo ga muŋra ne ko. A ga muŋra, mor zyii 'yahra ka nyiŋ goŋga ka ǝ̃ǝ ne ya. 11 Mor ah Masǝŋ ga pee swah ma zyak za fahlii ka mo joŋ yeɓ pǝ zahzyil ɓǝǝra, mor ka mo nyiŋra ɓǝ berre. 12 Amma ka za mai mo nyiŋra goŋga ya, moo laara pǝ'nyah ne ɓǝɓe' daŋ, a ga ŋgoŋ kiita tǝ ɓǝǝra.
Masǝŋ syen we ɓo ka we ǝ̃ǝ
13 Wee pa ɓe, cẽecẽe ru joŋ osoko nyi Masǝŋ mor ɓiiri, awe za mai Dǝɓlii mo tǝ 'yah we. Mor Masǝŋ syen we ɓo kǝpelle, ka we yea tǝgbana za ma ǝ̃ǝ ah ne swah Tǝ'yak Matǝdaŋdaŋ mai mo joŋ we ɓo na za Masǝŋ ne nyiŋ ɓǝ goŋga. 14 Masǝŋ ɗii we ɓo mor ah ne Ɓǝ'nyah mai ru cuu ɓo nyi we, ɗii we ɓo ka we yea ne faren pǝzyil yǝk Dǝɓlii man Yesu Kristu. 15 Mor ahe, wee pamme, we uu pǝswahe, we gbǝ ɓǝ goŋga mai ru cuu nyi we, mai we laa zah ɓuuru, ne mai we lwaa pǝ leetǝr ɓuu daŋ.
16 Dǝɓlii man Yesu Kristu ne suu ahe, ne Masǝŋ Pa man mai mo 'yah na, joŋ gboŋgboŋ, nyi rõm nyi na pǝlli tǝkine byak fan masãhe, 17 mo nyiko zahzyil ma rõm fan nyi we pǝlli, ka mo so nyi swah joŋ fan wala faa ɓǝ masãh ah nyi we.
© Bible Moundang © Alliance Biblique du Tchad, 1996.
