Sooje Yesu Kristu masãhe
1 Amo, we ɓe, mo swaa suu ɓo ne gboŋgboŋ mai Masǝŋ mo joŋ ɓo wo man ne tai ki ne Yesu Kristu. 2 Mo gbǝ ɓǝ mai mo laa me cuu pel za syedowal pǝpãare, mo cuu ɓǝ ah wo za matǝ goŋga mai moo gak cuura ɓǝ ah nyi za ki ta.
3 Mo laa bone tǝgbana sooje Yesu Kristu masãhe. 4 Sooje mo tǝ joŋ yeɓ ɓe, a 'yah ka joŋ fan ma 'nyah suu dǝɓlii ahe, ka maa zah pǝ yeɓ za tǝgǝǝ yaŋ ya. 5 Pa ma lii zah maɗul ka gak lwaa soo ah ya, sai ka ɗuu tǝgbana ɓǝ lai ah mo cuu ɓo ɓe. 6 Pa pǝpǝǝ mai moo gaɓ ne yeɓ 'wah ahe, ako yee ren fakpãhpǝǝ ah kǝpelle. 7 Sai mo tǝ mor ɓǝ mai me tǝ faani, mor Dǝɓlii ga joŋ mo ka mo gak tǝ mor ɓǝ daŋ.
8 Mo foo ɓǝ Yesu Kristu mai mo ur gin pǝ wulli, morsǝ̃ǝ David yo, tǝgbana ɓǝ ah mo faa ɓo pǝ Ɓǝ'nyah mai me tǝ cuuni. 9 Mor me tǝ cuu Ɓǝ'nyah maiko, tǝ cuura bone nyi me mor ahe, ŋhaa gaara me ɓo tǝgbana pa faɓe', amma ɓǝ faa Masǝŋ ka gak gaa ya. 10 Mor ah me tǝ rõm fan daŋ mor za mai Masǝŋ mo syen ra ɓo, mor ka ara laŋ mo lwaara ǝ̃ǝ mai mo ge ne Yesu Kristu tǝkine yǝk ah ma ga lii. 11 Ɓǝ marai goŋga yo:
Na wuk ne ki ɓe, na ga yea ne cee ne ki ta.
12 Na uu pǝswah ɓe, na ga kaa goŋ ne ki ta.
Na ɓoo ko ge lal ɓe, a ga ɓoo na ga lal ta.
13 Na ye ka za tǝ goŋga ya laŋ, a yea mǝ ah Dǝɓ tǝ goŋga cẽecẽe.
Mor ka gak joŋ mǝ ah ɓǝɓe' wo suu ah ya.
Dǝɓ yeɓ matǝ goŋga
14 Mo so ur ɓǝ ah wo za faɗa, mo lai ra pel Masǝŋ ka mo bǝǝra bal tǝ ɓǝ ka, ka pǝsãh ya, ɓǝ ah ka joŋ fan ki ya, sai a zyak za mai mo tǝ laara ɓǝ ah to. 15 Mo kyeɓ ne swahe, ka mo yea dǝɓ yeɓ matǝ goŋga pel Masǝŋ, tǝgbana dǝɓ yeɓ mai swãa mo ka ren ko tǝ yeɓ ah ya, mai moo cuu mor ɓǝ goŋga Masǝŋ njaŋ. 16 Mo ɗuu ɓǝ makol ma tǝgwĩi ah mai mo saaŋ ki ɓo ka ne fahlii iŋ ya, moo woŋ za ne Masǝŋ pǝɗǝkki. 17 Fan mai mo tǝ cuura a ga yea tǝgbana nwãh ma ɗii ne lwaamolii moo lǝǝ suu dǝɓ fyãkfyãk ga pelle, za cuu fan rai, Himeneus ne Filetus no kǝsyil ɓǝǝra. 18 Soɓra fahlii goŋga ɓoo ɓe, so zyakra za ma iŋ manyeeki ah gin tǝ fahlii iŋ pǝpãare, a faara ɓǝ ur pǝ wul man ge joŋ kal ɓaaɓe. 19 Amma kpii mor ah maswah ah mai Masǝŋ mo kpii ɓo ka ga laŋ ya. Ɓǝ marai ŋwǝǝ ɓo tǝtǝl ahe: Dǝɓlii tǝ za mǝ ah ɓe. Koo zune mo faa azye mǝ Dǝɓlii ɓe, sai mo soɓko joŋ faɓe'. Fanpee camcam
20 Ɓǝr yaŋ malii ah fan pee ma vãm kaŋnyeeri ne ma vãm solai ah ye ka yea gŋ to ya, amma ma ne kpuu ah ne ma ne vuu daŋ a yea ma gŋ ta, maki ah ra zah'nan joŋ yeɓ ah a ge ginni, maki ah ra laŋ a mor ka joŋ yeɓ cẽecẽe. 21 Koo zune mo tǝ byak suu ah wo ɓǝɓe' marai me tǝ faa ɓǝ ah daŋ ɓe, a ga yea mor joŋ yeɓ matǝ kpik ah cam sǝ, mor nǝǝ suu ah kan ɓo ka joŋ mor dǝɓlii ahe, zyeɓ kan ɓo mor ka joŋ yeɓ masãh ah daŋ. 22 Mo ɗuu cwaa fan tǝbanna, mo kyeɓ njaŋ, ne iŋni, 'yahe, tǝkine jam, ne za ma zahzyil sãh mai moo ɗiira Dǝɓlii ka gbah jol ɓǝǝra. 23 Amma mo soɓ syel ma tǝgwĩi ah ma bai mor ahe, mor mo tǝ ɓe, in zah ah a vǝr ne balle. 24 Dǝɓ yeɓ Dǝɓlii ka bǝǝ bal a. Amma sai a yea na pa 'yah za daŋ, a gak cuu fanne, tǝkine rõm ɓǝ. 25 A gak cuu ɓǝ ne yella wo za mai moo faara ɓǝɓe' tǝl ahe, ɗah maki Masǝŋ ga nyi fahlii nyi ra no ka mo toora bii ka so syeera mor goŋga ah ne? 26 Mor ka mo soɓra ɓǝ foo ɓǝǝ mo wǝǝra suu ɓǝǝ gin pǝ mǝmmǝǝ mai Satan mo gbah ra ɓo ne ko, ka mo so joŋra 'yah Masǝŋ.
© Bible Moundang © Alliance Biblique du Tchad, 1996.
