Petar kee ɓǝ yeɓ ah pel eklesia yaŋ Jerusalem
1 Zapee ne wee pam ma sǝr Yudea daŋ laara za mai mo ye ka Yahuduen a nyiŋra ɓǝ Masǝŋ ɓe. 2 Ne cok Petar mo ge yaŋ Jerusalem, Yahuduen ma iŋ ah urra ɓǝ ne ki, 3 faara: Amo ge yaŋ za mai mo daara kan a, mo so re laŋ fan ne ra ta. 4 So Petar kee mor ɓǝ fan mai mo joŋ ɓo daga tǝtǝŋ ah ŋhaa vǝr ah nyi ra, faa:
5 Ka me no yaŋ Joppe me tǝ juupelle, ne cok ah me tǝ suu ɓe ya, tǝgbana me tǝ lolomme, me kwo fan ki tǝ ɗǝr ginni, a tǝgbana godel ma'man ahe, uu ɓo ne nyah ah zahki nai daŋ, gee sǝŋ ŋhaa ge dai wo ɓe gwari. 6 Me pee nahnǝn ɓo wo fan ah me tǝ ẽere, me kwo fan ma ne ɓal tǝ nai ge ɓǝr ahe, nǝǝ cokki, soo, tǝkine juu daŋ. 7 Me so laa kyaŋ faa ɓǝ ge nyi me: Petar, mo ur o, mo ŋgoŋ mo re o. 8 Amma me zyii faa: Ka nai ya Dǝɓlii, mor me re fan maɓea ah wala ma ne 'nahm ah ge zah ɓe taa ya syaŋsyaŋ. 9 Kyaŋ so faa ɓǝ gin sǝŋ ge nyi me: Fan mai Masǝŋ mo faa a pǝsãhe, mo faa sõone a ne 'nahm ka. 10 Fan ah joŋ nai zahlǝŋ sai, so jin kal ge sǝŋ katãako. 11 Ne cok ah sǝ, za sai ge daira yaŋ mai me ɗǝr ɓo gŋ, peera ra gin yaŋ Kaiseria ge wo ɓe. 12 Tǝ'yak faa nyi me: Mo ur mo ge ne ra, zok gan ah mo re mo ka. Wee pam yea urra ne me, ru kal ge yaŋ Kaiseria, aru daŋ ru dan ge yaŋ Kornelius. 13 So kee nyi ru zye kwo angelos ge uu pel 'min ɓǝr yaŋ 'minni, so angelos faa nyi zye ka zye pee dǝɓ ki ge yaŋ Joppe ka ga ɗii Simon ma ɗii ne Petar gin ne ko, 14 ako ye ga faa ɓǝ mai mo ga ǝ̃ǝ ne ko ne za yaŋ ɓo daŋ nyi mo. 15 Ne cok me tǝŋ ne faa ɓǝ, Tǝ'yak Matǝdaŋdaŋ ɗǝr ge tǝ ɓǝǝ tǝgbana mai mo ge tǝ man ne tǝtǝŋ ah ta. 16 So ne cok ah me foo ɓǝ mai Dǝɓlii mo faa: Yohana joŋ baptisma ne bii, amma we ga nyiŋ baptisma ne Tǝ'yak Matǝdaŋdaŋ. 17 Masǝŋ joŋ gboŋgboŋ nyi fan nyi ra tǝgbana mai mo nyiko nyi na ne cok na nyiŋ Dǝɓlii Yesu Kristu ta. Ame ko ye zu ka me yee zah Masǝŋ ne? 18 Fahfal mo laara ɓǝ ah naiko, so faara ɓǝ ki yao, kal ne yiira Masǝŋ faara: 'Manna, Masǝŋ nyi fahlii toobii ɓo nyi za mai mo ye ka yahuduen a mor ka mo lwaara cee matǝ goŋga ta.
Eklesia yaŋ Antiokia
19 Ne cok mo ira Setefanus pǝ wulli, bone ah mo ge, joŋ za ma iŋ myahra kal ge cok camcam, za ki kǝsyil ɓǝǝ kalra ŋhaa ge daira sǝr Fǝnikia, Kiprus ne yaŋ Antiokia, amma a cuura ɓǝ Masǝŋ ga ne ko wo za Yahuduen to. 20 Ne cok ah za ki kǝsyil za ma iŋ mai mo no sǝr Kiprus ne Kirene gera yaŋ Antiokia, so faara ɓǝ ah wo za mai mo ye ka Yahuduen a ta, cuura Ɓǝ'nyah Yesu nyi ra. 21 Swah Masǝŋ no ne ra, mor ah za pǝlli nyiŋra ɓǝ ahe, gera wo Dǝɓlii.
22 Za eklesia yaŋ Jerusalem laara ɓǝ ahe, so peera Barnabas kal ge Antiokia. 23 Ne cok mo ge dai gŋ, kwo Masǝŋ ẽe za ma iŋ mo no gŋ ɓo, laa pǝ'nyahre, so lai ra ka mo gbǝra ɓǝ Dǝɓlii pǝ zahzyil pǝswahe. 24 Barnabas dǝɓ sãh yo, Tǝ'yak Matǝdaŋdaŋ baa ɓo zahzyil ah tǝkine iŋ daŋ. Za pǝlli gera wo Dǝɓlii.
25 So Barnabas ur kal ge yaŋ Tarsus ka ga ɗii Saulus gin ne ko. 26 Ne cok mo ge lwaa ko, so zaŋ ge yaŋ Antiokia ne ko, kaara ne eklesia ah syii vaŋno, cuura fan nyi za pǝlli. Tǝŋra ɗii za syee mor ah ne za Kristu yaŋ Antiokia kǝpelle.
27 Ne cok ah profetoen urra gin Jerusalem ge Antiokia. 28 Dǝɓ vaŋno kǝsyil ɓǝǝ a ɗii ne Agabus, ur uuni, Tǝ'yak cuu ɓǝ nyi ko, so faa: Koŋ malii tǝ ga wǝ wo sǝr daŋ. (So koŋ ah ge wǝ ne cok Kaiser Klaudius.) 29 Za syee mor ah zyeɓra ɓǝ faa koo zune kǝsyil ɓǝǝ mo nyiko fan tǝgbana moo gakko, mor ka pee fan ah ga ka gbah jol wee pam mai mo kaara ɓo sǝr Yudea. 30 Taira fan ahe, so peera ge wo zaluu eklesia sǝr Yudea ne jol Barnabas ne Saulus.
© Bible Moundang © Alliance Biblique du Tchad, 1996.
