Paulus ge yaŋ Jerusalem
1 Fahfal ru woŋ ki ne ra, ru yee dah ru zoo kal ge Kos njaŋ sǝ, tǝ'nan ah ru ge dai yaŋ Rodus, ru ur gin gŋ ru kal ge Patara. 2 Ru ge lwaa dah ma ga sǝr Fǝnikia gŋ, ru yee kal ne ko. 3 Ru syee ge kah sǝr Kiprus gwari, ru kan nahnǝn tǝl ah taa, ru pǝ̃ǝ kah kyo ah nǝfah morkǝsǝŋ ah ne dah ka ga sǝr Siria. Ru ge zyii dah yaŋ Tirus, mor dah tǝ ga ɗǝr faswaa gŋ. 4 Ru lwaa za ma iŋ gŋ, ru so kaa ne ra zah'nan rǝŋ. Tǝ'yak Matǝdaŋdaŋ faa ɓǝ nyi ra, so faara nyi Paulus ka mo geko yaŋ Jerusalem ka. 5 Ne cok zah'nan ah mo vǝr o, ru ur ɓaŋ fahlii ka ga o, urra swǝ fahlii ɓuu ne ŋwǝǝ ɓǝǝ ne wee ɓǝǝ daŋ ŋhaa pǝ̃ǝra tǝgǝǝ yaŋ ne ru ge kan lal taa. Ru daŋ ru kea ge sǝŋ zahbii ru juupelle. 6 Fahfal ah ru nyi fahlii nyi ki. Ru ur yee dahe, ara laŋ kalra ge fah yaŋ ɓǝǝra.
7 Fahlii ma syee tǝ bii ne dah vǝr ɓe, ru ur gin Tirus ru kal ge Tolemais, ru haozah wo wee pam gŋ, ru kaa ne ra zah'nan vaŋno. 8 Tǝ'nan ah ru ur kalle, ru ge dai yaŋ Kaiseria. Ru kal ge yaŋ Filip ma cuu Ɓǝ'nyahre, ru ɗǝr gŋ. Ako ye dǝɓ mai mo kǝsyil za matǝ rǝŋ mo syenra ra yaŋ Jerusalem kŋ. 9 A ne wee pǝwoi nai, kanra wǝǝ ya ba, a cuura ɓǝ faa Masǝŋ. 10 Ru nǝn gŋ zah'nan pǝpãare, ne cok ah profeto Masǝŋ maki ah gee sǝr Galile ge, a ɗii ne Agabus. 11 Ge wo ɓuuru, so ɓaŋ ganda baŋ ɓal tǝkine jol suu ah ne ko faa: Tǝ'yak Matǝdaŋdaŋ faa: Pa ganda mai Yahuduen ga baŋra ko yaŋ Jerusalem naiko, so a ga soɓra ko nyi za gwǝǝre. 12 Ne cok ru laa ɓǝ ah naiko, aru ne za ma yaŋ Kaiseria daŋ ru pǝǝ Paulus ka mo geko yaŋ Jerusalem ka. 13 Amma zyii faa: We yeyee ne kyeɓ ka nǝǝ zahzyil nyi me mor fẽene? Me zyeɓ suu ɓe kaa ɓo ne ka mo baŋra me to ya, amma koo ka me wǝ yaŋ Jerusalem mor tǝɗii Dǝɓlii Yesu ta. 14 Ru gak yee zah ah ya, ru so soɓ pǝǝ ko ne ɓǝ ah o, ru faa: Fan ah mo joŋ na Dǝɓlii mo 'yahe.
15 Fahfal zah'nan mai ru kaa gŋ, ru zyeɓ fan ɓuu ru ur ka ga Jerusalem. 16 Za syee mor ah manyeeki yaŋ Kaiseria swǝra fahlii ɓuu ge, zaŋra ru ge yaŋ dǝɓ ki ne ka ru ɗǝr gŋ, a ɗii ne Manason, dǝɓ sǝr Kiprus yo, nyiŋ ɓǝ Masǝŋ ɓo ɓaaɓe.
Paulus ge ẽe Yakuɓ
17 Ne cok ru ge dai yaŋ Jerusalem, wee pam nyiŋra ru ne ɓǝ 'nyahre. 18 Tǝ'nan ah Paulus kal ge wo Yakuɓ ne ru, zaluu eklesia daŋ gŋ. 19 Paulus haozah wo ɓǝǝra, so kee ɓǝ fan mai Masǝŋ mo joŋ kǝsyil za mai mo ye ka Yahuduen a ne yeɓ ah vaŋno vaŋno daŋ nyi ra. 20 Ne cok mo laara ɓǝ ah naiko, yiira Masǝŋ. So faara nyi Paulus: Naa pa ɓuuru, mo tǝ ɓe, Yahuduen ujenere pǝlli nyiŋra ɓǝ Yesu ɓo, so ara daŋ gbǝra ɓǝ lai ɓo ne swahe. 21 Ge faara nyi ra mo tǝ cuu nyi Yahuduen mai mo kaara ɓo kǝsyil za ki daŋ mo soɓra syee mor ɓǝ lai Mosus, mo faa nyi ra mo daara kan nyi wee ɓǝǝ ka, mo syeera mor zah fan joŋ Yahuduen ka ta. 22 A joŋ ɗǝne? Mor a ga laara belbel mo ge ɓo. 23 Mo joŋ tǝgbana mai ru tǝ ga faa nyi mo. Ru no ne za nai haara zah ɓo tǝ fanne. 24 Mo ɗii ra ka mo ge tai ne ra ne cok vãh suu ɓǝǝra, mo soo tǝtǝl ɓǝǝ mor ka mo sõora tǝtǝlli. Nai ɓe za daŋ a ga tǝra, ɓǝ mai mo ge faara tǝtǝl ɓo daŋ goŋga ye ka, amma amo ne suu ɓo mo tǝ syee na ɓǝ lai Mosus. 25 Amma mǝ za mai mo ye ka Yahuduen a mo nyiŋra ɓǝ Masǝŋ ɓo, ru ŋwǝǝ leetǝr wo ɓǝǝ ka faa ɓǝ mai ru zyeɓ ɓo nyi ra: mo rera nǝǝ ma joŋ syiŋ wo masǝŋ ki ra ka, mo rera syim ka, mo rera nǝǝ fan mai fan mo kokõo ɓo ka, mo byakra suu ɓǝǝ wo ɓǝ joŋ ɓǝǝre. 26 Tǝ'nan ah ne zah'nan Paulus ɗii zan ah ge vãh suu ah ne ra. Fahfal ah so kal ge pǝ yaŋ Masǝŋ, cuu zah'nan vãh suu moo ga vǝr ne ko, ŋhaa ka dai cok mai mo ga joŋra syiŋ mor ɓǝǝ vaŋno vaŋno daŋ ne ko.
Gbǝra Paulus pǝ yaŋ Masǝŋ
27 Zah'nan rǝŋ ah tǝ yah ka vǝr o, Yahuduen ma sǝr Asia kwora Paulus pǝ yaŋ Masǝŋ, kǝǝra zahzyil sye za daŋ ge gbǝra ko, 28 ɓyaŋra ɓǝ faara: Za Israel, we ge gbah jol ɓuu sa! We ẽe dǝɓ mai a kyãh cok daŋ a faa ɓǝɓe' tǝ za Israel ne ɓǝ lai Mosus tǝkine yaŋ Masǝŋ mai daŋ. So ɗah zǝzǝ̃ǝ faɗa woo za Grek dan ge pǝ yaŋ Masǝŋ ne ɓeɓ cok matǝdaŋdaŋ mai ne ko. 29 (Faara nai mor kwora Paulus kǝpel tǝgǝǝ yaŋ ne Trofimus ma yaŋ Efesus, lǝŋra Paulus dan ge pǝ yaŋ Masǝŋ ne ki ɓe). 30 Ɓǝ ŋwaa tǝgǝǝ yaŋ ne lii ah daŋ, za ɗuura gin dahgbil daŋ ge. Gbǝra Paulus pǝ yaŋ Masǝŋ, kwakra ko pǝ̃ǝ ge lal ne ko, so coora zahfah ah ge gŋ gwari. 31 So tǝ kyeɓra ka in Paulus pǝ wulli, ɓǝ ah ge dai swah kul sooje Romanen faa: Za ur ɓǝ ɓo yaŋ Jerusalem ne lii ah daŋ. 32 Ne pel gwari sǝ, swah sooje ɗii sooje maluu ne sooje mapãa ah daŋ ɗuu kal ge wo za ne ko. Ne cok za mo kwora swah sooje ne sooje mapãa ahe, soɓra in Paulus. 33 So swah sooje syee ge wo Paulus gbǝ ko, so faa mo ɓaara celeelu nyi gwa. Fahfal ah so fii: Azu ye dǝɓ mai sye ne? Joŋ fẽe ɓo ne? 34 Amma a kǝsyil zana, za ki ɓyaŋ ɓǝ faa naino, za ki laŋ faara ga cam. Swah sooje gak laa goŋga ah kǝsyil ɓǝ gaŋ ah mo gaŋra ɓo ya, so faa mo zaŋra Paulus ge pǝ kaŋ sooje ne ko. 35 Ne cok Paulus mo ge dai zah pah ne ra, sooje so ɓaŋra ko ɓaŋ jol ɓǝɓe' mai za mo tǝ joŋra ko. 36 Mor za daŋ a ɓyaŋra ɓǝ syee mor ah ne ko: I ge lalle.
Paulus faa ɓǝ ka wǝǝ suu ahe
37 Ne cok mo tǝ yah danra ga pǝ kaŋ sooje ne Paulus, so fii swah sooje faa: Mo gak soɓ me faa ɓǝ nyi mo no ne? Swah sooje so fii ko: Mo tǝ zah Grek ɓe ne? 38 Amo ye ka dǝɓ sǝr Egiɓ mai mo ur ɓǝ pǝnaa mo woo za kaafuu ujenere nai kal ge cok ne kŋ ya ne? 39 Paulus zyii faa: Ame ye Yahuduyo, me byaŋ yaŋ Tarsus sǝr Kilikia, ame ye we ma yaŋ malii ahe. Me pǝǝ mo, mo nyi fahlii nyi me ka faa ɓǝ nyi za ɗao. 40 So swah sooje nyi fahlii nyi ko. Paulus uu zahpahe, kǝ̃ǝ jolle. So za daŋ yeara zahe. Paulus so tǝŋ faa ɓǝ nyi ra ne zah Yahuduen .
© Bible Moundang © Alliance Biblique du Tchad, 1996.
