Petar ne Yohana pǝ cok kiita
1 Ne cok Petar ne Yohana mo tǝ faara ɓǝ nyi zana, za joŋzahsyiŋ ne dǝɓlii za ma byak yaŋ Masǝŋ tǝkine Sadusien ge daira. 2 Ɓaŋra kpãh tǝ zapee matǝ gwa ko, ka fẽe tǝ cuura ɓǝ nyi za Yesu ur gin pǝ wul ɓe sye ne, a fẽe ye mai mo tǝ faara za ga ur pǝ wul sye ne? 3 Gbahra Petar ne Yohana rǝk ge daŋgai ŋhaa ka zah'nan mo cee ɗao, mor ne cok ah ka lil joŋ ɓe. 4 Ne cok ah za pǝlli kǝsyil za ma laara ɓǝ cuu Petar nyiŋra ɓǝ ahe, pãa za ma iŋ ah ɓoo ge pel tǝgbana ujenere dappe.
5 Tǝ'nan ah ne zah'nan zaluu Yahuduen ne zaluu tǝsal ɓǝ tǝkine za cuu ɓǝ lai taira yaŋ Jerusalem. 6 Zan ah mo taira gŋ, Annas pa joŋzahsyiŋ malii, Kayafas, Yohana ne Aleksandǝr, tǝkine za mai ara mo morsǝ̃ǝ pa joŋzahsyiŋ malii daŋ. 7 Ge zaŋra zapee ge uura pel ɓǝǝra, so fiira ra faa: Ne swah zu tǝkine ɗii zu we tǝ joŋ fan mai sye kpak ne? 8 Petar mai Tǝ'yak Matǝdaŋdaŋ mo baa ɓo zahzyil ah faa nyi ra: 9 Zaluu pel za tǝkine zaluu tǝsal ɓǝ fiira ru tǝ'nah tǝ ɓǝ sãh mai mo joŋ ɓo wo dǝɓ mai mo yea kur ɓo, ŋ dǝɓ ah lwaa laɓ sye kpak ɗǝne? 10 Pǝram awe daŋ we tǝ, tǝkine za Israel mapãa ah daŋ: dǝɓ mai uu ɓo pel ɓii ne suu ah jam mor swah tǝɗii Yesu Kristu ma yaŋ Nazaret mai we ɓaa ge wo kpuu, so Masǝŋ ur ko gin pǝ wulli. 11 Yesu ako ye Dǝɓ mai Ɗerewol mo faa tǝl ahe:
Tǝsal mai awe za ma vuu yaŋ we ɓoo ge lalle,
So jin ciŋ tǝsal mayǝk ah ɓo.
12 Sai dǝɓ lwaa ǝ̃ǝ ne ki to, mor Masǝŋ cuu tǝɗii dǝɓ ki nyi na wo sǝr nyee ka na lwaa ǝ̃ǝ ne ya.
13 Ne cok za mai mo taira ɓo mo kwora swah zahzyil mai Petar ne Yohana mo ne ko, so kaara tǝ ɓǝ ah gǝriŋ, mor tǝra ɓe, ara na za pãa daŋ, feera lekol a. So tǝra pǝ zahzyil ɓǝǝra, ara ye za mai mo yea tǝ syeera ne Yesu. 14 Amma mo so kwora dǝɓ mai mo laɓ ɓo uu ɓo kah ɓǝǝra, so tǝra ɓǝ ki ka faa ya. 15 So faara nyi ra mo pǝ̃ǝra pǝ cok tai ge lalle, so haira faa ɓǝ tǝgǝǝ ɓǝǝra. 16 Faara: Na ga joŋ za mai ɗǝne? Mor za mai mo kaara ɓo yaŋ Jerusalem daŋ tǝra ɓǝ dǝǝbǝǝri malii mai mo joŋra ɓo belbelle, na ka gak fofoo tǝ ɓǝ ah laŋ ya. 17 Amma ka ɓǝ ah mo myah ge pel kǝsyil za ka, na cak ra ne swahe, ka mo faara ɓǝ nyi koo zune pǝ tǝɗii Yesu ka. 18 So ɗiira ra ge pel ɓǝǝ faara nyi ra: We soɓ fahlii faa ɓǝ tǝkine cuu fan pǝ tǝɗii Yesu tǝɗe'.
19 Amma Petar ne Yohana zyiira faa nyi ra: We ŋgoŋ kiita ah ne suu ɓii ɗao, a pǝsãh pel Masǝŋ ka ru laa zah ɓii kal zah Masǝŋ ne? 20 Amma aru, ru ka gak soɓ faa ɓǝ tǝ fan mai ru kwo ne mai ru laa ɓo ya. 21 So za mai mo taira ɓo laira ra ne swahe, so wǝǝra ra myahe. Lwaara fahlii ka ŋgoŋ kiita tǝ ɓǝǝr a, mor za daŋ tǝ yiira Masǝŋ tǝ ɓǝ fan mai mo joŋ ɓo. 22 Mor dǝɓ mai dǝǝbǝǝri ah mo joŋ ɓo wol ah mo laɓ ɓe joŋ syii ɓo kal jemma nai ɓe.
Juupel za ma iŋni
23 Ne cok mo wǝǝra ra myahe, Petar ne Yohana kalra ge wo za ɓǝǝra, so keera ɓǝ mai zaluu za joŋzahsyiŋ tǝkine zaluu tǝsal ɓǝ mo faara daŋ nyi ra. 24 Ne cok mo laara ɓǝ ah naiko, ara daŋ juura pel wo Masǝŋ ne zahzyil vaŋno faara: Dǝɓlii, amo ye joŋ sǝŋ ne sǝrri ne mabii tǝkine fan mai mo gŋ daŋ.
25 Mor amo ye faa ɓǝ ne Tǝ'yak Matǝdaŋdaŋ ne zah dǝɓ yeɓ ɓo pa ɓuu lii David:
Za sǝr urra ɓǝ ne yii suu mor fẽene?
Za gbǝra zah ɓo tǝ ɓǝ kol mor fẽene?
26 Za goŋ wo sǝr zyeɓra suu salle,
Zaluu taira zah wo ki tǝ Dǝɓlii tǝkine
Dǝɓ mai mo syeeko nǝm tǝl ahe.
27 Goŋga yo, mor pǝ yaŋ mai Herodes ne Pontius Pilatus taira ki ne za gwǝǝ tǝkine za Israel daŋ tǝ Yesu Dǝɓ yeɓ ɓo matǝdaŋdaŋ mai mo nǝǝ ɓo tǝgbana Kristu. 28 Joŋra fan mai daŋ swah ɓo tǝkine 'yah ɓo mo faa ɓǝ ah ɓo daga ɓaaɓe ka joŋni. 29 Zǝzǝ̃ǝko Dǝɓlii, mo ẽe ɓǝ foo ɓe' ɓǝǝra, mo nyi fahlii nyi za yeɓ ɓo ka mo cuura ɓǝ faa ɓo ne swah zahzyil daŋ. 30 Mo ɓaŋ jol ɓo ka laɓ syemme, ka joŋ dǝǝbǝǝri tǝkine yeɓ matǝ gǝriŋ ah pǝ tǝɗii Yesu Dǝɓ yeɓ ɓo matǝdaŋdaŋ. 31 Ne cok mo juura pel vǝrri, cok mai mo taira ɓo gŋ coo gǝrgǝr, Tǝ'yak Matǝdaŋdaŋ baa zahzyil ɓǝǝ daŋ, so kal tǝ cuura ɓǝ Masǝŋ ne swahe.
Za ma iŋ a womra fan kǝsyil ki
32 Za ma iŋ daŋ a taira ki ne zahzyil vaŋno ne ɓǝ foo tǝ vaŋno, koo zune kǝsyil ɓǝǝ ka faa sõone fan 'min a mor 'min to, ka faa ya, amma fan mai mo jol ɓǝǝ daŋ a taira tǝki vaŋno. 33 Zapee joŋra syedowal tǝ ɓǝ ur Dǝɓlii Yesu pǝ wul ne swahe, so Masǝŋ ẽe yeɓ ɓǝǝ ge pel pǝlli. 34 Koo dǝɓ ma bai fan kǝka kǝsyil ɓǝǝ vaŋno ya. Za mai mo no ne 'wah tǝkine yaŋ daŋ a leara fan ne ko, so a ɓaŋra lak ah gin ne ko, 35 a nyira nyi zapee, so zapee a womra lak ah nyi zune daŋ nǝn pǝkoŋ joŋ fan ahe.
36 Yuseɓ mai mo morsǝ̃ǝ Lewi byaŋ sǝr Kiprus, zapee ɗiira ko ne Barnabas (tǝgba faa: Pa swaa zahzyil zana), 37 ɓaŋ 'wah ah lee fan ne ko, so ɓaŋ lak ah ge nyi zapee.
© Bible Moundang © Alliance Biblique du Tchad, 1996.
