YEƁ ZAPEE 9 - Bible Moundang (MUA)

Saulus toobii

1 Ne cok ah ka Saulus ne tǝ'yak ka ik za syee mor Dǝɓlii pǝ wul ba, kal ge wo pa joŋzahsyiŋ malii. 2 Ge fii ɗerewol jol ah ka ga yaŋ kee ɓǝ Masǝŋ yaŋ Damaskus ne ko, mor ɗah a ga lwaa za wǝǝ tǝkine ŋwǝǝ mai mo ɓaŋra fahlii Dǝɓlii ɓo gŋ no ne, ka gbah ra gin Jerusalem ne ko.

3 So Saulus ɓaŋ fahlii ɓo tǝ ga Damaskus, ge dai kah yaŋ ah gwari ɓe, ne pel sǝ cokfãi gee sǝŋ ge sǝǝ tǝtǝl ahe. 4 Lee ge sǝŋ, so laa kyaŋ faa ɓǝ nyi ko: Saulus, Saulus, mo foo mor ɓe mor fẽene? 5 So Saulus fifii faa: Amo ye zune Dǝɓlii? Kyaŋ so zyii ɓǝ faa nyi ko: Ame ye Yesu mai mo tǝ foo mor ahe. 6 Amma mo ur o, mo ge yaŋ Damaskus, a ga faara ɓǝ fan mai ka mo joŋ nyi mo gŋ ba. 7 Za mai mo tǝ gara mor ki ne Saulus daŋ uura sortǝ faara ɓǝ ki ge zah vaŋno ya, a laara kyaŋ no, amma kwora dǝɓ ya. 8 Saulus ur sǝŋ gbǝr nahnǝnni, amma gak kwan cok ya. So gbǝra jol ah zaŋra ko kal ge yaŋ Damaskus ne ko. 9 Gak kwo cok ya zah'nan sai, re fan a, zwǝ bii ya ta.

10 Dǝɓ syee mor Masǝŋ no yaŋ Damaskus a ɗii ne Ananias, Dǝɓlii ge faa ɓǝ nyi ko ne lomme, faa: Ananias. Ananias zyii faa: Ame nyẽeno Dǝɓlii. 11 So Dǝɓlii faa nyi ko: Mo ur zǝzǝ̃ǝko mo ɓaŋ fahlii mai moo ɗii ne Fahlii Matǝ sǝraŋ, mo ge yaŋ Yudas ka mo fii dǝɓ yaŋ Tarsus no gŋ a ɗii ne Saulus, mor zǝzǝ̃ǝko tǝ juupelle. 12 So pǝ lomme Saulus kwo dǝɓ ma ɗii ne Ananias dan ge wol ah yaŋ, kan jol tǝl ah ka mo so kwoko cokki. 13 Ananias zyii faa: Dǝɓlii, me laa ɓǝɓe' dǝɓ mai moo joŋ wo za ɓo yaŋ Jerusalem zah za pǝlli. 14 Ge ɓo nyee laŋ zaluu za joŋzahsyiŋ nyira swah ɓo nyi ka mo ge gbahko za ma ɗiira tǝɗii ɓo daŋ. 15 Amma Dǝɓlii faa nyi ko: Mo gyo, mor me nǝǝ ko ɓo ka joŋ yeɓ ɓe, ka mo ge cuuko tǝɗii ɓe nyi za ki ne goŋ ɓǝǝra, tǝkine za Israel daŋ. 16 Me ga cuu bone mai moo ga laako mor ɓe daŋ nyi ko.

17 So Ananias ur kalle. Ne cok mo ge dai, dan ge ɓǝr yaŋ so kan jol tǝ Saulus faa nyi ko: Saulus naa pa ɓe, Dǝɓlii Yesu ye cuu suu ah nyi mo tǝ fahlii ka mo tǝ ginni, ako ye pee me ge ka mo so gak kwo cok faɗa, ka Tǝ'yak Matǝdaŋdaŋ mo baa zahzyil ɓo ta. 18 Ne cok ah sǝ, fan ki tǝgbana tǝzyee syiŋ pǝ̃ǝ gin nahnǝn ah ra ge lalle. So Saulus kal ne kwan cok sǝ, ur sǝŋ so nyiŋ baptisma. 19 So re farelle, swah suu ah ge.

Saulus cuu ɓǝ yaŋ Damaskus

Saulus kaa ne za syee mor Masǝŋ mai mo yaŋ Damaskus zah'nan nje. 20 So kal ne cuu ɓǝ Yesu pǝ yaŋ kee ɓǝ Masǝŋ sǝ, faa ako ye We Masǝŋ. 21 Za mai mo laara ɓǝ ah daŋ a kaara tǝl ah gǝriŋ, so a fiira fii: Dǝɓ mai mo yea tǝ cuu syak nyi za ma ɗiira tǝɗii Yesu yaŋ Jerusalem kŋ ye ka ne? Ge ɓo ka nyee ka gbah za syee mor ah ga nyi zaluu za joŋzahsyiŋ ne ya ne?

22 Amma Saulus a cuu ɓǝ ga pel ne swah zah'nan daŋ ŋhaa ɓoo bii zah Yahuduen mai mo kaara ɓo yaŋ Damaskus, a cuu nyi ra Yesu ako ye Kristu, ka so tanra ru zyii zah ah ɗǝne laŋ ya.

23 Fahfal ah ka zah'nan pǝ̃ǝ kal pǝpãa ɓe, so Yahuduen zyeɓra ɓǝ ka in Saulus pǝ wulli. 24 Amma so Saulus laa ɓǝ faa ɓǝǝra. A kaara byak ko zahfah yaŋ com ne suŋ daŋ mor ka in ko pǝ wulli. 25 Amma comki ne suŋ za syee mor Saulus lal ɓaŋra ko pǝ kee yee tǝ korvuu ne ɗǝr ge sǝŋ ne keere.

Saulus ge yaŋ Jerusalem

26 Ne cok Saulus mo ge dai yaŋ Jerusalem, kyeɓ ka tai ne za syee mor Kristu mai mo gŋ. Amma ara daŋ ɗuura gal ahe, mor zyii nyiŋra dǝɓ syee mor ah ye 'manna ya. 27 Barnabas ge wol ah zaŋ ko kal ge wo zapee ne ko, so kee nyi ra: Saulus kwo Dǝɓlii tǝ fahlii, Dǝɓlii faa ɓǝ nyi ko. So faa nyi ra: Saulus cuu ɓǝ ne swah pǝ tǝɗii Yesu yaŋ Damaskus caŋryaŋ. 28 Daga cok ahe, Saulus tai ki ne ra, a kyãh cuu ɓǝ tǝgǝǝ yaŋ Jerusalem ne ra pǝ tǝɗii Dǝɓlii ne swah zahzyilli. 29 A faa ɓǝ nyi Yahuduen ma faara zah Grek, a syesyel ne ra ta. Amma so a kyeɓra ka in ko pǝ wulli. 30 Ne cok wee pam mo laara ɓǝ ahe, so zaŋra Saulus kal ge yaŋ Kaiseria ne ko, so soɓra ko pǝ̃ǝ kal ge yaŋ Tarsus.

31 Eklesia kaara jam sǝr Yudea, Galile ne Samaria daŋ, a swaara ga pelle, a ɗuura Dǝɓlii, Tǝ'yak Matǝdaŋdaŋ gbah jol ɓǝǝra, ɓoora ge pel pǝpãare.

Petar laɓ Eneas

32 Petar a kyãh pǝ sǝr ah daŋ, comki kal ge wo za ma iŋ mo kaara ɓo yaŋ Lidda, 33 ge lwaa dǝɓ ki gŋ a ɗii ne Eneas, zyak kur ko ɓo, a tǝ faswul ne syem ah syii nama ɓe ka gak ur sǝŋ ya. 34 Petar faa nyi ko: Eneas, Yesu Kristu laɓ mo ɓe, mo ur mo cẽe faswul ɓo. So Eneas ur ne pel sǝ. 35 Za yaŋ Lidda ne Saron daŋ mo kwora naiko, so nyiŋra ɓǝ Dǝɓlii.

Dorkas syemme

36 Mawin ma iŋ ah no yaŋ Joppe a ɗii ne Tabita, tǝɗii ah fer ne zah Grek Dorkas, tǝgba faa: Tǝsai. Mawin ah a joŋ yeɓ sãh cẽecẽe, a gbah jol za masyak pǝlli ta. 37 Ne cok ah syem ge gbǝ ko, wǝ ne ko. Ne cok mo erra bii nyi wul ah vǝrri, so ɓaŋra ko ge kan ɓǝr yaŋ ma sǝŋ. 38 Yaŋ Joppe ka pǝɗǝk ne yaŋ Lidda ya. Ne cok za syee mor ah ma yaŋ Joppe mo laara Petar no yaŋ Lidda, peera za gwa ge wol ah faara: Ru pǝǝ mo, mo ɗuu ge gwari sa. 39 Petar ur gwari sǝ, kal ge ne zapee ahe. Ne cok mo ge dai gŋ, zaŋra ko yee kal ge ɓǝr yaŋ ma sǝŋ ne ko, ŋwǝǝ wul daŋ ge ryaŋra ko ne yee a cuura yerri ne mbǝro mai Tabita mo cur ne cok ka a no ne cee ba. 40 Petar faa nyi za daŋ mo pǝ̃ǝra ge lalle, so kea ge sǝŋ ne zahciŋɓal juupelle. So jin nahnǝn ge wo wul faa: Tabita, mo ur o. So Tabita gbǝr nahnǝnni, ne cok mo kwo Petar, so ur kaa sǝŋ. 41 Petar so gbǝ jol ah ɓaŋ ko ur sǝŋ, so fahfal ah ɗii za ma iŋ ne ŋwǝǝ wul daŋ, zaŋ Tabita ge uu pel ɓǝǝ ne cee ah na matãa. 42 Ɓǝ ah myah yaŋ Joppe ne lii ah daŋ, za pǝlli nyiŋra ɓǝ Dǝɓlii. 43 Petar so nǝn yaŋ Joppe pǝlli, kaa yaŋ pa ṽǝŋ wak no gŋ a ɗii ne Simon.