Daniel kwo fan kah el Tigris
1 Ne syii patǝ sai ah Kirus mo kaa goŋ sǝr Persia ɓo, Daniel ma ɗii ne Beltesazar ta kwo fanne, ɓǝ fakwan ah goŋga yo, amma ɓǝ ah a pǝgaɓ ka laa mor ahe. Keera mor ɓǝ ah nyi pǝzyil fakwanne.
2 Ne cok ah ame Daniel, me syẽe fan com 'yak sai. 3 Me gak ka ren farel ma'nyah ah ga zah wala ka ren nǝǝ ya, me gak ka zwan bii lee kpuu vin a ta. Me sõm ɓǝrdi ge wo suu ɓe laŋ ya, ŋhaa com 'yak sai pǝ̃ǝ kalle.
4 Ne zah'nan jemma gwa tǝtǝl nai ne fĩi patǝ vaŋno ah pǝzyil syii ahe, ame uu ɓo kah el malii ma ɗii ne Tigris. 5 Me ɓaŋ nahnǝn ge sǝŋ, me kwo dǝɓ ki ɓoo mbǝro ɓo pǝfãi, baŋ haŋ ɓo ne ganda ma vãm kaŋnyeeri. 6 Suu ah a sãh worak worak na tǝsal ma ɗii ne kristolit. Zahpel ah a sãh tǝgbana bamme. Nahnǝn ah a tǝgbana mabǝlaowii. Jol ah ra ne ɓal ah ra a sãh tǝgbana vãm syẽ. Kyaŋ ah a cii tǝgbana za pãa ye tǝ faa ɓǝ.
7 Ame syak ɓe, me ye kwo fakwan ahe. Za mai mo ne me kwora fan ki ya, amma gal re ra pǝlli, so ɗuura kal ge mokki. 8 Soɓra me ɓoo gŋ syak ɓe, ame ẽe fakwan matǝ gǝriŋ ko, swah pee gin wo ɓe tǝɗe', zahpel ɓe fer tǝgbana mǝ wulli, dǝɓ ka gak tan me ya. 9 Ne cok me laa kyaŋ ah mo tǝ faa ɓǝ nyi me, me lee ge tǝ sǝr ɓat, me tǝ suu ɓe ya, zahpel ɓe pee ge tǝ sǝr rikrikki. 10 So me laa dǝɓ ki gbǝ me ne jolle, ɓaŋ me gin jol ne zahciŋɓal ur sǝŋ, amma ka suu tǝ coo me coo ba.
11 Angelos faa nyi me: Daniel, Masǝŋ tǝ 'yah mo, mo ur sǝŋ o, mo syii sok mo laa ɓǝ mai me tǝ ga faa. Masǝŋ pee me ge ɓo wo ɓo. Ne cok mo faako naiko, me ur sǝŋ, ka suu tǝ coo me 'wa.
12 So faa: Daniel, mo ɗuu gal ka. Masǝŋ laa juupel ɓo daga ne cok ma zahnahpel ah jaŋjaŋ mo foo ɓǝ ka wonsuu ɓo mor ka mo lwaa fatanne. Ame ge ɓo mor juupel ɓo mo juu. 13 Angelos byak sǝr Persia cak me zah'nan jemma gwa tǝtǝl vaŋno. So Mikal dǝɓlii angeloi ra ge ka gbah jol ɓe. Mor soɓra me ɓo pǝ sǝr Persia syak ɓe. 14 Me ge ɓo ka faa ɓǝ fan mai mo tǝ ga joŋ wo za ɓo pǝ zah'nan ma pel nyi mo, ka mo laa, mor ɓǝ fakwan mafuu ah tǝ ɓǝ fan mai mo tǝ ga joŋ pel o.
15 Ne cok mo faako ɓǝ naiko, me ɗǝŋ zahpel ge sǝŋ, me gak faa ɓǝ ki ge zah ya. 16 So angelos mai mo jur dǝfuu ɓo nyen jol juu tǝkpuuzah ɓe ne ko. Me so faa nyi ko: Dǝɓlii, fakwan mai ɓǝ ah joŋ me ɓo pǝtǝtǝ̃ǝre, ŋhaa suu coo mai mo tǝ coo me gak in zah ya ba. 17 Ame tǝgbana byak mai mo uu ɓo pel pah ahe, me gak faa ɓǝ ko nyi mo ɗǝne? Me ka pǝswah ya, me ka gak i tǝ'yak laŋ ya.
18 Ne pel gwari sǝ, so ɓaŋ me, me lwaa swah sǝ. 19 So faa nyi me: Masǝŋ tǝ 'yah mo, mo swaa ɓǝ ki ka, mo ɗuu gal fan ki ka ta. Ne cok mo faako naiko, me laa suu ɓe ge pǝswahe, me faa: Dǝɓlii, mo faa ɓǝ mai mo ne ka faa nyi me o. (Amo ye joŋ me ɓo tǝ laa suu ɓe pǝram zǝzǝ̃ǝko.)
20-21 So faa: Mo tǝ mor ɓǝ gin ɓe me ge ɓo wo ɓo ɓe ne? Me ge ɓo ka cuu ɓǝ mai mo ŋwǝǝ ɓo pǝ ɗerewol Matǝ Goŋga nyi mo. Zǝzǝ̃ǝko me ga jin o, me ga ruu sal ne angelos ma byak sǝr Persia. Fahfal ah angelos ma byak sǝr Grek ga ge. Pa ma gbah jol ɓe ka ga yea ya, sai Mikal angelos ma byak sǝr Israel to.
© Bible Moundang © Alliance Biblique du Tchad, 1996.
