Cok vaŋno mor juupel wo Masǝŋ gŋ
1 Zǝzǝ̃ǝko, we laa ɓǝ lai mai daŋ wee ga syee mor ah pǝ zah'nan cee ɓii we kaa ɓo pǝ sǝr mai Dǝɓlii Masǝŋ pa ɓii lii ra mo tǝ nyi nyi we. 2 Pǝ sǝr mai we tǝ ga re, we ɓeɓ cok mai daŋ zan ah moo juura pel wo masǝŋ ɓǝǝ ra gŋ tǝ waa sǝŋ, ne pǝ cok ma tǝ gee ah ra, ne ma mor kpuu maluu daŋ. 3 We hah cok joŋ syiŋ ɓǝǝ ge sǝŋ, we dah masǝŋ ki ɓǝǝ ra ma ne tǝsal ge lalle, we syak masǝŋ ki ɓǝǝ ra mai mo kpuu yo ne wii, we cee masǝŋ ki ɓǝǝ ge sǝŋ, mor ka mo so fǝ̃ǝra juupel pǝ cok ah ra faɗa kao.
4 We juupel wo Dǝɓlii Masǝŋ ɓii ne fahlii mai zai moo juura pel wo masǝŋ ki ɓǝǝ ra ka. 5 Pǝ sǝr zahban ɓii ne lii ah daŋ, Dǝɓlii ga nǝǝ cok vaŋno ka za mo ge juura pel wol ah gŋ. 6 Ka we joŋ syiŋ suŋwii ɓii ne syiŋ manyeeki ah gŋ, ka we nyi patǝ jemma fan ɓii ne fan nyi ɓii ra maki ah ra, ne fan nyi mai we faa ɓǝ ah ɓo ka nyi nyi Dǝɓlii, ne fan nyi ma ne 'yah zahzyilli, ne we dǝǝ ɓii ma byaŋ kǝpel ne mǝ gwii ɓii daŋ. 7 Ka awe ne za yaŋ ɓii daŋ we re gŋ ŋhaa pel Dǝɓlii Masǝŋ ɓii mai mo ẽe we ɓo, ka we laa pǝ'nyah ne fan sãh mai daŋ we joŋ yeɓ ahe.
8 Ga pel mai we ka gak joŋ na mai we tǝ joŋ zǝzǝ̃ǝko yao. Ŋhaa zǝzǝ̃ǝko, zune daŋ a joŋ yeɓ tǝgbana zahzyil ah mo 'yahe. 9 Mor we ɓah ka dan pǝ sǝr mai Dǝɓlii Masǝŋ ɓii mo tǝ nyi nyi we ka we kaa gŋ jam ya ba. 10 Ne cok we yee el Yordan ɓe, Dǝɓlii ga soɓ we re sǝr ah we kaa gŋ. A ga byak we wo za syiŋ ɓiiri, ka we kaa jam. 11 Dǝɓlii ga nǝǝ cok mai ka za mo ge juura pel wol ah gŋ. Ka we ge nyi fan mai me faa ɓǝ ah ɓo nyi we daŋ nyi ko gŋ: syiŋ suŋwii, syiŋ ɓii manyeeki ah ra, patǝ jemma, ne fan nyi ɓii maki ah ra, ne fan nyi mai we faa ɓǝ ah ɓo ka nyi nyi Dǝɓlii daŋ, 12 ka we laa pǝ'nyah pel ah gŋ, awe ne wee ɓii ne za yeɓ ɓii mawǝǝ ne maŋwǝǝ tǝkine Lewitien mai mo kaara ɓo pǝ yaŋ ɓii maluu camcam daŋ, mor Lewitien ara ka ne sǝr ma syak ɓǝǝ kǝsyil ɓii ya. 13 We joŋ yella, ka we ge joŋ syiŋ ɓii pǝ cok hai na mai zahzyil ɓii mo 'yah ka. 14 Sai we joŋ pǝ cok mai Dǝɓlii moo ga nǝǝ pǝ sǝr zahban ɓii maki ah vaŋno, ka we joŋ syiŋ suŋwii ɓii gŋ ŋhaa to, so ka we joŋ fan manyeeki ah ra mai daŋ me faa ɓǝ ah nyi we gŋ.
15 Amma awe no ne fahlii ka ŋgom faɓal ɓii ka ren yaŋ ɓii tǝgbana mai zahzyil ɓii mo 'yahe, we ga re nǝǝ mai Dǝɓlii mo nyi ɓo nyi we koo zune kǝsyil ɓii daŋ, dǝɓ mai Dǝɓlii moo kwan na a ne 'nahmme, ne mai mo ka ne 'nahm ya daŋ, a gak re nǝǝ ahe, tǝgbana mai wee ren nǝǝ tǝsai ne mǝ nǝǝminni. 16 Amma we re syim ah ra ka, we soɓ syim ah ɗuu ge lalle. 17 Pǝ cok mai we kaa ɓo gŋ, we re patǝ jemma sor ɓii ne bii lee kpuu vin koo ne mǝ nǝm ɓii gŋ ka. We re fan mai we nyi ɓo nyi Dǝɓlii gŋ ka: we dǝǝ ɓii ma byaŋ kǝpelle, ne mǝ gwii, wala fan nyi mai we faa ɓǝ ah ɓo ka nyi nyi ko, wala fan nyi ɓii ma nyi ne 'yah zahzyilli, wala mo fan nyi manyeeki ah ra yo daŋ. 18 Fan marai daŋ awe ne wee ɓii ne za yeɓ ɓii ra, tǝkine Lewitien mai mo kaara ɓo yaŋ ɓii ra daŋ, sai we ge re pel Dǝɓlii Masǝŋ ɓii pǝ cok mai mo nǝǝko ɓo ka juupel wol ah gŋ, ka we laa pǝ'nyah ne fan mai daŋ wee joŋ gŋ. 19 Pǝ zah'nan mai we kaa ɓo pǝ sǝr ɓiiri, we joŋ yella, ka we yaŋ Lewitien ka.
20 Ne cok Dǝɓlii mo ge joŋ sǝr nyi we pǝ'man tǝgbana mo faako ɓe, we ga re nǝǝ na mai zahzyil ɓii mo 'yahe. 21 Pǝ cok juupel matǝ vaŋno mo pǝɗǝk ne we ɓe, koo nekẽne daŋ we 'yah ɓe, we gak ŋgom dǝǝ wala gwii ɓii mai Dǝɓlii mo nyi ɓo nyi we, ka we re nǝǝ ah yaŋ ɓii tǝgbana mai me faa ɓo nyi we. 22 Koo zune kǝsyil ɓii daŋ, dǝɓ mai Dǝɓlii moo kwan na a ne 'nahmme, ne mai mo ka ne 'nahm ya daŋ, a gak re nǝǝ ah tǝgbana mai moo renko nǝǝ tǝsai ne mǝ nǝǝminni. 23 Ne cok we tǝ ren nǝǝ ah ra ɓe, we re ne syim ah ra daŋ ka, mor cee a pǝzyil syimmi, we re cee ne nǝǝ daŋ ka. 24 We re syim ka, we soɓ ɗuu ge lalle. 25 We ka tǝ ren syim ya ɓe, Dǝɓlii ga laa pǝ'nyah ne we, awe ne morsǝ̃ǝ ɓii daŋ, we ga yea ne pejii pǝ fan daŋ. 26 We woo fan nyi ɓii ra, ne fan nyi mai we faa ɓo we ga nyi nyi Dǝɓlii daŋ ge pǝ cok mai mo nǝǝko ɓo ne ko. 27 We joŋ syiŋ suŋwii tǝ cok joŋ syiŋ Dǝɓlii gŋ ŋhaako. We ŋgom fan joŋ syiŋ manyeeki ah ra, ka syim ah ra mo ɗuu tǝ cok joŋ syiŋ ah ta, ka we re nǝǝ ahe. 28 We syee mor ɓǝ mai daŋ me faa ɓo nyi we ne goŋga ɓe, awe ne wee ɓii daŋ, we ga yea ne pejii pǝ fan daŋ ga lii ga lii, mor ka we tǝ ga joŋ fan masãh ah ne ma 'nyah suu Dǝɓlii Masǝŋ ɓiiri.
Lai tǝ ɓǝ juupel wo masǝŋ ki ra
29 Ne cok we ge tǝ dan pǝ sǝr ah ɓe, Dǝɓlii Masǝŋ ɓii ga muŋ za mai mo no gŋ, we ga re sǝr ɓǝǝra, so we kaa gŋ. 30 Fahfal Dǝɓlii mo vǝr zan ah daŋ ɓe, we joŋ yella, ka we syee mor ɓǝ iŋ ɓǝǝ mo yea tǝ syeera mor ah ka. Mor a ga yea na mǝmmǝǝ wo ɓiiri, we kyeɓ ka fii sõone a juura pel wo masǝŋ ɓǝǝ sye suu ɗǝne, ka we laŋ we juupel na ma ɓǝǝ ta ka. 31 We juupel wo Dǝɓlii Masǝŋ ɓii na mai moo juura pel wo masǝŋ ɓǝǝ ka, mor pǝ cok juupel ɓǝǝ daŋ, a joŋra fan maɓe' ah mai Dǝɓlii mo syiŋ ɓǝ ah ɓo, a cwahra wee ɓǝǝ tǝ wii tǝ cok joŋ syiŋ ɓǝǝra.
32 We joŋ fan mai daŋ me faa ɓǝ ah ɓo nyi we, we ɓoo ɓǝ ki ge gŋ ka, we nǝǝ fan ki gŋ ge lal ka ta .
© Bible Moundang © Alliance Biblique du Tchad, 1996.
