Syii mai mo nǝnra kǝsyicokki
1 So na jin nǝfal na kal ge kǝsyicok ka ga fah zah mabii Syẽ, tǝgbana Dǝɓlii mo faa. Na zok ne kiŋ tǝ waa Edom pǝlli. 2 Dǝɓlii so faa nyi me: 3 We kyãh tǝ waa marai kii nǝn ah ɓe, zǝzǝ̃ǝko we ge fah kǝsǝŋ o.
4 Faa nyi me: Mo faa nyi za sye: We ga pǝ̃ǝ tǝ waa Edom pǝ sǝr wee pa ɓii morsǝ̃ǝ Esau. A ga ɗuura gal ɓiiri, amma we joŋ yella, 5 ka we ruu sal ne ra ka. Mor me ka tǝ ga nyi sǝr ah nyi we koo biŋ ya, koo ma nen kan pǝlam ɓal laŋ we ka lwaa gŋ ya. Me nyi sǝr Edom ɓo nyi morsǝ̃ǝ Esau. 6 We lee farel ne bii daŋ jol ɓǝǝ lee.
7 We foo ɓǝ mai Dǝɓlii Masǝŋ ɓii mo ẽe we pǝ fan daŋ mai we joŋni. Byak we kǝsyicok malii maiko, so pǝ syii matǝ jemma nai daŋ a no ne we. Awe lwaa fan mai zahzyil ɓii mo ne 'yah ah laŋ daŋ ta.
8 So ana urri, na cak tǝ fahlii ma ga yaŋ Elat ne Esion-Geber, ka ga nǝfah zah mabii Wulli, na jin zoo ge fahsǝŋ nǝfah kǝmorcomzah'nan ka ga nǝfah kǝ pǝ sǝr Moab. 9 Dǝɓlii so faa nyi me: We gaɓ za Moab morsǝ̃ǝ Lot ka, wala we ruu sal ne ra ka. Ame nyi yaŋ Ar ɓo nyi ra, me ka tǝ ga nyi sǝr ɓǝǝ nyi we ya. 10 (Zahban maswah ah za mawah ah ma ɗii ne Emien yea kaara ɓo yaŋ Ar. Ara pǝwah tǝgbana Anakien ta. 11 A keera ra ga tǝkine Refaimien na Anakien ta, amma Moabien a ɗiira ra ne Emien. 12 Daga ɓaaɓe Horien yea kaara ɓo sǝr Edom, amma morsǝ̃ǝ Esau ge nĩi ra, vǝr ra tǝɗe', so kaara pǝ cok ɓǝǝra. Za Israel laŋ joŋra ne za syiŋ ɓǝǝ nai ta, nĩira ra gin pǝ sǝr mai Dǝɓlii mo nyi ɓo nyi ra.)
13 So na yee el Zeret, na Dǝɓlii mo faa nyi na. 14 Ne cok na ur gin Kades-Barnea, ŋhaa ka gin yee el Zeret, ka syii joŋ ɓo jemma sai tǝtǝl nama o. Za ma nen gak ruu sal pǝ zahŋhǝǝtǝ̃ǝ ah daŋ, wukra tǝgbana mai Dǝɓlii mo faa a ga wukra. 15 Dǝɓlii joŋ ki ne ra, ŋhaa vǝr ra tǝɗe'.
16 Fahfal za ma nen gak ruu sal rai daŋ mo wukra vǝrri, 17 Dǝɓlii faa nyi me: 18 Tǝ'nahko, we ga ɓaŋ fahlii yaŋ Ar, we pǝ̃ǝ pǝ sǝr Moab kalle. 19 We ga syee kah sǝr Ammonien morsǝ̃ǝ Lot gwari, ka we gaɓ ra ka, wala we ruu sal ne ra ka, mor me ka tǝ ga nyi sǝr ɓǝǝ mai me nyi ɓo nyi ra nyi we ya. 20 (A ɗiira sǝr ah ne sǝr Refaimien, mor yea kaara ɓo gŋ. So Ammonien a ɗiira ra ne Zamzumien. 21 Ara pǝwah tǝgbana Anakien. Ara pǝpãare, ara ye zahban maswah ah ta. Amma Dǝɓlii joŋ Ammonien i zah ɓǝǝ ge lalle, so kaara pǝ cok ɓǝǝra. 22 Dǝɓlii joŋ ne Edomien morsǝ̃ǝ Esau mai mo kaara tǝ waa Edom kǝpel nai ta, ira zah Horien ge lalle, nyiŋra sǝr ɓǝǝ kaara ɓo gŋ ŋhaa tǝ'nahko. 23 Za ki ma pǝ kyo Kreta ge ikra Avimien mai mo kaara ɓo pǝ yaŋ manyee ah ra fah morkǝsǝŋ ge lal ŋhaa ge dai Gaza, nyiŋra sǝr ɓǝǝ kaara gŋ.)
24 So Dǝɓlii faa: Zǝzǝ̃ǝko, we ur we yee el Arnon. Ame soɓ Sihon Amoriyo mai mo kaa goŋ ɓo yaŋ Hesbon ne sǝr ah daŋ ge jol ɓii ɓe, we ruu sal ne ki, we nyiŋ sǝr ah o. 25 Tǝ'nahko me ga joŋ za cok daŋ a ɗuura gal ɓiiri, zune daŋ mo laa ɓǝ ɓii ɓe, suu ga cocoo ne galle.
Za Israel kaara kacella tǝ goŋ Sihon
(KeeZ 21:21-30)26 Fahfal ah me pee za gin kǝsyicok Kedemot kal ge wo Sihon goŋ Hesbon ne ɓǝ jam. 27 Me faa: Mo soɓ ru pǝ̃ǝ pǝ sǝr ɓo ɗao, ru ga syee tǝ fahlii njaŋ kalle, ru ka cak gin gŋ ga cok ki ya. 28 Ru ga lee farel ɓuu ne bii zwan daŋ lee. Fan mai ru 'yahe, ako ye mai ka ru pǝ̃ǝ pǝ sǝr ɓo, 29 ŋhaa ka ru yee el Yordan ka ga pǝ sǝr mai Dǝɓlii Masǝŋ ɓuu mo tǝ ga nyi nyi ru. Morsǝ̃ǝ Esau mai mo kaara ɓo sǝr Edom, ne Moabien mai mo kaara ɓo yaŋ Ar, nyira fahlii nyi ru, ka ru pǝ̃ǝ pǝ sǝr ɓǝǝra.
30 Amma goŋ Sihon zyii ka soɓ na pǝ̃ǝ pǝ sǝr ah ya. Dǝɓlii Masǝŋ man yer zahzyil ahe, so soɓ ko ge mor jol man na re sǝr ah tǝgbana mai we tǝ kwan tǝ'nahko. 31 So Dǝɓlii faa nyi me: Mo ẽe ɗǝ, me joŋ goŋ Sihon ne sǝr ah daŋ ɓo pǝtǝtǝ̃ǝ pel ɓiiri, we re sǝr ah we kaa gŋ o. 32 Sihon pǝ̃ǝ ne zan ah daŋ ka ruu sal ne na kah yaŋ Jahaza. 33 Amma Dǝɓlii Masǝŋ man soɓ ko ge mor jol mana, na i ko ne wee ah ne zan ah ra daŋ pǝ wulli. 34 Ne cok moo ta, na re yaŋ maluu ah ra daŋ, na ɓeɓ yaŋ ah ra, na ik za mai mo kaara ɓo gŋ za wǝǝ ne ŋwǝǝ ne wee nyee daŋ ge lalle, coŋ koo dǝɓ vaŋno ya . 35 Na nĩi faɓal yaŋ ɓǝǝra, so na woo fan mai mo no gŋ daŋ belbelle. 36 Dǝɓlii Masǝŋ man soɓ na re yaŋ maluu mo gŋ daŋ, tǝŋ daga yaŋ Aroyer nǝkah el Arnon, ne yaŋ maluu mai mo gŋ daŋ, ŋhaa ge dai sǝr Giliat. Yaŋ mai mo ne ɓaale mo gaɓ na ne ren vaŋno laŋ kǝka. 37 Amma na ge kah sǝr Ammonien gwari ya, koo kah el Jabok, koo pǝ yaŋ maluu mai mo tǝ waare, tǝkine pǝ cok maki ah ra mai Dǝɓlii Masǝŋ man mo faa nyi na, na ge gŋ ka daŋ.
© Bible Moundang © Alliance Biblique du Tchad, 1996.
