Ɓǝ lai tǝ ɓǝ syel ŋwǝǝre
1 Ne cok dǝɓ mo kan mawinni, fahfal ah mo so faako zye 'yah mawin ah yao, mor lwaa ɓǝ ma ren swãa ah ɓo wol ah ɓe, dǝɓ ah mo ŋwǝǝko ɗerewol ɓǝ syel ki ɓǝǝ nyi ko, mo nyi fahlii nyi mawin ah kalle, 2 so dǝɓ ki mo ɓaŋ mawin ah kanne, 3 dǝɓ ah mo so faa zye 'yah mawin ah yao ta ɓe, ako laŋ mo so ŋwǝǝko ɗerewol syel ki ɓǝǝ nyi ko, mo nyi fahlii nyi mawin ah kalle, wala maki wor ah patǝ gwa ah wǝwǝ ɓo, 4 ka fan ma morãi mo joŋ nai ɓe, ka wor ah ma kǝpel mo so jin kan ko faɗa kao. Mo kwoko mawin ah na a ne 'nahmme, mo so kanko mawin ah kpǝ ɓe, ka dǝɓ ah joŋ ɓǝɓe' ɓo wo Dǝɓlii. We joŋ faɓe' malii ma morãi pǝ sǝr mai Dǝɓlii Masǝŋ ɓii mo nyi ɓo nyi we ka.
Ɓǝ lai camcam
5 Dǝɓ mo kan mawin ɓo pǝfuu mo nǝn ne ya ba ɓe, mo geko sooje, wala pǝ yeɓ maki ah ka. We soɓ ko kaa yaŋ ah syii vaŋno 'wa, ka mawin ah mo laa pǝ'nyahre.
6 Ne cok we nyi val nyi dǝɓ ɓe, ka we nyiŋ nin laŋ sum ah ne tǝkǝǝnin ah kan zahwaa ah ka. We joŋ nai ɓe, ka we i ko ɓo pǝ wulli.
7 Koo zune, mo lal gbǝ naa pah ah dǝɓ Israel ne nyin mo ciŋ byak ne ko, wala mo lee fan ne ɓe, ka we i dǝɓ ah ge lal pǝ wulli. Ne fahlii mai we ga nĩi ɓǝɓe' ma morãi kǝsyil za Israel ga lalle.
8 Ne cok syem fan suu mo lwaa we ɓe, we joŋ yella, ka we joŋ fan mai daŋ Lewitien ma joŋra zahsyiŋ moo ga faara nyi we tǝgbana mai me cuu ɓǝ ah ɓo nyi ra. 9 We foo ɓǝ fan mai Dǝɓlii Masǝŋ ɓii mo joŋ wo Miriam, ne cok mai na ur ɓo gin sǝr Egiɓ tǝ ginni.
10 Ne cok mo nyi val fan nyi dǝɓ ɓe, mo dan ge ɓǝr yaŋ ah ka nyiŋ mbǝro mai mo tǝ ga nyiko nyi mo ka ɗah kan zahwaa fan ah mo ɓaŋ ɓo ka. 11 Mo ge uu lalle, mo soɓ ko ye mo ɓaŋ gee mo ne ko ne suu ahe. 12 Dǝɓ ah mo pa syak ye ɓe, ka mo kan fan ah wo ɓo ka dai tǝ'nan ka. 13 Mo jin ge nyi ko ka com ɓah dan a ba, ka mo swǝko ne ko, so a ga joŋ osoko nyi mo. Dǝɓlii Masǝŋ ɓii laŋ a ga laa pǝ'nyah ne mo ta.
14 We gaɓ pa syak mai mo tǝ joŋko yeɓ ka za mo soo ko ka, koo mo dǝɓ Israel na we yo, wala mo dǝɓ gwǝǝ mai mo ge kaa ɓo kǝsyil ɓii yaŋ ɓii maki ah yo daŋ. 15 Zah'nan daŋ mo soo lak ah mo joŋko yeɓ ɓo mor ah ka com dan a ba, mor ka mo joŋko fan mai zahzyil ah mo tǝ 'yah ne lak ahe. Mo zyii ka soo ko ya ɓe, a ga yeyee wo Dǝɓlii ne ɓǝ ɓo, so ɓǝɓe' ga yea tǝtǝl ɓo mor ahe.
16 We ik za wee ge lal pǝ wul mor ɓǝɓe' mai wee ɓǝǝ mo joŋ ka, we ik wee laŋ ge lal pǝ wul mor ɓǝɓe' mai za ɓǝǝ mo joŋ ɓo ka ta. Amma koo zune mo joŋ faɓe' ɓe daŋ, a ga ira ko mor faɓe' suu ahe.
17 We ɓeɓ ɓǝ kiita za gwǝǝ ne wee syel pǝ cok kiita ka, we nyiŋ godel jol mawin wul kan zahwaa val ah ka. 18 We foo, awe laŋ we yea tǝ joŋ byak sǝr Egiɓ ta, so Dǝɓlii Masǝŋ ɓii ye wǝǝ we gŋ, mor ah me nyi ɓǝ lai mai nyi we, ka we syee mor ahe.
19 Ne cok we ce sor 'wah ɓii ne gwahlle, we woo ge yaŋ ne we soɓ manyeeki ah ɓo fahfal pǝ 'wah ɓe, ka we pii soo ge woo kao, we soɓ mor za gwǝǝ ne wee syel ne ŋwǝǝ wulli. Nai ɓe, Dǝɓlii Masǝŋ ɓii a ga ẽe we pǝ fan mai daŋ wee joŋni. 20 Ne cok we ge ɓuu lee tǝbaakãm ɓii ɓe, ka we pii soo ge woo mai we soɓ ɓo kao, moo a mor za gwǝǝ ne wee syel ne ŋwǝǝ wulli. 21 Ne cok we ŋhǝǝ lee kpuu vin ɓii ɓe laŋ, ka we pii soo ka ga woo mai mo soɓ ɓo kao, lee ah mai we soɓ ɓo, a mor za gwǝǝ ne wee syel ne ŋwǝǝ wulli. 22 We yaŋ ɓǝ mai we yea tǝ joŋ byak sǝr Egiɓ ka syaŋsyaŋ, me nyi ɓǝ lai mai ɓo nyi we mor ahe.
© Bible Moundang © Alliance Biblique du Tchad, 1996.
