Dǝɓlii gbǝ zah ne za Israel pǝ sǝr Moab
1 Dǝɓlii faa nyi Mosus mo gbǝko zah ne za Israel pǝ sǝr Moab, ɓǝ gbanzah ah tai ki ne ɓǝ gbanzah mai Dǝɓlii mo gbǝ ne ra tǝ waa Sinai .
2 Mosus tai za Israel daŋ, faa nyi ra: Awe ne suu ɓii we kwo fan mai daŋ Dǝɓlii mo joŋ wo goŋ sǝr Egiɓ, ne za yeɓ ah ra, tǝkine sǝr ah daŋ ɓe. 3 So we kwo bone magaɓ ah camcam, dǝǝbǝǝri, ne yeɓ matǝ gǝriŋ ah Dǝɓlii mo joŋ ɓe. 4 Amma ŋhaa tǝ'nahko, Dǝɓlii nyi zahzyil ma tan mor ɓǝ ahe, ne nahnǝn ma kwan ah tǝkine sok ma laa ɓǝ ah nyi we ya. 5 Ne syii matǝ jemma nai Dǝɓlii mo zaŋ we syee ne kǝsyicokki, mbǝro ɓii ne sǝɓal ɓii ra daŋ ɓeɓ ya. 6 We lwaa tǝwaa ka ren a, we lwaa bii lee kpuu vin, wala yim ka zwan a ta, amma Dǝɓlii ye wol we, joŋ nai mor ka cuu nyi we, ako ye Masǝŋ ɓiiri. 7 Ne cok na ge dai pǝ cok maiko, Sihon goŋ Hesbon, ne Og goŋ Basan, pǝ̃ǝra ka gin ruu sal ne na, amma na nĩi ra. 8 Na re sǝr ɓǝǝra, na woŋ kǝsyil ban Ruben ne ban Gad, ne raita ban Manasse. 9 We syee mor ɓǝ gbanzah mai daŋ ne goŋga, ka we yea ne pejii pǝ fan daŋ mai wee joŋni.
10 Tǝ'nah awe daŋ we uu ɓo pel Dǝɓlii Masǝŋ ɓiiri, zaluu pel ɓii ne zaluu tǝsal ɓǝ ɓiiri, za wǝǝre, 11 ŋwǝǝre, ne wee manyeere, tǝkine za gwǝǝ mai mo kaara ɓo kǝsyil ɓii moo sǝǝra zahwii ne bea bii nyi we. 12 Tǝ'nah awe nyeeko, mor ka dan pǝ ɓǝ gbanzah mai Dǝɓlii Masǝŋ ɓii mo tǝ gban ne we, so ka nyiŋ ɓǝ ah ta. 13 So Dǝɓlii ga swaa ɓǝ ah zǝzǝ̃ǝko, awe ye zan ahe, ako ye ga yea Masǝŋ ɓiiri, tǝgbana mo faako ɓǝ ah ɓo nyi we, ne pa ɓii lii ra, Abraham, Isak, ne Yakuɓ. 14 Awe ye ka za mai Dǝɓlii mo tǝ gbanzah mai ne we to laŋ ya. 15 Amma tǝ gbanzah ah ne za daŋ mai mo uura ɓo pel ah tǝ'nahko, tǝkine morsǝ̃ǝ man mai mo ɓah bemra ya ba daŋ.
16 Awe tǝ ɓǝ kal man na yea kaa ɓo sǝr Egiɓ ɓe, so ne mai na syee pǝ̃ǝ pǝ sǝr za camcam daŋ. 17 We kwo masǝŋ ki ɓǝǝ maɓea mai mo zyeɓra ne kpuu ne tǝsalle, ne vãm solai tǝkine vãm kaŋnyeeri daŋ ɓe. 18 We joŋ yella, ka dǝɓ ɓiiri, wala mo madǝwin o, mo za yaŋ ɓii ra yo, wala mo zahban mai mo uu ɓo nyee tǝ'nah yo, ka mo soɓko Dǝɓlii Masǝŋ man ka so ga syee mor masǝŋ za ki ra ka. Ɓǝ ah ga yea tǝgbana sǝ̃ǝ kpuu mazwak mai goo ah moo yea pǝzwak moo in dǝɓ pǝ wulli. 19 We joŋ yella, ka koo dǝɓ vaŋno kǝsyil ɓii mo uu ɓo nyee tǝ'nah mo laa ɓǝ maiko, ka mo faako pǝ zahzyil ah sõone, koo me yer sol me joŋ fan mai zahzyil ɓe mo 'yah laŋ, ẽe Masǝŋ ga yea tǝtǝl ɓe kpǝ, mo faako ka. Ɓǝ ma morãi a ga muŋ we, za masãh ah ne za maɓea ah gwa daŋ. 20 Dǝɓlii ka ga rõm dǝɓ ma joŋ fan ma morãi ya, jeertǝ Dǝɓlii ga ɓaŋ kpãh tǝl ah pǝ'manne, tǝkẽawãk mai ɓǝ ah mo ŋwǝǝ ɓo pǝ ɗerewol mai daŋ a ga ge tǝtǝl ahe, ŋhaa sai ka Dǝɓlii muŋ tǝtǝl ah ɓe. 21 Dǝɓlii ga joŋ ko na fan ma cuu fan pel zahban Israel daŋ. A ga pee bone ge tǝl ah tǝgbana ɓǝ tǝkẽawãk ma pǝ ɓǝ gbanzah mai daŋ mo ŋwǝǝ ɓo pǝ ɗerewol ɓǝ lai Dǝɓlii.
22 Pǝ zahŋhǝǝtǝ̃ǝ ma pelle, wee ɓii mai we tǝ ga bemme, ne za gwǝǝ mai moo ga gera daga cok maɗǝk ah ge, a ga kwora ɓeɓ tǝkine bone mai Dǝɓlii moo ga pee ge tǝ sǝr ɓiiri. 23 'Wah ga ciŋ cok kolle. Wii ne lǝǝ daŋ ga yea gŋ. Ka ga ruura fan ki gŋ ya, koo fãa laŋ ka ga ciŋ gŋ ya. Yaŋ ɓii ra a ga yea tǝgbana yaŋ Sodoma ne Gomorra, ne Adma tǝkine Zeboim mai Dǝɓlii mo ɓaŋ kpãh pǝ'man ɓeɓ yaŋ ah ra ne ko. 24 So za sǝr daŋ a ga fiira fii faa: Dǝɓlii joŋ sǝr ɓǝǝ nai mor fẽene? Ɓaŋ kpãh pǝ'man nai mor fẽene? 25 A ga zyiira ɓǝ ah faa: Mor za Dǝɓlii zǝǝra ɓo tǝ ɓǝ gbanzah mai mo gbǝra ɓo ne Masǝŋ pa ɓǝǝ lii ra mai mo zaŋ ra gin sǝr Egiɓ pǝ̃ǝ ne ko. 26 A syeera mor masǝŋ ki ra mai mo juura pel wol ah taa ya, masǝŋ ki ra mai Dǝɓlii mo cak ra ɓo tǝ ɓǝ ah ka mo juura pel wo ɓǝǝ ka. 27 Mor ah Dǝɓlii ɓaŋ kpãh ɓo ne zan ahe, pee ɓeɓ mai ɓǝ ah mo ŋwǝǝ ɓo pǝ ɗerewol mai ge ɓo tǝtǝl ɓǝǝra. 28 Dǝɓlii ɓaŋ kpãh ɓo ne ra pǝ'manne, ne ɓaŋ kpãh ah mo ɓaŋ ɓo pǝ'man naiko, so loo ra pǝ sǝr ɓǝǝ ɓoo ge pǝ sǝr za ki, tǝgbana mai mo no tǝ'nahko.
29 Ɓǝ ma tǝsyeɓ ah no, Dǝɓlii Masǝŋ man cuu ɓǝ ah ge nyi na lal a ba, amma cuu ɓǝ lai ah ge na lal ɓe. Ana, ne wee man daŋ, na syee mor ɓǝ lai ah ga lii ga lii.
© Bible Moundang © Alliance Biblique du Tchad, 1996.
