Wul Mosus
1 Mosus ur gin pǝ cok ma tǝ sǝr sǝŋ ah pǝ sǝr Moab, yee ge tǝ waa Nebo, tǝlǝǝ waa Pisga, nǝfah kǝmorcomzah'nan yaŋ Jeriko. Dǝɓlii cuu sǝr ah daŋ nyi ko gŋ: sǝr Giliat ŋhaa ge dai yaŋ Dan, 2 sǝr Naftali ne lii ah daŋ, ne sǝr Efraim ne Manasse, ne sǝr Yuda, ŋhaa ge dai mabii Mediterrania nǝfah kǝmorcomlilli, 3 ne sǝr ma fah morkǝsǝŋ, ne sǝr ma tǝ sǝr sǝŋ ah mo kǝsyil Zoar ne yaŋ Jeriko, yaŋ ma ne kpuu dabonooje. 4 So Dǝɓlii faa nyi Mosus: Sǝr mai me faa ɓǝ ah nyi Abraham, Isak, ne Yakuɓ me ga nyi nyi morsǝ̃ǝ ɓǝǝ kŋ yo. Me soɓ mo kwo sǝr ah ɓe, amma me ka soɓ mo ga gŋ ya.
5 So Mosus dǝɓ yeɓ Dǝɓlii wǝ pǝ sǝr Moab, tǝgbana mai Dǝɓlii mo faa ɓo nyi ko. 6 Dǝɓlii cii ko pǝ cok tǝforoŋ pǝ sǝr Moab, ka ɓyaŋ ne yaŋ Bet-Peor. Amma koo dǝɓ vaŋno laŋ tǝ cok pal ah ya, ŋhaa tǝ'nahko. 7 Mosus joŋ syii temere ne jemma gwa, wuu, ne cok ah ka a pǝswah 'wa ba, nahnǝn ah a kwan cok pǝsãhe. 8 Za Israel yera yee wul ah pǝ sǝr Moab zah'nan jemma sai.
9 Masǝŋ nyi fatan nyi Joswa pǝlli, mor Mosus nǝǝ ko, kan jol tǝl ahe, ka mo joŋko yeɓ pǝ cok ahe. Za Israel laara zah Joswa, so syeera mor ɓǝ mai daŋ Dǝɓlii mo nyi nyi ra ne jol Mosus.
10 Fahfal ah profeto Masǝŋ ma na Mosus pǝ̃ǝ kǝsyil za Israel yao, mor Dǝɓlii faa ɓǝ ne ki zah ne zahe. 11 Profeto Masǝŋ ma joŋ dǝǝbǝǝri ne yeɓ matǝ gǝriŋ ah tǝgbana mai Dǝɓlii mo pee Mosus joŋ wo goŋ sǝr Egiɓ, ne zaluu pel ah ra, tǝkine pǝ sǝr ah daŋ kǝka. 12 Koo profeto Masǝŋ vaŋno mai mo lwaa swah ka gak joŋ yeɓ ma'man ah ne ma ren gal ahe tǝgbana mai Mosus mo joŋ ne nahnǝn za Israel daŋ kǝka.
© Bible Moundang © Alliance Biblique du Tchad, 1996.
