Ɓǝ lai malii ahe
1 Mai daŋ ɓǝ lai mai Dǝɓlii Masǝŋ ɓii mo faa nyi me, ka me cuu nyi we yo. Ka we syee mor ɓǝ lai ah ra pǝ sǝr mai we tǝ ga dan gŋ ka renne. 2 Pǝ zah'nan cee ɓii daŋ, awe ne morsǝ̃ǝ ɓii ra daŋ we ɗuu gal Dǝɓlii Masǝŋ ɓiiri, we syee mor ɓǝ lai ah ra mai me faa ɓo nyi we daŋ, mor ka we nǝn wo sǝrri. 3 Za Israel, we laa ɓǝ lai ah ra, we syee mor ahe. Nai ɓe, we ga yea ne pejii pǝ fan daŋ, so we ga ciŋ za maswah ah ne za makǝ̃ǝ ah pǝ sǝr masãh ko, tǝgbana mai Dǝɓlii Masǝŋ pa man lii ra mo faa ɓo.
4 Za Israel, we foo ɓǝ maino, Dǝɓlii ako ye Masǝŋ mana, Dǝɓlii syak ah ako ye Masǝŋ to. 5 We 'yah Dǝɓlii Masǝŋ ɓii ne zahzyil ɓii daŋ, ne mazwãhsuu ɓii daŋ, ne swah suu ɓii daŋ. 6 We yaŋ ɓǝ lai mai me nyi ɓo nyi we tǝ'nah ka. 7 We cuu nyi wee ɓiiri. Koo ne cok we yaŋ, koo we tǝ syee tǝ fahlii, koo ne cok we swǝ ɓo sǝŋ, koo we tǝ joŋ yeɓ ɓe daŋ, we yea ne faa ɓǝ ah pǝ zahe. 8 We baŋ ge tǝsol jolle, we rao ge zahpel ɓii ka we foo ɓǝ ahe. 9 We ŋwǝǝ ge wo kpuu zahfah yaŋ ɓiiri, ne tǝ zahfah yaŋ ɓiiri. We rao ɓǝlai Dǝɓlii ge zahpel ɓiiri
Lai tǝ ɓǝ bai laa zahe
10 Dǝɓlii Masǝŋ ɓii gbǝ zah ne pa ɓii lii Abraham, Isak, ne Yakuɓ ka nyi sǝr malii ne yaŋ maluu masãh ah ra mo gŋ, mai we ye we ka vuu ya nyi we. 11 Yaŋ ah ra fan masãh ah camcam mai we ye we ka rǝk gŋ ya, baa ɓo gŋ kǝrkǝr. Lak bii mai we ye ka cir ya a gŋ, ne 'wah kpuu vin ne kpuu tǝbaakãm mai we ye we ka pea gŋ ya daŋ. Ne cok Dǝɓlii mo zaŋ we ge dan pǝ sǝr ahe, so we lwaa fan mai zahzyil ɓii mo 'yah ka ren daŋ gŋ ɓe, 12 we joŋ yella, ka we yaŋ Dǝɓlii mai mo wǝǝ we pǝ byak ɓii sǝr Egiɓ ka. 13 We ɗuu Dǝɓlii Masǝŋ ɓiiri, we juupel wol ah to. We haa zah ne tǝɗii ah syak ah to. 14 We syee mor masǝŋ za mai mo kaara ryaŋ we ɓo ka. 15 We kal tǝ syee mor masǝŋ ki ra ɓe, Dǝɓlii Masǝŋ ɓii ga ɓaŋ kpãh tǝ ɓii pǝcwak na wii, a ga vǝr we gin wo sǝr tǝɗe', mor Dǝɓlii Masǝŋ ɓii mai mo no ne we, ako ye Masǝŋ ma ne tǝwonni.
16 We lii Dǝɓlii Masǝŋ ɓii tǝgbana mai we joŋ Massa ka. 17 We joŋ yella, ka we syee mor ɓǝ lai ah ra mai mo nyi ɓo nyi we daŋ. 18 We joŋ fan masãh ah ne ma 'nyah suu Dǝɓlii. Nai ɓe, we ga yea ne pejii pǝ fan daŋ. We gak ga re sǝr masãh mai Dǝɓlii mo faa ɓǝ ah nyi pa ɓii lii ra, 19 we ga nĩi za syiŋ ɓii gŋ ga lal tǝgbana mai mo faako.
20 Pǝ zah'nan ma pel mo tǝ ginni, wee ɓii ga fiira we faa: Mor fẽe Dǝɓlii Masǝŋ man faa nyi we, ka we syee mor ɓǝ lai marai daŋ ne? 21 So ka we zyii faa nyi ra: Ru yea tǝ joŋ byak nyi goŋ sǝr Egiɓ, amma Dǝɓlii wǝǝ ru gŋ ne swah ahe. 22 Aru kwo ko joŋ dǝǝbǝǝri ne yeɓ matǝ gǝriŋ ah wo za sǝr Egiɓ ne wo goŋ ɓǝǝ ne zaluu pel ah ra daŋ. 23 Wǝǝ ru gin sǝr Egiɓ, zaŋ ru ge nyee ne ko, so nyi sǝr mai nyi ru, tǝgbana mo faa ɓǝ ah ɓo nyi pa man lii ra. 24 So Dǝɓlii Masǝŋ man faa nyi ru, ka ru syee mor ɓǝ lai marai daŋ, ka ru ɗuu ko. Na tǝ joŋ nai ɓe, cẽecẽe nahnǝn ah ga yea tǝ za mana, a ga byak na jam. 25 Na tǝ syee mor ɓǝ mai daŋ Masǝŋ mo faa ɓo nyi na ne goŋga ɓe, a ga laa pǝ'nyah ne na.
© Bible Moundang © Alliance Biblique du Tchad, 1996.
