Kal wo sǝr ka ne mor a
1 Mai ɓǝ faa Pacuuɓǝ, we David mai mo kaa goŋ yaŋ Jerusalem. 2 Faa: Fan daŋ a bai morrĩ, a tǝkolle, fan daŋ a kpakke. 3 Dǝfuu a gaɓra ne yeɓ tǝ sǝrri, so ka lwaara fan ki ne ya. 4 Zahŋhǝǝtǝ̃ǝ mai pǝ̃ǝ kalle, mafuu a so gin pǝ cok ahe, amma sǝr so tǝ kaa ga fǝrai na matãa. 5 Com a zooni, com a danne, so a hǝǝ ne jin ga pǝ cok ah ma kǝpelle. 6 Kǝǝzyak a kuu ga morkǝsǝŋ zah vaŋno, so zah vaŋno ta a fer kuu ga fahsǝŋ. Kǝǝzyak a kuuni, a kiŋ pǝ cok tãa, so a jin ɓaŋ fahlii syel ah ma kǝpelle. 7 Bii pǝ zǝǝ a ɗuura ga mabii, so mabii baa ne kpee ya. Bii pǝ zǝǝ a jin ɗuu ga pǝ cok ah katãa faɗa. 8 Ɓǝ fan rai daŋ a gaɓ dǝɓɓi, ɓǝ ah kal tǝ mai ka dǝɓ mo faa ge zah ɓe, mor sok dǝfuu ne nahnǝn ɓǝǝ ka kǝ̃ǝ ne fan ah kpee ya. 9 Fan mai mo ge kǝpelle, a so ga ge faɗa. Fan mai mo joŋ taa ɓe, a so ga joŋ pel kpǝ. Fan mafuu ah mai mo joŋ taa ya kǝka wo sǝr a. 10 Ɓǝ mo joŋ tǝ sǝr ka dǝɓ mo faa tǝl ah ẽe ɓǝ fuu ɗǝ ɓe, ka goŋga ah ye ɓe, ɓal ɓǝ ah joŋ ɓo ɓaa kǝpel ka na byaŋ ya. 11 Amma ana yaŋ tǝtǝl ɓǝ mai mo joŋ wo pa man lii ra. Za mai moo ga gera fahfal laŋ ka ga soɓra fan ma cuu fan nyi za mai moo ga yeara fahfal ɓǝǝ ya ta.
Ɓǝ mai Pacuuɓǝ mo tǝ ɓo
12 Ame Pacuuɓǝ me kaa goŋ tǝ za Israel yaŋ Jerusalem. 13 Me lii ɓǝ fan daŋ mai mo tǝ joŋ wo sǝr ne yella mor ka me lwaa mor ah tǝ.
Yeɓ ah yeɓ gaɓ ye Masǝŋ kan ɓo tǝ dǝfuu. 14 Me kwo fan daŋ mai mo tǝ joŋ tǝ sǝr ɓe. Fan ah daŋ a bai mor tǝgbana ɓǝ nĩi kǝǝzyak ka gbanne. 15 Mor fan mai mo rãa ɓo ka gak dǝǝ sǝraŋ ya, so dǝɓ ka gak kee fan mai mo kǝka ya.
16 Me foo tǝgba me tǝ fan ɓo pǝlli kal za ki daŋ mai mo kaara goŋ Jerusalem kǝpel ɓe. So 'manna me fee fan ɓo pǝlli ko, me tǝ mor ɓǝ kal dǝfuu ɓo pǝlli ta. 17 Me nyi suu ɓe mor ka lwaa woŋ kǝsyil fatan ne ɓǝ tǝgwĩi, fan ma ne tǝtǝl tǝkine fan bai tǝtǝlli. Me so lwaa ɓǝ ah na ɓǝ nĩi kǝǝzyak katãa ta. 18 Dǝɓ mo ne yella pǝlli, mo tǝ fan ɓo pǝlli ɓe, ka dǝɓ ah lwaa ɓǝ swaa tǝkine bone pǝlli ɓe ta.
© Bible Moundang © Alliance Biblique du Tchad, 1996.
