Vǝrvǝr ne kal ɓea ma kǝsyil zana
1 Me so kwo vǝrvǝr camcam mai mo tǝ joŋ wo sǝr faɗa. Za mai za ki mo tǝ cuura bone nyi ra a yera yee, so dǝɓ ma gin gbah jol ɓǝǝ kǝka vaŋno ya. Swah a mor jol za ma cuura bone nyi zana, mor ah dǝɓ ma gak gin gbah jol za ma laara bone kǝka. 2 Me sãa ɓǝ za mai mo wukra ɓo, ara jam kal za ma ne cee ɓe. 3 Dǝɓ mai mo ɓah byaŋ gin lal a ba ɓe, ɓǝ mǝ ah a so pǝ'nyah pǝlli faɗa, mor tǝ ɓǝɓea mai mo tǝ joŋ wo sǝr a.
4 Me so lwaa ɓǝ mai laŋ tǝ, dǝfuu a gaɓra ne yeɓ ɓǝǝ tǝkine kyeɓra ka joŋ pǝsãh ga pelle pelle, mor ɓǝ mai vaŋno to: a 'yahra ka yeɓ ɓǝǝ mo ge pel kal mǝ pa jǝk ɓǝǝra. Ɓǝ mai laŋ ɓǝ kol ye tǝgbana ɓǝ nĩi zyak ka gbanne. 5 Oho, tǝgwĩi ma lao jol kaa ne ko ka tǝ soɓ suu ah wun ne koŋne. 6 Amma pǝram ka dǝɓ mo soɓ suu ah 'yak nje, kal tǝ mai ka dǝɓ mo vǝr swah suu ah tǝ yeɓ mai mo ka ne mor a ɓe.
7 Me so ẽe ɓǝ ma tǝgwĩi maki ah mo tǝ joŋ wo sǝr faɗa. 8 Eẽ ɗǝ, dǝɓ ki no a vaŋno syak ah sǝ, ka ne dǝɓ ya, ka ne naa pam ya, ka ne wel a, so a joŋ yeɓ mo ka tan zahtǝmgboo ah ya. Koo moo fiiko suu ah ne faa, mor zuu zye tǝ joŋ yeɓ mai nai tǝkine cak suu 'min tǝ laa pǝ'nyah ko ne laŋ, cẽecẽe zahzyil ah a 'yah tai joŋ ga pelle. Mai laŋ fahlii maɓe' ah ne ma bai mor ah ka dǝɓ mo kaa ne wo sǝr pǝ zah'nan cee ah yo.
9 Za mai moo kaara wo ki gwa ara jam kal dǝɓ ma kaa syak ah ɓe. Ne kal tǝ gwa ɓǝǝ nai a lwaara fan tǝ yeɓ ɓǝǝ pǝsãhe. 10 Dǝɓ vaŋno kǝsyil ɓǝǝ mo lee ge sǝŋ ɓe, dǝɓ maki a ɓaŋ ko ur sǝŋ. Amma dǝɓ mai mo syak ah a nǝn pǝkoŋ mai ka dǝɓ mo yee syak tǝl ahe, mor mo leeko ge sǝŋ ɓe, ka yea ne dǝɓ ma ɓaŋ ko ur sǝŋ ya. 11 Ne cok cel mo tǝ wuu ɓe, za gwa mo swahra gǝr ki ɓe, cok lǝǝ wo ɓǝǝra, amma dǝɓ mai mo syak ah a gak joŋ cok lǝǝ wol ah suu ɗǝne? 12 Za gwa a gak uura pel tǝnyee mai dǝɓ vaŋno syak ah mo ka gak ya. Sal mo nǝn ki pǝpãa ɓe, a yea pǝswahe.
13 Pǝram we tǝbanna mai mo pǝsyak mo so ne tǝtǝlli, kal goŋ matam ma bai tǝtǝl mai mo ka zyii laa lai ya ɓe. 14 Koo we tǝbanna nyẽe mo pǝ̃ǝ gin ɓo pǝ daŋgai a gak kaa goŋe, koo mo we pa syak ye pǝtãa laŋ ko. 15 Me kwo ɓǝ ma morãi tǝ joŋni, za daŋ taira ge mor we tǝbanna mai mo yea fahfal zana, amma zǝzǝ̃ǝ mo so tǝ ga kaa goŋ pǝ cok dǝɓ ma kǝpelle. 16 Kaa goŋ ɓo tǝ za pǝpãare, ne daŋ laŋ zahŋhǝǝtǝ̃ǝ ma pel mo tǝ ginni, koo dǝɓ vaŋno ka ga ɓaŋ syiŋ ɓǝ yeɓ mai mo joŋko ya. Ɓǝ mai laŋ ɓǝ kol ye tǝgbana ɓǝ nĩi zyak ka gbanne.
Mo faa ɓǝ pel Masǝŋ bai ɓǝ foo ka
17 Mo ge yaŋ Masǝŋ bai foo ɓǝ ka. Mo ge gŋ ne ɓal ga syii sokki. Mai a pǝram kal ɓǝ joŋ syiŋ na za ma tǝgwĩi moo joŋra mo ka so tanra ra tǝ joŋ pǝɓe' ya ɓe.
© Bible Moundang © Alliance Biblique du Tchad, 1996.
