Haozah woli
1 Ame Paulus papee Yesu Kristu tǝgbana 'yah Masǝŋ mo 'yah ɓo, me ŋwǝǝ leetǝr mai wo za Masǝŋ mo yaŋ Efesus, za matǝ goŋga tǝ fahlii Yesu Kristu.
2 Masǝŋ Pa man ne Dǝɓlii Yesu Kristu mo joŋ gboŋgboŋ wo ɓii tǝkine nyi jam nyi we.
Fan sãh mai Masǝŋ mo nyi ɓo na ne Kristu
3 Na joŋ osoko nyi Masǝŋ Pah Dǝɓlii man Yesu Kristu! Mor ne tai man na tai ki ɓo ne Kristu, ẽe na ɓo ne ẽe ma tǝ'yak camcam mo coksǝŋ. 4 Ka Masǝŋ ɓah joŋ sǝr a ba, syen na ka na ciŋ za mǝ ah ne Kristu, mor ka na yea daŋdaŋ tǝkine bai ɓǝɓe' pel ah mor 'yah ahe. 5 Mor Masǝŋ zyeɓ ɓǝ ah ɓo kǝpel pǝ zahzyil ah ka ga joŋ na na wee ah ne Yesu Kristu, foo ka joŋ nai mor zahzyil ah ye 'yahe. 6 Na joŋ osoko nyi Masǝŋ mor gboŋgboŋ lii ahe, mor nyi facokkol malii nyi na ne We 'yah ahe.
7 Mor na wǝǝ ɓo mor wul Kristu, faɓe' man rwah ge ɓo lal mor wul Kristu. 8 Masǝŋ cuu gboŋgboŋ lii ah mo ne ge nyi na lalle, ne mai mo joŋko wo man mo nyi fatan tǝkine yella daŋ nyi na pǝlli, 9 cuu ɓǝ foo ah ma tǝsyeɓ mai mo zyeɓ ɓo kǝpel ah ka joŋ ne Kristu nyi na. 10 Ɓǝ mai Masǝŋ mo zyeɓ ɓo ka cok ah mo ge ɓe ka ga joŋ a naiko: ka tai fan ma coksǝŋ tǝkine ma wo sǝr daŋ ka mo yea mor ɓal Dǝɓ vaŋno, Dǝɓ ah ye Kristu.
11 Ne tai man ne Kristu, na lwaa ǝ̃ǝ man ɓo ne ko, mor Masǝŋ syen na kǝpel tǝgbana ɓǝ foo ahe, so Masǝŋ a joŋ fan ah daŋ na mai mo zyeɓko, ne mai zahzyil ah mo 'yahe. 12 Ana za mai na nyiŋ Kristu ɓo kǝpelle, na joŋ osoko nyi Masǝŋ mor yǝk ahe!
13 Awe laŋ ta, ne cok we laa ɓǝ goŋga, ako ye Ɓǝ'nyah mai mo ge ɓo we ne ǝ̃ǝre, awe nyiŋ Kristu ɓo, so Masǝŋ kan lamba tǝ ɓii ka cuu awe ye za mǝ ah ne mai mo nyi Tǝ'yak Matǝdaŋdaŋ mai mo faa ɓǝ ah ɓo nyi we. 14 Tǝ'yak Matǝdaŋdaŋ ako ye fan ma cuu ryakryak ǝ̃ǝ mai Masǝŋ mo faa ɓǝ ah ɓo nyi zan ah tǝgbana faren ɓǝǝra, faa ɓo nyi na njaŋ, na ga lwaa faren ah ne cok mai moo ga wǝǝ na tǝɗe'. Na yii yǝk Masǝŋ!
Juupel Paulus
15 Mor ahe, ne cok me laa ɓǝ iŋ ɓii we nyiŋ Dǝɓlii Yesu tǝkine mai wee 'yah za Masǝŋ daŋ, 16 me ka dal joŋ osoko nyi Masǝŋ mor ɓii ya, me foo ɓǝ ɓii ne juupel ɓe cẽecẽe. 17 Me pǝǝ Masǝŋ Dǝɓlii man Yesu Kristu, Pam mayǝkki, ka mo nyiko tǝ'yak ma tan fan nyi we, ne mai moo cuu Masǝŋ nyi we, mor ka we tǝ ko. 18 Me tǝ pǝǝ Masǝŋ ka mo gbǝrko ɓǝ foo ɓii ka we kwo cokfãi ahe, ka we gak tǝ fan byak mai mo ɗiiko we ɓo mor ahe, ka we tǝ 'man ah tǝkine yǝk faren mai mo faako ɓǝ ah ɓo ka nyi nyi zan ahe, 19 ka na tǝ swah ah malii mo tǝ joŋ yeɓ pǝ zahzyil man za ma iŋni. 20 Swah mai mo pǝzyil man a tǝki vaŋno ne swah malii mai Masǝŋ mo joŋ yeɓ ne ko ne cok mai mo ur Kristu gin pǝ wul mo so ge kaa ɓo jokǝsãh ah coksǝŋ. 21 Kristu kaa goŋ ɓo coksǝŋ ŋhaa tǝ fan daŋ, tǝ yǝkki, swahe, kaciiri, tǝkine tǝɗii daŋ mai za moo ɗiini, ma wo sǝr mai nyee to ya, amma ne ma pǝ sǝr ma pel mo tǝ gin daŋ. 22 Masǝŋ soɓ fan daŋ ɓo mor ɓal Kristu, nyi ko ɓo nyi eklesia tǝgbana tǝtǝl mai moo syee ne fan daŋ. 23 Eklesia ye suu Kristu, Kristu yee joŋ fan daŋ pǝzyil eklesia, ako yee baa fan daŋ.
© Bible Moundang © Alliance Biblique du Tchad, 1996.
