Pǝ̃ǝ gin pǝ wul ge pǝ cee
1 Ɓaaɓe we yea wuk ɓo pǝ tǝ'yak ɓii mor bai laa zah ɓii tǝkine faɓe' ɓiiri. 2 Ne cok ah we yea tǝ syee mor ɓǝɓe' sǝr maiko, awe syee mor dǝɓlii tǝ'yak maswah ma zah swãh sǝŋ, tǝ'yak mai zǝzǝ̃ǝ tǝ joŋ yeɓ pǝ zahzyil za ma bai zyii laa zah Masǝŋ. 3 Ana daŋ na yea tǝgbana ra ta, na yea tǝ syee mor fan cwaa suu mana, na yea tǝ joŋ fan mai suu man ne ɓǝ foo man moo 'yahni. Mor kpak man mai na ne naiko, na no ne kpãh Masǝŋ tǝ man tǝgbana za ki ta. 4 Amma Masǝŋ pa ma kwan syak lii yo, 'yah na ɓo pǝlli. 5 Mor ne cok na yea wuk ɓo pǝ tǝ'yak man mor ɓǝɓe' mana, so nyi cee nyi na ne Kristu. Awe ǝ̃ǝ ɓo mor gboŋgboŋ Masǝŋ. 6 Ne tai man na tai ki ɓo ne Yesu Kristu, Masǝŋ ur na gin pǝ wul ne ki mor ka na ge kaa goŋ ne ki coksǝŋ. 7 Joŋ nai mor ka ne cok mai mo tǝ ginni, ka cuu gboŋgboŋ ah malii mayǝk ne ɓǝ sãh mai mo joŋ ɓo nyi na ne Yesu Kristu. 8 Awe ǝ̃ǝ ɓo mor gboŋgboŋ mai Masǝŋ mo joŋ ɓo, ne iŋni. Ɓǝ ah gee wo ɓii ge ya, fan nyi Masǝŋ yo. 9 Fan ah ka mor yeɓ joŋ ɓii ka dǝɓ mo yii suu ah ne ɓǝ ah ya. 10 Mor Masǝŋ ye zyeɓ na, ne tai man na tai ki ɓo ne Yesu Kristu Masǝŋ joŋ na ka na yea ne joŋ yeɓ masãh ah mai mo zyeɓko kan ɓo mor man daga kǝpelle, mor ka na joŋ.
Vaŋno pǝzyil Yesu Kristu
11 Awe za mai we ye we ka Yahuduen a daga byaŋ ɓiiri, mai Yahuduen moo ɗiira we ne za bai daakanne, (a cuu fan mai za moo joŋra wo suu ɓǝǝra) moo so ɗiira suu ɓǝǝ ne za daakanne, we foo ɓǝ mai we yea pǝtãa. 12 Ne cok ah awe pǝɗǝk ne Kristu, we ye za gwǝǝre, awe ye ka za mai Masǝŋ mo syen ɓo ya, awe ka pǝzyil ɓǝ gbanzah mai Masǝŋ mo faa ɓǝ ah ɓo nyi zan ah ya, we hai ɓo wo sǝr nyee bai fan byakke, bai Masǝŋ. 13 Amma zǝzǝ̃ǝko, ne fahlii mai we tai ki ɓo ne Yesu Kristu, awe za mai we yea pǝɗǝkki, we ciŋ za matǝ gwari ɓo mor wul Kristu. 14 Mor Kristu ne suu ah ako ye gee na ne jam, joŋ Yahuduen ne za mai mo ye ka Yahuduen a ciŋra za tǝ vaŋno. Hal korvuu mai mo yea cee kǝsyil ɓǝǝ ɓo mo joŋ ra na za syiŋ ki ge sǝŋ ne wul suu ahe. 15 Ge vǝr ɓǝ lai Yahuduen ne kiita ah ra ne ɓǝ mai mo ŋwǝǝ ɓo gŋ mor ka joŋ ban matǝ gwa rai ciŋ ban mafuu vaŋno, ka mo kaara wo ki jam. 16 Ne wul Kristu, mo wǝ tǝ kpuuceere, vǝr ɓǝ syiŋ ki daŋ gŋ, ne wul ah mo wǝ tǝ kpuu, tai zahban matǝ gwa mai ciŋ suu vaŋno. Zyeɓ ɓǝ ɓǝǝ gwa daŋ ne Masǝŋ. 17 Kristu ge cuu Ɓǝ'nyah jam ah ɓo nyi za daŋ, cuu ɓo nyi we za mai we yea pǝɗǝk ne Masǝŋ tǝkine Yahuduen mai mo yeara gwari ne ki laŋ ta. 18 Mor Kristu ana daŋ, Yahuduen ne za mai mo ye ka Yahuduen na no ne fahlii ka gin pel Pam gwa daŋ ne fahlii gbah jol Tǝ'yak Matǝdaŋdaŋ.
19 Mor maiko, awe za mai we ka Yahuduen a, ga pel mai awe ye ka za gwǝǝ wala za maɗǝk ah yao, amma zǝzǝ̃ǝko awe tai ki ɓo ne za Masǝŋ o, awe ye za piicel Masǝŋ. 20 Awe laŋ ta, we ye yaŋ mai mo vuu ge ɓo sǝŋ tǝ kpii ah mai zapee ne profetoen mo kpiira ɓo, tǝsal nyah yaŋ ah ako ye Yesu Kristu ne suu ahe. 21 Ako ye Dǝɓ mai yaŋ daŋ mo tai uu ɓo tǝl ah pǝswahe, nyi fahlii nyi ka giŋ ga pel mor ka yea na yaŋ Masǝŋ matǝdaŋdaŋ mor Dǝɓlii. 22 Ne fahlii tai ki ne ki, awe laŋ tǝ vuu we ga pel ne za ki ka yea na yaŋ mai Masǝŋ moo kaa gŋ ne Tǝ'yak ahe.
© Bible Moundang © Alliance Biblique du Tchad, 1996.
