Wee ne za weere
1 Weere, yeɓ mai ka we joŋ pel Dǝɓlii: “we laa zah za ɓiiri, mor ɓǝ ah a pǝsãhe. 2 Mo kee pa ɓo ne ma ɓo”, ɓǝ lai ma kǝpel o, so ɓoo ɓǝ gbanzah ge ɓo gŋ faa: 3 “Mor ka mo kaa jam, ka mo nǝn wo sǝrri.”
4 Awe pah weere, we joŋ wee ɓii ne fahlii mai moo joŋ ra ɓaŋ kpãh ka, amma we wol ra, we cuu fan nyi ra tǝkine lai ra ne ɓǝ Dǝɓlii.
Byak ne pah yaŋ ɓǝǝra
5 Byakke, we laa zah pah yaŋ ɓii ma wo sǝr nyee ne ɗuu gal ne suu cocoo ne zahzyil vaŋno tǝgbana we tǝ joŋ mor Kristu. 6 We joŋ nai ne cok mo ge tǝ ẽera we mor ka lwaa sãa ne jol ɓǝǝ to ka, amma we joŋ 'yah Masǝŋ ne zahzyil ɓii daŋ tǝgbana byak Kristu. 7 We joŋ yeɓ ɓii ne 'yah zahzyilli, tǝgbana we tǝ joŋ nyi Dǝɓlii, we ka tǝ joŋ nyi dǝfuu to ya. 8 We foo ɓǝ ahe, dǝɓ mo byak yo wala mo lwaa tǝtǝl suu ah ɓo, Dǝɓlii ga soo ko tǝgbana yeɓ sãh ah mo joŋko.
9 Awe pah yaŋ, we joŋ wo byak ɓii ra nai ta, we kyãh ɓǝ nyee wo ɓǝǝ ka. We tǝ ɓe, awe ne byak ɓii ra daŋ we ne Dǝɓlii vaŋno coksǝŋ, ka joŋ za pel ah camcam ya.
Fan sal Masǝŋ
10 Fahfal mai daŋ we fii swah jol Dǝɓlii, ka we lwaa swah ah malii. 11 We woo fan sal mai Masǝŋ moo nyi nyi we daŋ, mor ka we gak uu pǝswah pel kǝǝ Satan. 12 Mor na ka tǝ ruu sal ne dǝfuu ya, amma na tǝ ruu sal ah ne tǝ'yak ɓe' ne swah ah mo coksǝŋ, ne goŋe, ne zaluuri, tǝkine swah sǝr mai daŋ mo pǝ cokfuu. 13 Mor maiko, we woo fan sal Masǝŋ daŋ ge wo suu zǝzǝ̃ǝko, ka ne cok zah'nan maɓe' ah mo ge ɓe, we gak uu pel sal pa syiŋ ɓiiri. Fahfal we nĩi sal ah vǝr ɓe, ka we so uu pǝ cok ɓii pǝswahe.
14 We zyeɓ suu ɓii uu ne ko, we baŋ suu ɓii ne goŋga tǝgbana dǝɓ moo baŋ haŋ ne ganda, we ɓoo njaŋ ge wo suu ɓii na dǝɓ moo ɓoo mbǝro vãmme. 15 We maa tǝwon ma cuu Ɓǝ'nyah matǝ jam pǝ zahzyil ɓii na sǝɓal ɓal ɓiiri. 16 Cẽecẽe we ɓaŋ iŋ uu ne tǝgbana bal ka we gak cak guu Satan mai mo tǝ 'nǝǝ gin ne swahe. 17 We maa ǝ̃ǝ tǝgbana dǝɓ moo maa njok vãm tǝtǝlli, we nyiŋ ɓǝ faa Masǝŋ tǝgbana kafahe mai Tǝ'yak ye moo nyi nyi we. 18 We joŋ fan marai daŋ ne juupelle, we fii Masǝŋ ka mo gbah jol ɓiiri. We juupel cẽecẽe tǝgbana Tǝ'yak Masǝŋ mo cuu nyi we, we byak pǝsãhe, we laa gaɓ ka. We juupel mor za Masǝŋ daŋ. 19 We juupel mor ɓe ta, ka Masǝŋ mo nyi ɓǝ ah nyi me pǝsãhe, ka ne cok mai me tǝ 'yah ka faa ɓe, me faa ɓǝ ah bai galle, ka cuu ɓǝ tǝsyeɓ Ɓǝ'nyah gin lal ka za mo tǝ. 20 Mor ame ye pa pee Ɓǝ'nyah maiko, ame pǝ daŋgai zǝzǝ̃ǝ mor ahe. We juupel mor ɓe, ka me faa ɓǝ ah bai gal tǝgbana ɓǝ ah mo tǝtǝl ɓe.
Haozah wol ma fahfal tǝ lii ahe
21 Naa pa man Tikikus, dǝɓ yeɓ matǝ goŋga mo tǝ gbah jol ɓuu pǝ yeɓ Dǝɓlii, a ga kee ɓǝ ɓe daŋ nyi we, ka we tǝ ɓǝ kal ɓe me kaa ɓo. 22 Me pee ko ga wo ɓiiri, ma kal daŋ ah ka mo keeko ɓǝ kal ɓuu nyi we, mor ka we swaa zahzyil ɓii ne ɓǝ ahe.
23 Masǝŋ Pamme, ne Dǝɓlii Yesu Kristu, mo nyi jam, ne 'yahe, tǝkine iŋ nyi wee pam daŋ. 24 Masǝŋ mo joŋ gboŋgboŋ wo za mai moo 'yahra Dǝɓlii man Yesu Kristu ne 'yah mai mo ka vǝr a.
© Bible Moundang © Alliance Biblique du Tchad, 1996.
