PƏ̃Ə ZA ISRAEL 12 - Bible Moundang (MUA)

Ɓǝ Paska

1 Dǝɓlii faa nyi Mosus ne Aron sǝr Egiɓ: 2 Fĩi mai ye ga yea fĩi ma kǝpel wo ɓiiri, ako ye ga yea fĩi ma kǝpel pǝ syii. 3 We faa nyi za Israel daŋ: Tǝ zah'nan jemma fĩi mai koo zune daŋ mo ɓaŋ we sǝgwii wala we pǝsãhm vaŋno tǝgbana pãa za yaŋ vaŋno vaŋno daŋ, we gwii vaŋno yaŋ vaŋno ta. 4 We gwii mo kal tǝ yaŋ ah ɓe, ka mo ɓaŋ taiko zah tǝl ah ne pa jǝk kah yaŋ ah matǝ gwari tǝgbana pãa dǝfuu ahe, we kee za nǝn gak ren we gwii ahe. 5 We gwii ah mo yea ne suu pǝɓe' ka, so mo yea pǝworre, syii ah mo yea vaŋno, we nǝǝ gin kǝsyil pǝsǝ̃ǝre, wala sǝgwiiri. 6 We saa gwii ah ŋhaa dai tǝ zah'nan jemma tǝ nai fĩi nyẽeko, ka ne lil ah mo ŋgomra gwii ah ne cok tǝ foofoo ahe. 7 Ka mo saŋra syim ah tah kah zahfah gwa daŋ ne tǝ zahfah sǝŋ pǝ yaŋ mai moo ga rera fan ah gŋ. 8 Ne suŋ moo ta mo cwahra nǝǝ ah tǝ wii mo soŋra ne paŋgasso ma bai fan mbǝ̃ǝ ne goo mazwakke. 9 We re ne syik ka, we kǝǝ ka. Amma we cwah tǝ wii, tǝtǝl ahe, ɓal ah ne ɓǝr ah daŋ. 10 We soɓ fan ki ah dai zah'nan ka, fan ki ah mo coŋ dai tǝ'nan ɓe, we syak ne wii. 11 We tǝ ga re ɓe sye, we ɗah zyeɓ suu ɓii mor syelle, we maa sǝɓal ge ɓal ɓiiri, we yea ne kǝndaŋ mor jol ɓiiri, we re ne hǝǝre, fĩi Paska mai we ga yii me Dǝɓlii ɓii ne ko yo . 12 Ame ye Dǝɓlii, me ga kyãh tǝ sǝr Egiɓ, me ga i welii sǝr Egiɓ daŋ, daga dǝfuu koo faɓalle, me ga ŋgoŋ kiita tǝ masǝŋ Egiɓ ra daŋ. 13 Syim ga ciŋ fan ma cuu ɓii pǝ yaŋ makẽne we no gŋ. Me kwo syim ɓe, me ga pǝ̃ǝ tǝ ɓii kalle, ne cok me ga ɓaŋ jol ɓe tǝ sǝr Egiɓ, bone ma ɓeɓ ka ge tǝ ɓii ya. 14 Zah'nan ah ga yea wo ɓii na zah'nan ma jin foo ɓǝ ahe, we ga joŋ fĩi ah mor Dǝɓlii, ŋhaa zahŋhǝǝtǝ̃ǝ ɓii daŋ we ga joŋ fĩi ah na ɓǝ lai ŋhaa ga lii.

Fĩi paŋgasso ma bai fan mbǝ̃ǝre

15 Dǝɓlii faa: Tǝgǝǝ zah'nan rǝŋ we re paŋgasso ma bai fan mbǝ̃ǝre. Ne zah'nan vaŋno ah fan mbǝ̃ǝ mo yea yaŋ ɓii ka. Mor daga ne zah'nan vaŋno ah ŋhaa dai zah'nan rǝŋ koo zune mo re paŋgasso ma ne fan mbǝ̃ǝ ɓe, dǝɓ ah ka ga yea kǝsyil Israel a. 16 Ne zah'nan vaŋno ah we tai ka yii Masǝŋ ne ko. We joŋ ne zah'nan rǝŋ ah ta, we joŋ yeɓ zah'nan matǝ gwa rai ka, sai we joŋ farel nǝn mai moo kii koo zune daŋ to. 17 We yea ne joŋ fĩi paŋgasso ma bai fan mbǝ̃ǝre, mor pǝ zah'nan maino me pǝ̃ǝ ne we gin sǝr Egiɓ. We gbǝ ɓǝ zah'nan marai tǝgbana ɓǝ lai ma ga lii ŋhaa zahŋhǝǝtǝ̃ǝ ɓii daŋ. 18 Pǝ fĩi ma kǝpel ne zah'nan jemma tǝ nai ne lil ahe, we re paŋgasso ma bai fan mbǝ̃ǝ ne ŋhaa dai lil ne zah'nan jemma gwa tǝ vaŋno. 19 Tǝgǝǝ zah'nan rǝŋ fan mbǝ̃ǝ mo yea yaŋ ɓii ka, koo zune mo re paŋgasso ma ne fan mbǝ̃ǝ ɓe, koo gwǝǝre, koo dǝɓ ah mo byaŋ kǝsyil ɓiiri ka ga yeako kǝsyil Israel a. 20 We re fan ma ne fan mbǝ̃ǝ ka, pǝ cok kal ɓii daŋ we re fan ma bai fan mbǝ̃ǝre.

La vraie Pâques pour le chrétien

Les Juifs avaient mangé le premier repas de la paques en Egypte qui commémorait leur délivrance de la captivité (Exode 12 :27). Moise avait ordonné de célébrer cet évènement chaque année de et de l’appeler Pessa’h, ce qui signifie « Passer au-dessus ». C’était aussi la promesse d’un Messie à venir. Environs 1200-1400 ans après la première Pâque, Jésus déclara à ses disciples qu’il devait se souvenir de lui, alors qu’ils buvaient le vin et mangeaient le pain au cours du dernier repas de la Pâque qu’ils prenaient ensemble. La Pâque symbolise désormais la mort de Jésus et la délivrance du pécheur. « Car le Christ notre Pâque a été sacrifié » (1 Corinthiens 5 :7). La Pâques illustre le sacrifice accompli par Jésus en donnant son corps et son sang, afin que nous puissions être libéré du châtiment que méritaient notre péché contre le Dieu Saint. Le pain et le vin rappelle le corps et le sang du Christ donnés en sacrifice d’expiation. La Pâque suscite un profond respect pour le sacrifice du Christ. Il a donné sa vie pour nous. C’est une invitation à une communion quotidienne avec le Christ. Dieu nous invite à rompre avec le péché et à honorer le sacrifice de Jésus, en menant en permanence une vie de sainteté. Voilà les actes d’une Paque authentique. Nous n’avons plus à craindre la mort. Nous savons qu’a notre mort, nous quitterons notre corps pour le ciel. Nous avons commencé des maintenant une vie nouvelle qui se...

Plus

21 Mosus ɗii zaluu Israel daŋ, faa nyi ra: We ge woo wee gwii daidai za yaŋ ɓiiri, we ŋgom tǝ ɓǝ Paska. 22 We ɓaŋ jol kpuu hisoɓ ma ne goo maa ge pǝ syim pǝ tahsah ka we tah syim mai mo pǝ tahsah ge tǝ zahfah tǝkine kah ah gwa daŋ. Amma ka koo dǝɓ vaŋno kǝsyil ɓii mo pǝ̃ǝ zahfah ah ge lal ka, ŋhaa zah'nanne. 23 Mor ne cok Dǝɓlii mo ge tǝ kyãh ka in Egiɓien mo ge kwo syim tǝ zahfah yaŋ ne kah zahfah gwa daŋ ɓe, a ga zoo tǝ yaŋ ah soɓɓe, ka soɓ angelos ma ɓeɓ fan dan yaŋ ɓii ka ik we ya. 24 We gbǝ ɓǝ mai na ɓǝ lai mor ɓii ne wee ɓii ga lii ga lii. 25 We ge dai sǝr mai Dǝɓlii mo ga nyi nyi we tǝgbana ɓǝ faa ah ɓe, ka we yea ne joŋ fĩi ahe. 26 Ka wee ɓii mo fii we ɓǝ mai wo ɓii ɓǝ fẽe ye ne ɓe, 27

ka we zyii zah ɓǝǝ faa: Mai syiŋ Paska mǝ Dǝɓlii yo, mor ako zoo tǝ yaŋ za Israel ne cok mo ikko Egiɓien, amma ǝ̃ǝko yaŋ ɓuuru.

So za Israel keara ge sǝŋ ɗǝmra tǝtǝlli. 28 So urra kalle, ge joŋra na mai Dǝɓlii mo faa nyi Mosus ne Aron.

Masǝŋ ik welii sǝr Egiɓ ne mǝ faɓal daŋ

29 Ne kǝsyisuŋ Dǝɓlii ik welii sǝr Egiɓ daŋ tǝkine welii Farao mai moo ga kaa goŋ pǝ cok ah daŋ ŋhaa ne welii byak ma pǝ daŋgai tǝkine welii faɓal daŋ. 30 Farao ur ne kǝsyisuŋ ne za yeɓ ah tǝkine za sǝr Egiɓ daŋ, yera yee, yee malii yee pǝ sǝr Egiɓ. Mor yaŋ mai wul mo ka gŋ ya kǝka. 31 Ne suŋ moo ta, Farao ɗii Mosus ne Aron faa nyi ra: We gyo, awe ne za Israel daŋ we pǝ̃ǝ gin kǝsyil za ɓe, we ge juupel wo Dǝɓlii tǝgbana mai we faa. 32 We ge ne ŋgaɓ gwii ɓii tǝkine ŋgaɓ dǝǝ ɓii tǝgbana we faa, we fii Masǝŋ ka mo ẽeko me ta.

33 Egiɓien hǝǝ za Israel ka mo pǝ̃ǝra gin sǝr ɓǝǝ gwari, mor faara: Aru ga wuk daŋ. 34 Za Israel woora sum paŋgasso ɓǝǝ ma sãa ne bii mai mo ɓah rǝk fan mbǝ̃ǝ gŋ ya ba, koora fan sãa sum ah ne mbǝro ɓǝǝ rǝkra tǝbǝǝsahe. 35 Za Israel joŋra tǝgbana mai Mosus mo ree nyi ra, syeara fan sãh ma vãm solai, vãm kaŋnyeeri tǝkine mbǝro. 36 Dǝɓlii joŋ pǝsãh wo za Israel, Egiɓien joŋra gboŋgboŋ wo ɓǝǝra, lwaara fan mai mo syeara jol ɓǝǝra. Za Israel woora fan jol Egiɓien naiko.

Za Israel pǝ̃ǝra gin sǝr Egiɓ

37 Za Israel urra gin yaŋ Ramse kalra ge Sukot, pãa za ma syee ne ɓal tǝgbana ujenere temere yea, bai kee ŋwǝǝ ne wee nyeere. 38 Ban za camcam zolra kal ne ra ta, ara ne ŋgaɓ fan camcam tǝkine faɓal pǝlli. 39 Joŋra paŋgasso ma bai fan mbǝ̃ǝ ne sum mai mo pǝ̃ǝra gin sǝr Egiɓ ne ko, mai mo ɓah rǝkra fan mbǝ̃ǝ gŋ ya ba, mor nĩira ra gin sǝr Egiɓ, lwaara cok ul a, lwaara cok ɓaŋ farel mor fahlii ya ta.

40 Za Israel kyaŋra sǝr Egiɓ syii 430. 41 Ne cok syii 430 mo baa o, com moo ta, za Dǝɓlii daŋ pǝ̃ǝra gin sǝr Egiɓ. 42 Suŋ ah ye suŋ mai Dǝɓlii mo pǝ̃ǝ ne zan ah gin sǝr Egiɓ ne ko. Suŋ ah suŋ Dǝɓlii ye ga lii ga lii, ka za Israel mo gbǝra ɓǝ ah pǝsãhe.

Ɓǝ lai camcam tǝ fĩi Paska

43 Dǝɓlii faa nyi Mosus ne Aron: Ɓǝ lai tǝ fĩi Paska a naiko: Ka gwǝǝ mo re fan ah ka. 44 Amma dǝɓ mo lee byak ɓo ne lak mo so daakan nyi ko ɓe, ka mo reko. 45 Amma gwǝǝ ma ɗǝr yaŋ dǝɓɓi, tǝkine za ma joŋra yeɓ mor lakre, mo rera ka. 46 So farel Paska mo re ɓǝr yaŋ tǝ vaŋno, we ɓaŋ nǝǝ ah biŋ pǝ̃ǝ yaŋ ge lal ne ka, we dah woiŋ ah koo vaŋno ka ta. 47 Za Israel daŋ mo joŋra fĩi ahe. 48 Dǝɓ gwǝǝ mai mo ge kaa ɓo kǝsyil ɓiiri, mo ne 'yah joŋ fĩi Paska Dǝɓlii ɓe, sai za wǝǝ ah daŋ mo daara kanne, ka mo joŋko ba, a ga yeako na we sǝrri, amma gãhnyah ka ga re ya. 49 Ɓǝ lai tǝ we sǝr ne dǝɓ gwǝǝ ma ɗǝr yaŋ ɓii a tǝki vaŋno. 50 Za Israel joŋra na mai Dǝɓlii mo faa nyi Mosus ne Aron, joŋra na mooko. 51 Com moo ta, Dǝɓlii pǝ̃ǝ ne za Israel gin sǝr Egiɓ, pǝ̃ǝ ne ra gin gŋ ne pãa ɓǝǝ daŋ.