Jetro zyaŋ ne Mosus
1 Jetro bǝǝ Mosus pa joŋzahsyiŋ Midian laa ɓǝ yeɓ mai Masǝŋ mo joŋ ne Mosus tǝkine zan ah Israel ne mai Dǝɓlii mo pǝ̃ǝ ne ra gin sǝr Egiɓ daŋ. 2 Jetro bǝǝ Mosus ɓaŋ Zippora mawin Mosus mo yea soɓ ge ɓo yaŋ pam ne wee gwa, 3 ɗii vaŋno ne Gersom, tǝgba faa: Gwǝǝre. Mor Mosus faa: Ame ye mowoo tǝ sǝr gwǝǝre. 4 Ɗii maki ah ne Eleasar, tǝgba faa: Masǝŋ pa ɓe ye pa gbah jol ɓe. Mor faa: Masǝŋ pa ɓe ye pa gbah jol ɓe, ǝ̃ǝ me gin zah kafahe Farao. 5 Jetro bǝǝ Mosus ge wo Mosus kǝsyicok ne wee tǝkine mawin ah pǝ cok mai mo ɗǝrko ɓo gŋ kah waa Masǝŋ. 6 Jetro pepee faa nyi Mosus: Ame ye bǝǝ ɓo Jetro, me ge ɓo ne mawin ɓo tǝkine wee ɓo ra gwa daŋ. 7 Mosus pǝ̃ǝ ge zyaŋ tǝ bǝǝ ahe, kea sǝŋ pel ahe, zwǝ ko ne zah ta. Fiira ɓǝ jam ki, so kalra ge ɓǝr tal mbǝro swul Mosus. 8 Mosus kee ɓǝ yeɓ mai Dǝɓlii mo joŋ wo Farao ne mai mo joŋ wo Egiɓien daŋ mor za Israel nyi bǝǝ ahe, so kee ɓǝ bone mai mo zwǝra tǝ fahlii tǝkine ǝ̃ǝ mai Dǝɓlii mo ǝ̃ǝ ra daŋ nyi ko. 9 Jetro laa pǝ'nyah mor gboŋgboŋ mai Dǝɓlii mo joŋ wo za Israel, mo nǝǝko ra gin mor jol Egiɓien.
10 Jetro so faa: Osoko wo Dǝɓlii mai mo nǝǝ we gin mor jol Egiɓien ne mor jol Farao. 11 Zǝzǝ̃ǝko me tǝ ɓe, Dǝɓlii Masǝŋ kal masǝŋ ki ra daŋ ne yǝk ɓe, mor wǝǝ zan ah gin mor jol Egiɓien mo tǝ yiira suu tǝ ɓǝǝra. 12 So Jetro bǝǝ Mosus joŋ syiŋ suŋwii tǝkine syiŋ manyeeki ah wo Masǝŋ. Aron ge ne zaluu Israel daŋ ka ren farel ne bǝǝ Mosus pel Masǝŋ.
Mosus syen zaluuri
13 So tǝ'nan ah Mosus kaa ka ŋgoŋ kiita tǝ zana, za uura tǝ Mosus ne ɓal daga zah'nan ŋhaa lilli. 14 Bǝǝ Mosus kwo fan mai mo tǝ joŋko ne za daŋ, fii ko: Mo joŋ fẽe ne za sye mai mo kaa ɓo sǝŋ syak ɓo, ko za daŋ uura ɓo tǝ ɓo ne ɓal daga zah'nan ŋhaa com lil ko ne? 15 Mosus zyii zah bǝǝ ah faa: Za ginra wo ɓe mor ka fiira fan wo Masǝŋ. 16 Ɓǝ faa mo no tǝgǝǝ ɓǝǝ ɓe, a ginra wo ɓe ne ko, me ŋgoŋ ɓǝ ah kǝsyil dǝɓ ah ne naa pamme, me so cuu fahlii ɓǝ Masǝŋ ne ɓǝ lai ah nyi ra. 17 So bǝǝ ah faa nyi ko: Fan mai mo tǝ joŋ nyẽe sye, ka pǝsãh ya. 18 'Manna, amo tǝ ga jok suu ɓo ne za mai mo nora ne mo daŋ, fan makẽne mo kal tǝtǝl ɓo ɓe, mo ka gak syak ɓo ya. 19 Zǝzǝ̃ǝko mo syii sok tǝ ɓǝ faa ɓe, me cuu yella nyi mo ɗao, Masǝŋ mo yea ne mo ta. Amo, mo no pel Masǝŋ mor za nyẽe moo ginra ne ɓǝ ɓǝǝ wo Masǝŋ. 20 Mo cuu ɓǝ faa Masǝŋ ne ɓǝ lai ah nyi ra, mo cuu fahlii mai moo syeera gŋ nyi ra tǝkine yeɓ mai moo joŋra. 21 Amma mo syen za kǝsyil za nyẽe mai moo gakra fanne, ma ɗuura Masǝŋ, za matǝ goŋga tǝkine za ma bai nyiŋ lak jol za tǝ ɓǝ kiita, mo rǝk ra tǝtǝl zana, ka mo yeara zaluu tǝtǝl za ujenere ujenere, ne tǝ za temere temere, ne tǝ za jemma dappe jemma dappe, so ne tǝ za jemma jemma. 22 Ka mo ŋgoŋra kiita tǝ za ne cok daŋ, sai ka mo gera pel ɓo ne ɓǝ mayǝk ah to, ka ɓǝ manyee ah ra daŋ mo faara ne suu ɓǝǝra. Ne joŋ naiko a ga ɓaŋra faswaa ah ne mo, a ga yea wo ɓo pǝram. 23 Mo joŋ na mai ɓe, so Masǝŋ mo nyi fahlii ah nai ɓe, mo gak uu ne yeɓ ahe, za nyẽe daŋ laŋ a pii soora ga cok kal ɓǝǝ ne ɓǝ 'nyahre.
24 Mosus laa zah bǝǝ ahe, joŋ fan makẽne mo faako daŋ. 25 Mosus syen za mai moo gakra fan kǝsyil za Israel daŋ, rǝk ra na zaluu tǝ zana, zaluu tǝ za ujenere ujenere, ne tǝ za temere temere, ne tǝ za jemma dappe jemma dappe, ne tǝ za jemma jemma. 26 Ara yee ŋgoŋ kiita tǝ za ne cok daŋ, a ginra pel Mosus ne ɓǝ magaɓ ahe, amma ɓǝ manyee daŋ a ŋgoŋra ne suu ɓǝǝra.
27 So Mosus soɓ fahlii nyi bǝǝ ah kal fah sǝr ahe.
© Bible Moundang © Alliance Biblique du Tchad, 1996.
