Fahlii ka joŋ fan wo byakke
(CuuƁ 15:12-18)1 Ɓǝ lai mai ka mo kan pel ɓǝǝ a naiko: 2 Mo lee byak Yahuduyo ɓe, mo joŋko yeɓ byak syii yea. Ne patǝ rǝŋ syii ah mo soɓ fahlii nyi ko pǝ̃ǝ kal tǝkol bai wǝǝ tǝ suu ah ne lakre. 3 Mo geko ɓo syak ah ɓe, mo pǝ̃ǝko syak ah ta. Dǝɓ ah mo ne mawin ɓe, mawin ah mo pǝ̃ǝ ne ki daŋ. 4 Pah yaŋ ah ye mo nyi mawin ɓo nyi kan ɓe, ka mawin ne wee ah mo yea fan pah yaŋ ahe, mo pǝ̃ǝko syak ahe. 5 Amma byak mo faa zye 'yah pah yaŋ 'min ne mawin 'min ne wee 'min daŋ zye ka pǝ̃ǝ kal a ɓe, 6 ka pah yaŋ ah mo ge yaŋ juupel pel Masǝŋ ne ki, mo ge uuko zahfahe, koo zahtǝgǝǝɓelle, pah yaŋ ah mo ɓe' sok nyi ko ne guu, a joŋ byak nyi ko ga lii.
7 Dǝɓ mo lee fan ne mǝlaŋ ah mo ciŋko byak ɓe, ka ga pǝ̃ǝko tǝgbana byak za wǝǝ moo pǝ̃ǝra ya. 8 Ɓǝ ah mo 'nyah suu pah yaŋ ah mo kan ko ya ɓe, mo soɓ za ki wǝǝ tǝl ah ne lakre. Amma ako ka ne fahlii ka lee fan jol za gwǝǝ ne ya, mor joŋ ɓo ka pǝsãh wo mǝlaŋ ah ya. 9 Moo ga soɓ mǝlaŋ kaa ka byak wel ah ka kan ko ɓe, ka mo joŋko fan wol ah tǝgbana dǝɓ moo joŋ fan wo mǝlaŋ ɓo. 10 Mo ɓaŋko mawin maki ah kan ɓe, ka farel mǝlaŋ nyẽe ne fan wo suu ah ne zah fan ŋwǝǝ moo yea ne daŋ mo tǝr ge fal ka. 11 Mo joŋ zah fan tǝ sai rai wol ah ya ɓe, a no ne fahlii ka pǝ̃ǝ kal bai wǝǝ tǝl ah ne lakre.
Ɓǝ lai tǝ faɓe' camcam
12 Koo zune mo i dǝɓ ki pǝ wul ɓe, mo ira ko pǝ wul ta. 13 Amma dǝɓ mo i ko ɓo ka kee ya ɓe, me ga zyeɓ cok mor dǝɓ ah ka mo ɗuuko ge gŋ. 14 So dǝɓ ah mo fõo jǝk ah ɓo ka in ko ɓe' ɓe, koo mo ɗuuko ge swǝ ɓo pǝ cok joŋ syiŋ ɓe laŋ, we ge ɓaŋ ko gŋ i ge lalle.
15 Koo zune mo kan jol ge wo pah ah koo mah ahe, a ga ira ko pǝ wulli.
16 Koo zune mo kiŋ dǝfuu, mo lee fan ne ko, wala mo lwaara jol ahe, a ga ira ko pǝ wulli.
17 Koo zune mo tǝǝ pah ah wala mah ahe, a ga ira ko pǝ wulli.
18 Koo za mo tǝ joŋra bal wo ki, dǝɓ ki mo ɓoo dǝɓ ne tǝsal koo mo cẽe jol i ne ko, amma dǝɓ ah mo wǝ ya, mo swǝ sǝŋ ne syem ah to ɓe, ka mo ira pa in ah ge lal kao. 19 So dǝɓ ah mo ur kyãh ne sǝguu ɓe, sai pa in ah mo sooko yeɓ ah mai mo lwaa joŋko ya, mo gbahko jol ah ŋhaa laɓ ahe.
20 Dǝɓ mo i byak ah mawor koo mawin ne kǝndaŋne, mo wǝ mor jol ah ɓe, a ga ŋgoŋra kiita tǝl ahe. 21 So mo wǝko ya, joŋ zah'nan vaŋno koo gwa mo ge wǝ gur baa ɓe, ka ŋgoŋra kiita tǝl ah yao, mor lak ah yo.
22 Za mo tǝ ɗahra ki, mo so woora mawin ma ne ɓil ne ɓe, mo so byaŋ bai cok byaŋ ah mo ge, amma ɓeɓ mo kǝka gŋ ya ɓe, sai pa lah suu mo sooko soo tǝgbana wor mawin ah moo cuu, mo sooko pel za lakaali. 23 Amma ɓǝ ah mo ciŋ wul ɓe, sai mo sooko cee vaŋno zahwaa cee vaŋno. 24 Ɓǝ ɓeɓ maki ahe: nahnǝn mo soo nahnǝnni, syel mo soo syelle, jol mo soo jolle, ɓal mo soo ɓalle, 25 zuu dǝɓ ne wii mo soo ne zuu ne wii, kan syim wo dǝɓ mo soo ne kan syimmi, dǝɓ mo i dǝɓ cok ah mo fuuni, mo ira ko cok ah mo fuu ta.
26 Dǝɓ mo i nahnǝn nyi byak ah mawor koo mawin mo ɓeɓ ɓe, mo soɓko kal zahwaa nahnǝn ahe. 27 Mo haoko syel nyi byak ah mawor koo mawin ɓe, mo soɓko kal zahwaa syel ahe.
28 Ŋgǝǝri mo cuŋ dǝwor koo madǝwin ne ciŋ mo wǝko ɓe, mo ɓaara ŋgǝǝri ah ne tǝsalle, mo rera nǝǝ ah ka ta, amma pah ŋgǝǝri ah ka lwaa kiita ya. 29 Amma ŋgǝǝri ah moo juu suu ɓaa, so mo faara ɓǝ ah nyi pah ahe, pah ah mo saa ko ya ɓe, mo i dǝwor koo madǝwin pǝ wul ɓe, mo ɓaara ŋgǝǝri ah ne tǝsalle, so mo ira pah ah pǝ wulli. 30 Mo cuura soo nyi ko ka wǝǝ tǝ suu ah ɓe, mo sooko daŋ tǝgbana mai mo cuura ɓo nyi ko. 31 Koo mo cuŋko we wor ɓo koo mǝlaŋ win o, mo ŋgoŋra kiita ah tǝl ah tǝgbana maiko. 32 Amma ŋgǝǝri ah mo cuŋ byak maworre koo mawinni, sai dǝɓ ah mo soo vãm solai jemma jemma sai , mo ɓaara ŋgǝǝri ah ne tǝsalle.
33 Dǝɓ mo gbǝr zah lak soɓ ɓo gǝǝ, koo dǝɓ mo cii lak mo so coo zah ah ya ɓe, dǝǝ koo korro mo lee ge gŋ ɓe, 34 pah lak ga sosoo, a soo pa fan ah ne solai. Amma mo ɓaŋko wul fan ahe.
35 Ŋgǝǝri dǝɓ ki mo cuŋ ŋgǝǝri mǝ dǝɓ ki ŋhaa mo wǝ ɓe, ka mo leera fan ne ŋgǝǝri ma ne cee, mo woŋra lak ah kǝsyil ki, mo woŋra wul fan ah ta. 36 Amma mo tǝra ɓǝ juu suu ŋgǝǝri ah ɓo ɓaa ɓe, pah ah mo soo ŋgǝǝri zahwaa ŋgǝǝri, mo ɓaŋko wul fan ah ta.
© Bible Moundang © Alliance Biblique du Tchad, 1996.
