Mbǝro za joŋzahsyiŋrĩ
1 Dǝɓlii faa nyi Mosus: Mo ɗii naa ma ɓo Aron ne wee ah Nadaɓ, Abihu, Eleasar, ne Itamar kǝsyil za Israel ka mo joŋra zahsyiŋ ɓe. 2 Mo cur mbǝro nyi naa ma ɓo Aron ka cuu yǝk ahe, tǝkine sãh ahe. 3 Mo faa nyi za ma ne fatan joŋ yeɓɓe, mai me nyi yella ne fatan ɓo nyi ra, ka mo curra mbǝro nyi Aron, ka mo yeako dǝɓ pel ɓe, so ka mo joŋko zahsyiŋ ɓe. 4 Fan wo suu mai moo ga curra a naiko: fan saa zahbii, ɗaŋsikki, manto, mbǝro mawahe, zyim zahtǝtǝlli, tǝkine ganda. Ka mo curra mbǝro masãh marai mor naa ma ɓo Aron ne wee ah ra, ka mo joŋra zahsyiŋ ɓe ne ko. 5 Ka za fatan mo zyeɓra mbǝro ah ne suu ma joŋ ne vãm kaŋnyeeri, zyim syiŋ pǝsǝ̃ǝ makǝrãhmo, masyẽ ne masyẽ tǝ nyaknyak tǝkine zyim manikki.
6 Ka mo curra ɗaŋsikki ne suu ma joŋ ne vãm kaŋnyeeri ne zyim syiŋ pǝsǝ̃ǝ makǝrãhmo, ne masyẽ, ne masyẽ tǝ nyaknyak tǝkine zyim manikki, ka mo kaŋra fan tǝ zyim ah ta. 7 Mo joŋ fan tǝbǝǝsah gwa, zah ah ra gwa daŋ mo daira ki. 8 Ganda ne ɗaŋsikki yeɓ ɓǝǝ mo yea cok vaŋno, mo mgbãara ge wo ki vaŋno ta, zyim ganda mo yea tǝki ne mǝ ɗaŋsikki. 9 Mo woo tǝsal onikis gwa, mo ŋwǝǝ tǝɗii wee Yakuɓ jemma tǝtǝl gwa tǝl ahe, 10 tǝɗii za yea tǝ tǝsal vaŋno, tǝcoŋ tǝɗii ɓǝǝ matǝ yea marai laŋ mo yea tǝ tǝsal maki ahe, mo yea ne patǝtǝl tǝgbana byaŋ ɓǝǝra. 11 Mo ŋwǝǝ tǝɗii wee Yakuɓ tǝ tǝsal ah gwa daŋ tǝgbana pa ŋwǝǝ fan tǝ tǝsal ne pa zyeɓ tampon moo joŋni. Mo so ryaŋ tǝsal ah kiŋ ne vãm kaŋnyeeri cyõ. 12 Mo rǝk tǝsal rai gwa daŋ ge tǝbǝǝsah ɗaŋsikki gwa daŋ ta, ka mo yeara gŋ wo za Israel na tǝsal ma foo ɓǝ ne ko. Aron mo baŋ tǝɗii ɓǝǝ tǝbǝǝsah ah ra gwa daŋ pel Masǝŋ ka mo foo ɓǝ ɓǝǝra. 13 Mo joŋ tǝhal jer ma ne vãm kaŋnyeeri. 14 Mo joŋ gǝǝnyiŋ ma vãm kaŋnyeeri masãh gwa, mo jer na salle, ka mo gõm ge wo tǝhal ah ra.
Fan saa zahbii
15 Mo joŋ fan saa zahbii mai pa joŋzahsyiŋ moo gak tan 'yah Masǝŋ ne ko, fan joŋ ah mo yea tǝki ne ɗaŋsikki. 16 Wah ah ne 'ah ah daŋ mo yea zahki, mo so hãm tǝki gwa, wah ah mo lii ne malamlii ne wor jolle. 17 Mo lǝǝ tǝsal masãh ge gŋ, mo lǝǝ ne fahlii nai. Lǝǝ ah ma kǝpel ye mo yea tǝsal sardonik, gwa ah topas, sai ah emeral. 18 Patǝ gwa lǝǝ ah ye: karbukle, safir, ne diamon. 19 Patǝ sai lǝǝ ah ye: opal, agat, ne ametis. 20 Patǝ nai lǝǝ ahe: kristolit, onikis, tǝkine jaspis. Tǝsal ah ra mo lǝǝra ɓǝr tǝhal vãm kaŋnyeeri. 21 Tǝsal ah ra mo yea jemma tǝ gwa na tǝɗii wee Yakuɓ, mo ɗeara tǝɗii zahban Israel jemma tǝtǝl gwa tǝl ah vaŋno vaŋno daŋ. 22 Mo joŋ gǝnyiŋ ma vãm kaŋnyeeri masãh tǝ fan saa zahbii, mo jer tǝgbana jerre. 23 Mo joŋ tǝgaa vãm kaŋnyeeri gwa tǝ fan saa zahbii, mo maa tǝgaa nyẽe gwa ge zah fan saa zahbii ah gwa daŋ. 24 Mo mgbãa gǝnyiŋ vãm kaŋnyeeri ma jejer nyẽe gwa daŋ ge wo tǝgaa ah ra. 25 Mo gõm gǝnyiŋ ma jejer nyẽe gwa ge fah wo tǝhal jer matǝ gwa nǝn kǝki, ka mo sãa ge tǝbǝǝsah ɗaŋsikki ma fah kǝpelle. 26 Mo joŋ tǝgaa vãm kaŋnyeeri gwa, mo gõm ge tǝ nyah fan saa zahbii, tǝ nyah ah ma mor kǝsǝŋ ah kah ɗaŋsikki. 27 Mo so joŋ tǝgaa vãm kaŋnyeeri gwa, mo sãa ge wo fan ma haŋ ɗaŋsikki ma kǝpel nǝfah kǝmor kǝsǝŋ ahe, gwari ne zah zyaŋ ganda ɗaŋsikki tǝ kǝsǝŋ ahe. 28 Ka mo gõmra fan saa zahbii wo tǝgaa ah ra ma wo tǝgaa ɗaŋsikki ne sal zyim kǝrãhmo, ka fan saa zahbii mo kaa tǝ ganda, ka mo woŋra ki ne ɗaŋsikki ka.
29 Ne cok Aron mo dan ge pǝ cok matǝdaŋdaŋ ɓe, ka mo ɓooko fan saa zahbii mai tǝɗii zahban Israel matǝ jemma tǝ gwa mo ŋwǝǝ ɓo gŋ, ka ame Dǝɓlii me yea ne ɓǝ foo za ɓe. 30 Mo maa Urim ne Tummin ge pǝ fan saa zahbii, mo yeara tǝ zahzyil Aron ne cok moo ga danko ga pel ɓe Masǝŋ, ka mo tǝko ɓǝ foo ɓe ne ko mor za Israel.
Mbǝro manyeeki ah ma mor pa joŋzahsyiŋrĩ
31 Mo cuŋ manto ma mor ɗaŋsikki ne zyim syiŋ pǝsǝ̃ǝ makǝrãhmo. 32 Zahsol ah mo yea kǝsyil ahe, mo kaŋ zahsol ah kiŋ ne daɗaari tǝgbana zahsol mbǝro salle, ka mo ŋgǝ̃ǝko ka. 33 Tǝɓal ah sǝŋ mo zyeɓ fan gǝrlǝŋ gǝrlǝŋ tǝgbana lee dakulokki, ne zyim kǝrãhmo, zyim syẽ tǝkine masyẽ tǝ nyaknyak kiŋ tǝ ɓal ah zyaŋ daŋ, tǝkine tǝroŋ tǝgǝǝ ah vaŋno vaŋno daŋ. 34 Tǝroŋ vãm kaŋnyeeri vaŋno, fan ma na lee dakulok gŋ vaŋno ta, tǝroŋ vãm kaŋnyeeri vaŋno, fan ma na lee dakulok gŋ vaŋno ta, ŋhaa mo kiŋ mor kǝsǝŋ manto daŋ. 35 Ka Aron mo ɓoo wo suu ka joŋ yeɓ mor ɓe Masǝŋ ne cok moo ga danko pel ɓe cok matǝdaŋdaŋ, so ka mo tǝ pǝ̃ǝko lal ɓe laŋ, za mo laara cii tǝroŋ ah ra, ka mo wǝko ka.
36 Mo joŋ fan pǝgwah tǝgbana tol ne vãm kaŋnyeeri masãhe, mo ɗea fan mai tǝl ahe: Fan ah a mor Dǝɓlii. 37 Mo gõm ge wo zyim zahtǝtǝl ne jer zyim kǝrãhmo, ka mo yea wo zyim zahtǝtǝl nǝfah kǝpelle. 38 Ka tol ah mo yea zahpel Aron cẽecẽe, ka koo za Israel mo zyakra fahlii ne nyi fan joŋ syiŋ ɓǝǝ wo ɓe laŋ, ka ame Dǝɓlii me rõm nyiŋ fan ahe.
39 Mo cuŋ mbǝro pǝŋwǝǝ ne zyim manikki, mo joŋ zyim zahtǝtǝl ne zyim manik ta, tǝkine ganda ah daŋ, mo kaŋ fan tǝ ganda ahe.
40 Mo cur mbǝro nyi wee Aron ne ganda tǝkine njokki, mor yǝk ne sãh ɓǝǝra. 41 Mo ɓaa mbǝro ah ra nyi naa ma ɓo Aron tǝkine wee ahe, mo syee nǝm tǝ ɓǝǝra, mo nǝǝ ra nyi me ka mo joŋra zahsyiŋ ɓe. 42 Mo cur oosãh ma ne zyim fãi nyi ra ka mo riira zahmorkol ɓǝǝ ne ko, oosãh ah ra mo ur daga sãhe ŋhaa tǝɓalmuŋgulli. 43 Aron ne wee ah mo saara oosãh ah ra ne cok moo ga danra ga pǝ tal mbǝro ma taini, koo ne cok mai moo ga gera gwari ne cok joŋ syiŋ ka joŋ yeɓ pǝ cok matǝdaŋdaŋ, ka mo joŋra ɓǝɓe' mai moo 'nahm wul ge tǝ ɓǝǝ ne ka. Ɓǝ ah ɓǝ lai ma ga lii ye mor Aron ne wee ah tǝkine morsǝ̃ǝ ah ra.
© Bible Moundang © Alliance Biblique du Tchad, 1996.
