Nǝǝra Aron ne wee ah mor yeɓ za joŋzahsyiŋrĩ
(Lew 8:1-36)1 Yeɓ mai moo ga joŋ ka mo nǝǝ ra nyi me ka mo joŋra zahsyiŋ ɓe a naiko: Mo ɓaŋ we ŋgǝǝri ne kǝbǝr ma suu sãh gwa. 2 Mo joŋ paŋgasso ma bai fan mbǝ̃ǝre, mo suu sum ah ne nǝm tǝbaakãmme, mo joŋ manyeeki ah bai nǝmmi, mo so joŋ manyeeki ah pǝgwahe, mo rwah nǝm ge wol ah ra. Mo joŋ fan ah ra daŋ ne sum alkamaari manikki. 3 Mo rǝk ge pǝ col tǝ vaŋno mo ɓaŋ we ŋgǝǝri tǝkine kǝbǝr matǝ gwa kŋ ka mo joŋ syiŋ ne ko zahki daŋ.
4 Mo woo Aron ne wee ah ge zahfah tal mbǝro ma tai ne ra, ka mo er bii nyi ra gŋ. 5 Mo woo fan wo suu ka mo ɓoo mbǝro mawah ah ne manto ma mor ɗaŋsikki, ɗaŋsikki ne fan saa zahbii nyi Aron, mo baŋ nyi ko ne ganda ɗaŋsikki ma kaŋ sãhe. 6 Mo kim zyim zahtǝtǝl nyi nyi, mo saa fan ma na tol kŋ ge tǝ zyim zahtǝtǝl ahe. 7 Mo so ɓaŋ nǝm ma syee tǝtǝl mo syee ge tǝl ahe.
8 Mo ge wo wee ahe, ka mo ɓaa mbǝro mawah nyi ra. 9 Mo bam ganda nyi ra, mo so maa njok nyi ra ta. Mo woo Aron ne wee ah rǝk tǝ yeɓ joŋzahsyiŋ naiko, ara ne wee ɓǝr ɓǝǝ a ga yeara ne yeɓ mai ga lii ga lii.
10 Mo gbǝ ŋgǝǝri ge zah tal mbǝro ma tai ne ko, Aron ne wee ah mo rǝkra jol ɓǝǝ tǝ ŋgǝǝri ahe. 11 Mo ŋgoŋ ŋgǝǝri ah pel ɓe Dǝɓlii gŋ. 12 Mo saŋ syim ŋgǝǝri ne tǝwee jolle, mo tah ge tǝ ciŋ mai mo tǝ cok joŋ syiŋrĩ, mo sǝǝ tǝcoŋ syim ah ge mor ɓal cok joŋ syiŋ sǝŋ. 13 Mo ɓaŋ nǝm tǝ ɓǝr daŋ, mo ɓaŋ nǝm tǝ zyii ta, mo woo nyee gwa daŋ tǝkine nǝm tǝl ahe, mo syak ne wii. 14 Amma mo syak nǝǝ ŋgǝǝri, wak ah tǝkine mǝr ɓǝr ah ne wii fahfal cok ɗǝr lalle, syiŋ ma rwah faɓe' za joŋzahsyiŋ ga lal yo.
15 Mo ɓaŋ kǝbǝr kŋ vaŋno, ka Aron ne wee ah mo rǝkra jol ɓǝǝ tǝtǝl ahe. 16 Mo ŋgoŋ kǝbǝr ahe, mo ɓaŋ syim ah mo mee tǝ cok joŋ syiŋ tǝ nyah ah nai daŋ. 17 Mo jak nǝǝ kǝbǝr ahe, mo vãh ɓǝr ah ne ɓal ah ra, mo rǝk ge tǝ ma jak ah mai mo jak ɓo tǝkine tǝtǝl ah daŋ. 18 Ka mo syak kǝbǝr ah tǝɗe' daŋ tǝ cok joŋ syiŋrĩ, syiŋ suŋwii ye wo ɓe, me laa fuŋ ah pǝ'nyahre.
19 Ka mo so ɓaŋ kǝbǝr ah maki ahe, kǝbǝr ah a mor yeɓ nǝǝ Aron tǝkine wee ah mor yeɓɓe. Aron ne wee ah mo rǝkra jol ɓǝǝ tǝl ah ta. 20 Ka mo ŋgoŋ kǝbǝr ahe, mo saŋ syim ah kan ge naa sok jokǝsãh Aron tǝkine naa sok jokǝsãh wee ahe, mo saŋ kan ge malamlii jokǝsãh ɓǝǝ tǝkine malamlii ɓal jokǝsãh ɓǝǝra, mo sah tǝcoŋ syim ah ge tǝ cok joŋ syiŋ daŋ. 21 Mo so saŋ syim matǝ cok joŋ syiŋrĩ, mo saŋ nǝm syee tǝtǝlli, mo mee ge tǝtǝl Aron ne tǝ mbǝro ah ra tǝkine tǝtǝl wee Aron ne mbǝro ɓǝǝ daŋ ta. Ne fahlii mai Aron ne wee ah ne mbǝro ɓǝǝ daŋ mo yeara wo ɓe mor yeɓɓe.
22 Mo ɓaŋ nǝm kǝbǝrri, sǝ̃ǝ ahe, nǝm tǝ ɓǝr daŋ, ne matǝ zyiiri, mo woo nyee gwa daŋ tǝkine nǝm tǝ ɓǝǝra ne ɓal jokǝsãhe. 23 Mo nǝǝ zahban paŋgasso matǝ sai kŋ vaŋno vaŋno daŋ: paŋgasso ma ne nǝm vaŋno, ma bai nǝm vaŋno, magwah laŋ vaŋno pǝ cok mai mo pel ɓe. 24 Mo rǝk fan nyẽe daŋ gee Aron jol ne wee ah ra, ka mo yimra pel ɓe, mor syiŋ fan ma yiyim wo ɓe. 25 Mo so nyiŋ jol ɓǝǝra, mo syak ne wii tǝ cok joŋ syiŋrĩ tǝ syiŋ suŋwii, mor syiŋ ah syiŋ ma farel o, me laa pǝ'nyah ne fuŋ ahe.
26 Mo ɓaŋ pel kǝbǝr mai mo ŋgoŋ ɓo mor ka kan Aron tǝ yeɓ ne ko, ka mo nyi nyi me, ka fan ah zah ma ɓo yo.
27 Ne cok mo nǝǝra pa joŋzahsyiŋ mor yeɓ ɓe nai ɓe, ka mo nyira pel kǝbǝr ah ne ɓal jokǝsãh ah nyi me, fan ah mo yea zah fan mǝ za joŋzahsyiŋrĩ. 28 Ne cok za ɓe mo tǝ joŋra syiŋ ma nyi jam wo ɓe ɓe, ka mo nyira pel kǝbǝr ah ne ɓal jokǝsãh ah nyi za joŋzahsyiŋ cẽecẽe, ɓǝ lai ɓe ma ga lii yo. Fan nyi mai za moo nyi nyi me Dǝɓlii yo.
29 Ne cok Aron mo wǝ ɓe, ka mo woora mbǝro ah nyi nyi wee ahe, ka mo ɓaara ge wo suu ne cok mai mo ga nǝǝra ra mor yeɓ ɓǝǝra. 30 Wel ah mai moo ga yea pa joŋzahsyiŋ pǝ cok ahe, ga ɓaa mbǝro ah ra ga wo suu tǝgǝǝ zah'nan rǝŋ, ako yee ga dan pǝ tal mbǝro ma taini, ka joŋ yeɓ pǝ cok matǝdaŋdaŋ.
31 Mo ɓaŋ nǝǝ kǝbǝr mai mo ŋgoŋra kan Aron ne wee ah tǝ yeɓ ne ko, mo kǝǝ nǝǝ ah cok matǝdaŋdaŋ maki ahe. 32 Ka Aron ne wee ah mo rera nǝǝ kǝbǝr ah zahfah tal mbǝro ma taini, ne paŋgasso mai mo coŋ ɓo pǝ col kŋ. 33 Ka mo rera fan joŋ syiŋ ma rwah faɓe' ɓǝǝ ga lalle, ne cok mai moo nǝǝra za mor yeɓɓe. Za kol mo re fan ah ra ka, mor fan ɓe Masǝŋ yo. 34 Tǝcoŋ nǝǝ ah ne paŋgasso ah mo dai zah'nan ɓe, mo syak ne wii, dǝɓ mo re ka, mor fan ɓe yo.
35 Mo joŋ yeɓ kan Aron ne wee ah tǝ yeɓ tǝgǝǝ zah'nan rǝŋ tǝgbana mai me faa nyi mo. 36 Zah'nan daŋ mo joŋ syiŋ ne we ŋgǝǝri mor rwah faɓe'. Syiŋ ah ga vãh cok joŋ syiŋ pel ɓe pǝsãhe. Fahfal ah mo so syee nǝm tǝbaakãm ge tǝl ah ka mo yea daŋdaŋ. 37 Mo joŋ yeɓ mai tǝgǝǝ zah'nan rǝŋ. Mo joŋ nai ɓe, cok joŋ syiŋ ga yea daŋdaŋ. Koo fẽene daŋ mo juu cok joŋ syiŋ ah ɓe, ka ɓǝ no.
Syiŋ ma joŋ zah'nan daŋ
(KeeZ 28:1-8)38 Fan mai mo ga joŋ syiŋ ne tǝ cok joŋ syiŋ wo ɓe a naiko: Mo joŋ ne wee pǝsǝ̃ǝ ma joŋ syii tǝ vaŋno zah'nan daŋ gwa gwa. 39 Ne zah'nan mo joŋ syiŋ ne we pǝsãhm vaŋno, ne lil mo joŋ syiŋ ne we pǝsãhm vaŋno ta. 40 Mo joŋ syiŋ ne we pǝsãhm ma kǝpel ne sum nik nǝn yǝk kilo vaŋno, mo suuki ne nǝm tǝbaakãm nǝn liitǝr vaŋno. So mo rǝk syiŋ fazwan liitǝr vaŋno ge tǝ cok joŋ syiŋ ta. 41 Mo joŋ syiŋ ne we pǝsãhm patǝ gwa ah ne cok tǝ foofoo, mo joŋ tǝgbana syiŋ sum ma ne zah'nan ne na syiŋ ma zwan ah ta. Ma nyẽe ye fan nyi ma farelle, me laa fuŋ ah pǝ'nyahre. 42 Syiŋ suŋwii a ga joŋ kǝsyil zahŋhǝǝtǝ̃ǝ ɓii pel ɓe zahfah tal mbǝro ma tai ga lii, pǝ cok mai mee ga zyaŋ ne we gŋ ka faa ɓǝ ne we. 43 Me ga zyaŋ ne we za Israel gŋ, yǝk ɓe ga sǝ̃ǝ gŋ pǝfãi, cok ah ga yea daŋdaŋ. 44 Me ga nǝǝ tal mbǝro ma tai ne cok joŋ syiŋ daŋ ka mo yea ma ɓe. Me ga nǝǝ Aron tǝkine wee ah gŋ ka mo joŋra zahsyiŋ ɓe. 45 Me ga kaa kǝsyil za Israel, me ga yea Masǝŋ ɓǝǝra. 46 A ga tǝra ame ye Dǝɓlii Masǝŋ ɓǝǝra, mai mo pǝ̃ǝ ne ra gin sǝr Egiɓ mor ka me kaa kǝsyil ɓǝǝra. Ame ye Dǝɓlii Masǝŋ ɓǝǝra.
© Bible Moundang © Alliance Biblique du Tchad, 1996.
