Fahlii tǝǝ syiŋ ɓǝrdi
1 Mo joŋ cok joŋ syiŋ ma tǝǝ ɓǝrdi ne kpuu akasia. 2 Wah ah mo i jol vaŋno, 'ah ah mo i jol vaŋno ta, wah ah ne 'ah ah mo yea zahki, giŋ ah mo i jol gwa, ciŋ ah ra mo mgbãa ge wo cok joŋ syiŋrĩ. 3 Mo syee vãm kaŋnyeeri masãh ah tǝl ahe, kahlaa ahe, ŋhaa mo kiŋ ne ko ne ciŋ ah ra daŋ, mo joŋ tǝkee ah kiŋ daŋ ne vãm kaŋnyeeri. 4 Mo joŋ tǝgaa vãm kaŋnyeeri gwa mor kǝsǝŋ kahlaa ah tǝkee ah gwa, ka maa kpuu zǝǝ ma ɓaŋ ah gŋ. 5 Mo joŋ kpuu zǝǝ ah ne kpuu akasia, mo syee vãm kaŋnyeeri ge wol ahe. 6 Mo kan cok joŋ syiŋ pel zyim rii cok nǝfah kǝlal ah kah sunduku gbanzahe, pǝ cok mai mee ga zyaŋ ne mo gŋ. 7 Aron mo tǝǝko ɓǝrdi fan fuŋ 'nyah zah'nan daŋ tǝl ahe, ne cok mo tǝ kanko wii nyi pitǝrla ra. 8 Ne cok mo tǝ kan wii nyi pitǝrla ne lil laŋ, mo joŋko nai ta, ka zahŋhǝǝtǝ̃ǝ ma fahfal ɓii mo tǝǝra nai pel Dǝɓlii cẽecẽe. 9 We tǝǝ ɓǝrdi wala joŋ syiŋ ne faɓal tǝkine syiŋ ma farel ne ma fazwan maki ah cam tǝ cok joŋ syiŋ ɓe ka. 10 Aron mo joŋ syiŋ ma vãh cok joŋ syiŋ pel ɓe pǝsãh ɓal vaŋno pǝ syii. Ka Aron mo syee syim faɓal mai mo kan ɓo ka rwah faɓe' ge tǝ ciŋ cok joŋ syiŋ tǝ nyah ah nai daŋ. Fan ah mo joŋ nai syii daŋ ga lii ga lii, ka cok joŋ syiŋ mo yea daŋdaŋ mor ɓe Dǝɓlii.
Fahlii ka dǝɓ mo soo tǝ suu ahe
11 So Dǝɓlii faa nyi Mosus: 12 Ne cok mo tǝ ga ŋwǝǝ za Israel ka tan pãa ɓǝǝra, koo zune daŋ mo sooko soo mor cee suu ah wo ɓe, mor ka ɓeɓ mo ge tǝ ɓǝǝ ne cok ŋwǝǝ suu ka. 13 Koo zune mo keera ko ɓo ge zyil za pãa daŋ mo nyiko lak mai za moo ga cuu nyi ko , ka lak ah mo nyi ne fahlii ah njaŋ. Za daŋ ga soora lak ahe, a ga nyira nyi me tǝgbana fan nyini. 14 Koo zune mo keera ko ɓo ge zyil za pãa daŋ, tǝgba faa dǝɓ ma ne syii jemma gwa koo ma kal tǝl ahe, mo nyiko fan nyi nyi me. 15 Ne cok mo tǝ nyira fan nyi wo Masǝŋ ka soo mor cee ɓǝǝra, ka pa joŋ mo nyi kal tǝl ah ka, pa syak laŋ mo pee bai baa ah ka. 16 Mo nyiŋ lak soo mor cee suu mai jol za Israel, mo kan fan ah mor ka joŋ yeɓ tal mbǝro ma taini, ka lak soo mor cee suu ɓǝǝ mo yea wo ɓe ka me foo ɓǝ za Israel zah'nan daŋ.
Daaro
17 Dǝɓlii faa nyi Mosus: 18 Mo joŋ daaro ne vãm syẽ ne ɓal ah daŋ mor vãh fanne. Mo kan tǝgǝǝ tal mbǝro ma taini ne cok joŋ syiŋrĩ, mo rǝk bii ɓǝr ahe. 19 Ka Aron ne wee ah mo vãhra jol ne ɓal ɓǝǝ gŋ. 20 So ne cok moo ga danra ga pǝ tal mbǝro, koo ne cok mo ga gera gwari ne cok joŋ syiŋ ka joŋ yeɓ syiŋ ma farel wo Dǝɓlii, mo erra bii, ka mo wukra ka. 21 Mo vãhra jol ɓǝǝ tǝkine ɓal ɓǝǝ naiko, ka mo wukra ka. Ɓǝ ah ɓǝ lai ma ga lii ye wo Aron ne wee ah tǝkine zahŋhǝǝtǝ̃ǝ ɓǝǝ daŋ.
Nǝm ma syee tǝtǝlli
22 Dǝɓlii faa nyi Mosus: 23 Mo ɓaŋ fan gbãh ma lee gaɓɓe, zwah ma nen yǝk kilo yea, fan fuŋ ma ɗii ne kanel ma nen yǝk kilo sai, tǝkine vǝ̃ǝ ma nen yǝk kilo sai ta. 24 So ɓǝrdi kassia ma nen yǝk kilo yea tǝkine nǝm tǝbaakãm nǝn liitǝr nai. 25 Ka mo joŋ nǝm ma syee tǝtǝl ne ko, tǝgbana fan fuŋ 'nyah ma suuki mai pa joŋ ɓǝrdi moo joŋni, a ga yea nǝm syee ga tǝtǝl masãhe. 26 Mo syee ge tǝ tal mbǝro ma taini, ne tǝ sunduku gbanzahe. 27 Mo syee ge tǝ taabǝl ne fan yeɓ ah ra daŋ ne pitǝrla ne fan yeɓ ah ra tǝkine cok joŋ syiŋ ɓǝrdi, 28 ne cok joŋ syiŋ suŋwii tǝkine fan yeɓ ah ra daŋ, ne daaro ne ɓal ahe. 29 Mo nǝǝ fan ah ra cam mor yeɓɓe, ka mo yeara daŋdaŋ, fan makẽne daŋ mo juu fan ah ɓe, ka ɓǝ no. 30 Mo syee nǝm ah ge tǝ Aron tǝkine wee ahe, mo nǝǝ ra rǝk cam mor yeɓɓe, ka mo joŋra zahsyiŋ ɓe. 31 Mo faa nyi za Israel sye: Nǝm ah a ga yea nǝm syee ga tǝtǝl masãh wo ɓe, kǝsyil zahŋhǝǝtǝ̃ǝ ɓii daŋ. 32 Mo syee nǝm ah ge tǝ za hai ka, we joŋ nǝm ki ma jur ne mai ka, fan matǝdaŋdaŋ yo, mo yea nai wo ɓii ta. 33 Koo zune mo joŋ nǝm ma jur maino, wala koo zune mo kan ge wo dǝɓ ki cam ɓe, ka keera dǝɓ ah kǝsyil za ɓe yao.
Ɓǝ tǝǝ ɓǝrdi
34 Dǝɓlii faa nyi Mosus: Mo ɓaŋ fan gbãh camcam tǝgbana sitorak, onike ma'nyahre, galbanum, tǝkine ɓǝrdi pǝzyil kpuu, mo lii fan ah zahki zahki, 35 mo joŋ ɓǝrdi ne ko, mo suuki ne ko na mai pa joŋ ɓǝrdi moo joŋni, mo ɓoo tǝm ge gŋ ka fan ah mo yea pǝsãh wo ɓe, mo yea daŋdaŋ. 36 Mo nǝǝ ge gŋ mo swah pǝnik ɓokɓokki, mo kan pel sunduku gbanzah pǝ tal mbǝro ma taini, cok mai mee ga zyaŋ ne mo gŋ, fan ah ga yea fan sãh malii wo ɓiiri. 37 We joŋ ɓǝrdi ma mor suu ɓii jur ne ka, mo yeako pǝsãh wo ɓii mor fan ah a mor yeɓ ɓe. 38 Koo zune mo joŋ fan fuŋ 'nyah ma jur ki ne maino, ka keera dǝɓ ah kǝsyil za ɓe yao.
© Bible Moundang © Alliance Biblique du Tchad, 1996.
