Masǝŋ ŋgoŋ kiita tǝ ɓǝ syee mor masǝŋ ki ra
1 Comki zaluu Israel manyeeki ah gera wo ɓe ka fii me tǝ ɓǝ mai mo na 'yah Masǝŋ. 2 So Dǝɓlii faa nyi me: 3 We dǝfuu, za mai soɓra zahzyil ɓǝǝ ɓo nyi masǝŋ ki ra, a soɓra masǝŋ ki ra kǝǝ ra joŋ faɓe' a lǝŋra me ga zyii ɓǝ zah ɓǝǝ ne?
4 Mo faa nyi ra, ame Dǝɓlii Masǝŋ me faa sye: Dǝɓ Israel makẽne daŋ mo soɓ zahzyil ah nyi nyi masǝŋ ki ra, mor kǝǝ ko joŋ faɓe' so mo ge wo profeto Masǝŋ ka fii ko ɓe, ame Dǝɓlii me ga zyii ɓǝ zah ah ne suu ɓe, tǝgbana pãa masǝŋ ki ah ra moo syeeko mor ahe. 5 Masǝŋ ki rai joŋra zahzyil za Israel soɓra me ɓoo, amma ɓǝ ɓe mee ga zyii a ga fer zahzyil ɓǝǝra.
6 Mor ahe, mo faa nyi za Israel, ame Dǝɓlii Masǝŋ me faa: We fer fan joŋ ɓiiri, we soɓ ɓǝ maɓea ah mai wee joŋ daŋ.
7 Mo dǝɓ Israel o, wala mo dǝɓ gwǝǝ mai mo ge kaa ɓo kǝsyil za Israel o, mo soɓ me ɓoo mo kal tǝ syee mor masǝŋ ki ra, so mo ge fii profeto ɓe maki ah mor ka tan ɓǝ mai me tǝ 'yah ɓe, ame Dǝɓlii me ye ga zyii ɓǝ zah ah ne suu ɓe. 8 Me ga joŋ ki ne dǝɓ ahe, me ga joŋ ko na fan ma cuu fanne, me ga muŋ tǝtǝl ah gin kǝsyil za ɓe, so we ga tǝ, ame ye Dǝɓlii.
9 Profeto Masǝŋ vaŋno mo kal zyak zyii ɓǝ ne zah syak ah ɓe, ka ame Dǝɓlii me ye soɓ ko joŋ ɓo, me ga muŋ tǝtǝl ah gin kǝsyil za Israel. 10 Profeto ah ne dǝɓ mai mo ge fii ko, a ga lwaara kiita zahki gwa daŋ. 11 Me ga joŋ naiko, ka za Israel mo woŋra ki ne me pǝɗǝk ka, ka mo ɓeɓra suu ɓǝǝ ne faɓe' camcam kao. Amma a ga yeara za ɓe, ame ye ga yea Masǝŋ ɓǝǝra. Ame Dǝɓlii Masǝŋ me faa naiko.
Noa, Daniel, ne Joɓ
12 Dǝɓlii faa nyi me: 13 We dǝfuu, koo mo za sǝr makẽne yo, mo joŋra ɓǝɓe' ne joŋ fan ma ne vǝrvǝr ah wo ɓe ɓe, me ga ɓeɓ cok mai moo taira farel ɓǝǝ gŋ, me ga pee koŋ ge, ka mo ik dǝfuu ne faɓal sǝr ah daŋ pǝ wulli. 14 Koo za masãh ah matǝ sai, Noa, Daniel ne Joɓ mo kaara ɓo kǝsyil ɓǝǝ laŋ, a ga ǝ̃ǝra cee suu ɓǝǝ to. Ame Dǝɓlii me faa naiko.
15 Wala me ga pee fafyãh cok ik za sǝr ah pǝ wulli, sǝr ah ga ciŋ cok kolle, za ka gak syeera gŋ ya jol mai fafyãh mo gŋ. 16 Koo za matǝ sai mo kaara ɓo gŋ laŋ, ame Dǝɓlii Masǝŋ ma ne cee me faa, ara ye ga yea ne cee to, ka gak ǝ̃ǝra wee ka syak ɓǝǝ laŋ ya. Sǝr ah ga ciŋ cok kolle.
17 Wala me ga pee sal ge tǝ sǝr ahe, me ga nyi fahlii nyi za sal kyãh pǝ sǝr ah daŋ, ka ik dǝfuu ne faɓal daŋ pǝ wulli. 18 Koo za matǝ sai mo kaara ɓo pǝ sǝr ah laŋ, ame Dǝɓlii Masǝŋ ma ne cee me faa, ka gak ǝ̃ǝra wee ka syak ɓǝǝ laŋ ya, sai a ǝ̃ǝra cee suu ɓǝǝ to.
19 Wala me ga pee syem maɓe' ah ge tǝ sǝr ah ik dǝfuu ne faɓal daŋ pǝ wulli. 20 Koo Noa, Daniel ne Joɓ mo kaara ɓo kǝsyil za sǝr ah laŋ, ame Dǝɓlii Masǝŋ ma ne cee me faa, goŋga ɓǝǝ ga ǝ̃ǝ cee suu ɓǝǝ to, ka gak ǝ̃ǝra wee ka syak ɓǝǝ laŋ ne ya.
21 So Masǝŋ Dǝɓlii faa nyi me: Me ga pee bone camcam nai ge tǝ yaŋ Jerusalem: salle, koŋne, fafyãh cokki, tǝkine syem maɓe' ah ka ik dǝfuu ne faɓal daŋ. 22 A ga coŋ za ki ne cee ne wee ɓǝǝra, a ga pǝ̃ǝra gin yaŋ ah ga wo ɓii pǝ byak zah sǝr zana. Ne cok we kwo syel ɓǝǝ ne fan joŋ ɓǝǝ ɓe, we ga tǝ sǝ, bone mai me pee ge tǝ yaŋ Jerusalem a ne fahlii ahe. 23 So we ga tǝ, fan mai me joŋ daŋ me joŋ ɓo ka tǝkol a. Ame Dǝɓlii Masǝŋ me faa naiko.
© Bible Moundang © Alliance Biblique du Tchad, 1996.
