1 So me laa kyaŋ faa: We dǝfuu, mo ur uu sǝŋ, me ga faa ɓǝ nyi mo. 2 Ne cok kyaŋ mo faa ɓǝ nyi me, Tǝ'yak Masǝŋ dan pǝzyil ɓe, ɓaŋ me ur uu sǝŋ, so me laa kyaŋ tǝ faa ɓǝ nyi me: 3 We dǝfuu, ame pee mo ɓo wo za Israel, wo za ma ŋwoora kyaŋ, ŋwoora kyaŋ soɓra me ɓoo ɓo, ŋhaa zǝzǝ̃ǝko, ŋwoora kyaŋ ɓo ga 'wa, tǝgbana mai pa ɓǝǝ lii mo joŋra. 4 Tǝtǝl ɓǝǝ ne zahzyil ɓǝǝ daŋ pǝyakke. Ka zyiira yii me ya, ame pee mo wo ɓǝǝra, ka mo ge faa ɓǝ mai ame Dǝɓlii Masǝŋ me pee mo ɓo ne ka faa nyi ra. 5 Za ŋwookyaŋ rai mo laara ɓǝ faa ɓo, koo mo zyii ka laara ya daŋ, a ga tǝra, profeto Masǝŋ no kǝsyil ɓǝǝra.
6 Amma, amo we dǝfuu, mo ɗuu gal ɓǝǝ ka, mo ɗuu gal ɓǝ faa ɓǝǝ ka ta. Ka ga laara ɓǝ ɓo pǝ'nyahr a, a ga syẽara mo, a ga yea wo ɓo tǝgbana dǝɓ moo kaa kǝsyil dǝweri. Mo ɗuu gal za ŋwookyaŋ rai ka, mo ɗuu gal ɓǝ faa ɓǝǝ ka ta. 7 Mo ge faa ɓǝ mai me pee mo ɓo ne ka faa nyi ra, mo laara ɓǝ faa ɓo, mo zyii ka laara ya daŋ. Mo tǝ, ara ye za ŋwookyaŋ. 8 We dǝfuu, mo laa ɓǝ mai me tǝ faa nyi mo, mo ŋwookyaŋ na ra ka. Mo gbǝr zah ɓo, ka mo re fan mai me tǝ ga nyi nyi mo.
9 Me kwo jol nyen ge ɓo wo ɓe, ɗerewol macẽe ah gŋ. 10 Jol ah gbǝr ɗerewol macẽe ahe, so me kwo ɗerewol ah ŋwǝǝ ɓo kǝita kǝita. Ɓǝ ma nǝǝ zahzyilli, ne ɓǝ swaani, tǝkine bone ŋwǝǝ ɓo gŋ.
© Bible Moundang © Alliance Biblique du Tchad, 1996.
