1 Masǝŋ faa: We dǝfuu, mo re ɗerewol macẽe ah nyẽeko, so ka mo ge faa ɓǝ nyi za Israel. 2 So me gbǝr zahe, nyi ɗerewol macẽe ah nyi me ka renne. 3 Faa nyi me: We dǝfuu, mo re ɗerewol macẽe ah mai me nyi ɓo nyi mo, ka mo sahɓ ɓǝr ɓo ne ko. Me re, a pǝ zah ɓe pǝjẽe tǝgbana tǝnjwǝǝre.
4 So Masǝŋ faa nyi me: We dǝfuu, mo ge wo za Israel, mo faa ɓǝ mai me faa ɓo nyi mo nyi ra. 5 Me pee mo ɓo ka wo za mai moo faara zah za ki mai moo yea pǝgaɓ ya, amma me pee mo ɓo wo za Israel. 6 Me pee mo ɓo wo za mapãa ah mai moo faara zah ki cam magaɓ ah mai mo ka laa ya ɓe, a ga laara ɓǝ faa ɓo. 7 Amma za Israel ka ga zyii laara ɓǝ faa ɓo ya, mor ka tǝ 'yahra laa ɓǝ faa ɓe ya. Tǝtǝl ɓǝǝ ne zahzyil ɓǝǝ daŋ pǝyakke. 8 Zǝzǝ̃ǝ me ga joŋ moo yea ne tǝtǝl pǝyak ne pǝgaɓ tǝgbana ra, 9 me ga joŋ moo uu pǝswah na pǝɗakka, mo ga yea pǝyak tǝgbana tǝsal ma ɗii ne diamon, mo ɗuu gal za ŋwookyaŋ rai ka.
10 Masǝŋ syee ge pel ne ɓǝ, faa: We dǝfuu, mo syii sok laa pǝsãhe, mo foo ɓǝ mai daŋ me tǝ faa nyi mo. 11 Mo ge wo za ɓii mai mo woora ra kal ge ɓo pǝ byak ne ko, ka mo faa ɓǝ mai ame Dǝɓlii Masǝŋ me faa ɓo nyi ra, mo laara zah ɓo, mo laara ya daŋ.
12 So Tǝ'yak Masǝŋ ɓaŋ me, me laa kyaŋ cii fahfal ɓe pǝ'man faa: Osoko Dǝɓlii mayǝk mo no coksǝŋ. 13 Me so laa yee fan ma ne cee ra kŋ mo tǝ inra ga wo ki zahswãh sǝŋ, tǝkine cii ɓal muŋta dǝǝ kŋ, a cii pǝ'man tǝgbana sǝr tǝ cocoo. 14 Swah Dǝɓlii ge tǝtǝl ɓe pǝ'manne, Tǝ'yak ah ɓaŋ me kal ne ko, zahzyil sye me, me ɓaŋ kpãh pǝlli. 15 So me ge dai Tel-Abiɓ kah el Kebar pǝ cok mai za mai mo woora ra kal ge ɓo pǝ byak ne, mo kaara ɓo gŋ. Me kaa gŋ kǝsyil ɓǝǝ zah'nan rǝŋ, tǝtǝl jin me pǝryak jol fan mai me kwo ne ɓǝ mai me laa ɓo.
Dǝɓlii ɓaŋ Ezekiel kan pa byak cok ne ko
(Eze 33:1-9)16 Fahfal zah'nan rǝŋ mo pǝ̃ǝ kal o, Dǝɓlii faa ɓǝ nyi me: 17 We dǝfuu, ame kan mo ɓo na pa byak cok nyi za Israel, ka mo lai ra ne ɓǝ mai mee ga faa nyi mo daŋ. 18 Tǝgbana me faa dǝɓ ɓe' a ga wuu, amma mo lai ko ka mo soɓko fahlii ɓe' ah ka mo ǝ̃ǝko cee suu ah ya ɓe, a ga wǝ tǝ ɓǝ faɓe' ah ra, so me ga rǝk ɓǝ wul ah tǝtǝl ɓo. 19 Amma mo lai dǝɓ ɓe', so mo zyiiko soɓ joŋ ɓǝɓe' ah ya ɓe, a ga wǝ tǝ ɓǝ faɓe' ahe, amma ka ma ɓo mo ǝ̃ǝ suu ɓo ɓe.
20 Amma dǝɓ sãh mo tǝŋ joŋ faɓe', so me soɓ ko dan gaɓ ne ɓǝ ahe, mo lai ko ya ɓe, a ga wǝ tǝ ɓǝ faɓe' ah ra, me ka foo ɓǝ ɓǝ sãh mai mo joŋko ya, me ga rǝk ɓǝ wul ah ga tǝtǝl ɓo. 21 Amma mo lai dǝɓ sãh ka mo joŋko faɓe' ka, so mo laako zah ɓo, mo joŋko faɓe' ya ɓe, a ga yea sǝŋ ne cee, so ka mo laŋ mo ǝ̃ǝ suu ɓo ɓe.
Ezekiel ka ga faa ɓǝ ya
22 So me laa yǝk jol Dǝɓlii mo kan ge tǝtǝl ɓe, faa nyi me: Mo urri, mo ge pǝ cok ma tǝforoŋ ahe, me ga faa ɓǝ nyi mo gŋ.
23 So me ur kal ge pǝ cok ma tǝforoŋ ahe, me ge kwo yǝk Dǝɓlii gŋ na mai me kwo kah el Kebar kŋ. So me lee ge sǝŋ me ɗǝŋ zahpel ge tǝ sǝrri. 24 Amma Tǝ'yak Masǝŋ ge dan pǝzyil ɓe, so ɓaŋ me ur uu sǝŋ. So Dǝɓlii faa nyi me: Mo dan ge ɓǝr yaŋ ɓo, ka mo coo zahfah ge tǝ suu ɓo. 25 We dǝfuu, za ga baŋra mo gŋ ne salle, mor ka mo gak pǝ̃ǝ ge wo za lal ka. 26 Me ga mgbãa tǝrĩi ɓo, mor ka mo gak lai za ŋwookyaŋ rai ka. 27 Amma ne cok mee so ga faa ɓǝ nyi mo, me ga gbǝr zah ɓo, ka mo gak faa ɓǝ, so mo ga faa ɓǝ mai ame Dǝɓlii Masǝŋ me faa ɓo nyi mo nyi ra. Za ki kǝsyil ɓǝǝ a ga laara ɓǝ faa ɓo, amma za ki ka ga laara ya, mor ara ye za ŋwookyaŋ.
© Bible Moundang © Alliance Biblique du Tchad, 1996.
