Goŋ sǝr Egiɓ a tǝgbana syii
1 Ne zah'nan patǝ vaŋno, pǝzyil fĩi jemma tǝtǝl gwa ahe, ne syii jemma tǝtǝl gwa ah ru pǝ byak zah sǝr zana, Dǝɓlii faa ɓǝ nyi me, 2 faa: We dǝfuu, mo lai goŋ sǝr Egiɓ ne ɓǝ mai me pee mo ɓo ne ko, mo faa nyi ko sye: Amo joŋ fan kǝsyil za sǝr tǝgbana ɓolle, amma mo jur syii mai mo pǝ bii ɓo, amo kpãa bii ne ɓalle, mo joŋ wõm pǝ̃ǝ mor bii ah zoo gin sǝŋ. 3 Ne cok za sǝr camcam mo taira ge ɓe, me ga gbǝ mo ne jin ɓe, me ga soɓ ra kwak mo ge zahtǝkea ne ko. 4 Me ga ɓaŋ mo ɓoo ga tǝ sǝr zahgeere, me ga ɗii juu ne fafyãh wo sǝr daŋ ge, ka mo ryakra nǝǝ ɓo. 5 Me ga pahl nǝǝ ɓo myah tǝ waa ra ne pǝ cok ma tǝforoŋ ah ra daŋ ka mo syer cwǝ̃ǝre. 6 Me ga joŋ syim ɓo ɗuu ŋhaa a muŋ waare, a baa jol el ra daŋ. 7 Ne cok me muŋ mo ɓe, me ga joŋ coksǝŋ foo pǝfuu, ŋwǝǝmǝŋgai ka ga sǝǝ ya, me ga joŋ swãh jǝŋ comme, fĩi ka ga sǝǝ ya ta. 8 Me ga cak cokfãi ma coksǝŋ daŋ ka sǝǝ ya, me ga joŋ cokfuu ge tǝ sǝr ɓo. Ame Dǝɓlii Masǝŋ me faa naiko.
9 Ne cok me myah ɓǝ lee ɓo ge pǝ sǝr camcam mai mo tǝ taa ya ɓe, za pǝlli ga ɗuura galle. 10 Fan mai me joŋ wo ɓo, ɓǝ ah ga joŋ za pǝlli ɗuura galle. Ne cok me daɓ kafahe ɓe, za goŋ sǝr camcam ga coora ne gal coo. Com mai mo leere, zune daŋ a ga coo ne gal coo jol mai mo tǝ foo ɓǝ cee suu ahe.
11 Ame Dǝɓlii Masǝŋ me tǝ faa nyi mo goŋ sǝr Egiɓ: Goŋ sǝr Babilon ga cee za ɓo ne kafahe. 12 Me ga pee sooje za mai mo kalra za sǝr daŋ ɓo ne gaɓ a ga ceera za ɓo daŋ pǝ wul ne kafahe. Za ɓo tǝkine fan mai moo yii suu ɓo tǝ ɓǝ ah daŋ a ga vǝrri. 13 Me ga ik dǝǝ ɓo mai mo zahbii Nil daŋ pǝ wulli. Dǝfuu ne faɓal daŋ ka ga yeara ka so wõm bii faɗa yao. 14 Me ga joŋ bii ɓo ra yakke, a ga syil yea pǝsãhe, bii pǝ el ɓo ra ka ga ɗuu ne swah ya. Ame Dǝɓlii Masǝŋ me faa naiko. 15 Ne cok me joŋ sǝr Egiɓ ciŋ cok kol me vǝr za mai mo gŋ daŋ ɓe, a ga tǝra, ame ye Dǝɓlii. 16 Lai magaɓ mai a ga ciŋ lǝŋ yeyee wulli, ŋwǝǝ sǝr camcam a ga ɗǝǝra lǝŋ ah ka yeyee wul Egiɓ ne ko, ne zan ahe. Ame Dǝɓlii Masǝŋ me faa naiko.
Cok mai za wul mo gŋ
17 Ne zah'nan jemma tǝtǝl dappe, pǝzyil fĩi patǝ vaŋno, ne syii jemma tǝtǝl gwa ah ru pǝ byak zah sǝr zana, Dǝɓlii faa ɓǝ nyi me, 18 faa: We dǝfuu, mo yeyee wul za sǝr Egiɓ, mo pee ra ne za maswah ah maki ah ra ge mor sǝr pǝ cok mai za wul mo gŋ. 19 Mo faa nyi ra: We lǝŋ we kal za ki ɓe ne? We ga mor sǝr pǝ cok mai za wul mo gŋ, we ga kaa gŋ ŋhaa ne za bai daakan raiko.
20 Za sǝr Egiɓ a ga leara ga kǝsyil za mai mo ikra ra pǝ wul zah salle, a ga ikra ra daŋ pǝ wulli. 21 Zaluu sooje maswah ah ra, ne za mai mo ruura sal tǝkǝ̃ǝ Egiɓien, a ga faara ɗah syee o nyi Egiɓien pǝ cok mai za wul mo gŋ, a ga ɓyaŋra ɓǝ faa: Awe za bai daakan mai za mo ik we pǝ wul zah salle, we ɗǝr ge nyeeno, swahra ɓo nyẽeno!
22 Goŋ Asiria no gŋ ne sooje ah ra, pal sooje ah ra ryaŋ pal mǝ ah ɓoo ɓo kǝsyilli, daŋ ikra ra ɓo pǝ wul zah salle. 23 Pal ɓǝǝ a pǝ cok maɗǝk tǝ ɓoroo ah pǝ cok mai za wul mo gŋ, ikra sooje ah ra daŋ pǝ wul zah salle, pal ɓǝǝ ryaŋ pal mǝ ah ɓoo ɓo kǝsyilli. Pǝtãa yea tǝ joŋra za mai mo kaara ɓo wo sǝr mai dǝfuu ma ne cee mo gŋ ɗuu galle.
24 Goŋ sǝr Elam a no gŋ ne za sal ah ra, pal sooje ah ra ryaŋ pal mǝ ah ɓoo ɓo kǝsyilli, ara daŋ ikra ra zah salle. Za bai daakan rai yea tǝ joŋra za mai mo kaara ɓo pǝ sǝr mai dǝfuu ma ne cee mo gŋ ɗuu galle, zǝzǝ̃ǝ kalra ge mor sǝr ɓe, tǝ kwanra swãa gŋ ŋhaa zahki ne za wul manyeeki ah daŋ. 25 Goŋ Elam kal ge mor sǝr kǝsyil za mai mo ikra ra pǝ wul zah sal mo gŋ, pal sooje ah ra ryaŋra ko ɓoo ɓo kǝsyilli, ara daŋ za bai daakan ye ra, daŋ ikra ra pǝ wul zah salle. Ne cok mo yeara sǝŋ ne cee, yea tǝ joŋra za ɗuu galle, amma zǝzǝ̃ǝko tǝ kwanra swãa gŋ zahki ne za mai mo ikra ra zah salle.
26 Goŋ sǝr Mesek ne Tubal no gŋ ŋhaako, pal sooje ɓǝǝ ryaŋ pal ma ɓǝǝ ɓoo ɓo kǝsyilli, ara daŋ za bai daakan ye ra, daŋ ikra ra pǝ wul zah salle. Pǝtãa yea tǝ joŋra za mai mo kaara ɓo wo sǝr ɗuu galle. 27 Ciira wul ɓǝǝ pǝyǝk na mǝ zaluu sooje ma kǝpel ra ya, ma ɓǝǝ kalra ge pǝ cok mai za wul mo gŋ ne fan sal ɓǝǝ daŋ, rǝkra kafahe ɓǝǝ ge sǝŋ kanra tǝtǝl tǝl ahe, so jǝmra bal ɓǝǝ ge tǝ suu ɓǝǝra. Za maswah rai yea tǝ joŋra za mai mo kaara wo sǝr ɗuu galle.
28 Egiɓien laŋ a ga swahra kǝsyil za ma bai daakan mai mo ikra ra pǝ wul zah sal nai ta.
29 Sǝr Edom no gŋ ne za goŋ ah ra tǝkine zaluu ah ra, ara ye yea sooje maswah ahe, amma zǝzǝ̃ǝko, ge swahra ɓo mor sǝr pǝ cok mai za wul mo gŋ, tǝkine za ma bai daakan mai mo ikra ra pǝ wul zah salle.
30 Zaluu ma pel za ma fahsǝŋ daŋ ara gŋ, Sidonien gŋ ta, kalra ge lwaa za ma wul ɓo mor sǝrri, tǝ kwanra swãa gŋ, ge swahra ɓo gŋ ne za ma bai daakan mai mo ikra ra pǝ wul zah salle. Pǝtãa za maswah rai yea tǝ joŋ ra za ɗuu gal ɓǝǝra.
31 Ne cok goŋ sǝr Egiɓ mo kwo za mai mo ikra ra pǝ wul zah sal nai ɓe, ɓǝ ah ga swaa zahzyil nyi ko tǝ ɓǝ wul mǝ ah ne za sal ahe. Ame Dǝɓlii Masǝŋ me faa naiko.
32 Ame soɓ goŋ sǝr Egiɓ gaɓ za mai mo no sǝŋ ne cee, amma a ga ira ko pǝ wul ne sooje ah ra daŋ, a ga swahra mor sǝr kǝsyil za ma bai daakan mai za mo ik ra pǝ wul zah salle. Ame Dǝɓlii Masǝŋ me faa naiko.