Za kǝpii Israel
1 Dǝɓlii faa ɓǝ nyi me, 2 faa: We dǝfuu, mo faa ɓǝ nyi zaluu za Israel, mo faa ɓǝ fan mai mo tǝ ga joŋ wo ɓǝǝ nyi ra, mo faa ɓǝ fan mai ame Dǝɓlii Masǝŋ me tǝ faa ɓǝ ah nyi ra: Ɓǝ gaɓ tǝtǝl ɓiiri za kǝpii za Israel! Awe pii suu ɓiiri, amma we ka tǝ pii ŋgaɓ fan ɓii ra ya. 3 Awe zwah won ɓǝǝra, we ɓaa mbǝro mai mo cuŋra ɓo ne syiŋ ɓǝǝra, so we ŋgom maŋwoo ah we ren nǝǝ ahe, amma we ka pii ra ya. 4 We ka ɓaŋ syiŋ matǝ jok ah ra ya, we ka ẽe mai syem mo joŋ ɓo ya, mai ɓal ah mo hao ɓo we ka gban nyi ya. We ka tai mai mo myahra ɓo ya, we ka kyeɓ mai mo mokra ɓo ya ta. Awe so joŋ ra pǝɓe' jeertǝ. 5 Pǝsǝ̃ǝ ka ne pakǝpii ya, mor ah myahra ɓo haihai, fafyãh cok gbah ra, a ren nǝǝ ɓǝǝra. 6 Pǝsǝ̃ǝ ɓe a kyãhra tǝgǝǝ waa ne pǝ cok ma tǝgee ah ra, myahra ɓo wo sǝr ne lii ah daŋ. Dǝɓ ma ɓaŋ syiŋ ɓǝǝ wala ka kyeɓ ra kǝka.
7 Awe za kǝpii, we laa ɓǝ mai ame Dǝɓlii me tǝ faa nyi we. 8 'Manna, tǝgbana me ye Masǝŋ ma ne cee, pǝram we laa ɓǝ faa ɓe. Fafyãh cok gbah pǝsǝ̃ǝ ɓe, ik ra pǝ wulli, ryakra nǝǝ ɓǝǝra, mor za pii ɓǝǝ kǝka. Za kǝpii fan ɓe ge kyeɓra pǝsǝ̃ǝ ɓe ya, tǝ yiira suu ɓǝǝra, ɓaŋra syiŋ ɓǝ pǝsǝ̃ǝ ya. 9 Awe za kǝpii, we laa ɓǝ faa ɓe, ame Dǝɓlii Masǝŋ me tǝ faa nyi we sye: Me ga joŋ ki ne we, me ga nĩi pǝsǝ̃ǝ ɓe gin jol ɓiiri. 10 Me ka fǝ̃ǝ soɓ we pii ra yao, mor ka we soɓ ra myah ka so pii suu ɓii ka. Me ga ǝ̃ǝ pǝsǝ̃ǝ ɓe gin mor jol ɓiiri. Me ka soɓ we ryak nǝǝ ɓǝǝ ya.
Pakǝpii sãhe
11 Ame Dǝɓlii Masǝŋ me tǝ faa nyi we, me ga kyeɓ pǝsǝ̃ǝ ɓe ra ne suu ɓe, so me ga byak ra 12 tǝgbana pakǝpii fan moo ɓaŋ syiŋ ɓǝ pǝsǝ̃ǝ ah mai mo myah ɓo, moo so taira ga wo ki faɗa. Me ga tai ra gin pǝ cok mai mo myahra ge ɓo gŋ daŋ, ne zah'nan bone. 13 Me ga woo ra gin pǝ sǝr za gwǝǝre, me tai ra ga wo ki, me pii soo ge pǝ sǝr ma ka syak ɓǝǝ ne ra, me ga zaŋ ra jin ge tǝ waa Israel, ne zahbii ah ra ne ko, me ga pii ra gŋ pǝ cok pii fan masãhe. 14 Me ga pii ra pǝ cok pii fan masãh ahe, cok pii ɓǝǝ ga yea tǝwaa Israel, a ga cwãara gŋ pǝ cok pii fan masãhe, so a ga urra pii tǝ wom mapǝ̃ǝ ah pǝ cok pii fan tǝwaa Israel. 15 Ame ye ga pii pǝsǝ̃ǝ ɓe ne suu ɓe, so me ga kyeɓ cok cõo nyi ra. Ame Dǝɓlii me faa naiko.
16 Me so ga kyeɓ tǝcoŋ ah mai mo mok ɓo, me ga tai mai mo myah ɓo pii soo ne ko, me ga gbǝ ɓal ah mai mo hah ɓo, me ga laɓ mai mo ne syemme, amma mai mo ŋwaa ɓo mo pǝswahe, me ga muŋ ra, mor ame ye pakǝpii fan mai moo joŋ fan ne fahlii ahe.
17 So awe ŋgaɓ fan ɓe, ame Dǝɓlii Masǝŋ me tǝ faa nyi we, me ga ŋgoŋ kiita tǝ ɓii vaŋno vaŋno daŋ, me ga woŋ kǝsyil masãh ah ra ne maɓea ahe, me ga woŋ kǝsyil pǝsǝ̃ǝ ne sǝgwiiri. 18 Manyeeki ah kǝsyil ɓii we tǝ ren wom masãh ah kŋ no, kii ya ne? Mor fẽe we so dah tǝcoŋ ah ne ɓal ne? Awe zwah ɓii masãh ahe, so we wõm mai we zwǝ ya. 19 Pǝsǝ̃ǝ ɓe manyeeki ah a ga rera wom mai we dah ne ɓalle, a ga zwahra bii mai we wõmme.
20 Mor ah ame Dǝɓlii Masǝŋ me tǝ faa nyi we, me ga woŋ kǝsyil pǝsǝ̃ǝ maswah ah ra ne matǝ jok ahe. 21 Awe waa ma ne syem ah ra kǝsyil ŋgaɓ fan ga lalle, we juu ra ne ciŋ. 22 Amma me ga ǝ̃ǝ pǝsǝ̃ǝ ɓe, me ka soɓ za joŋ ra pǝɓe' faɗa yao. Me ga ŋgoŋ kiita tǝ pǝsǝ̃ǝ ɓe vaŋno vaŋno daŋ, me ga woŋ tǝgǝǝ masãh ah ne maɓea ahe. 23 Me ga nyi goŋ ma na dǝɓ yeɓ ɓe David nyi ra, ka ko ye mo yea pakǝpii ɓǝǝ vaŋno to, a ga ẽe ra pǝsãhe. 24 Ame Dǝɓlii me ye ga yea Masǝŋ ɓǝǝra, goŋ tǝgbana dǝɓ yeɓ ɓe David, ako ye ga yea pa ma kal pel ɓǝǝra. Ame Dǝɓlii me faa naiko. 25 Me ga gbǝ zah ne ra tǝ ɓǝ kaa jam. Me ga nĩi fafyãh ma gban fan daŋ pǝ sǝr ah ga lalle, mor ka pǝsǝ̃ǝ ɓe mo yeara cok jam, mo swahra pǝzyil kpuu lalle.
26 Me ga ẽe ra, me ga soɓ ra uu ryaŋ kah waa ɓe mai mo nǝǝ ɓo mor ɓe, me ga tǝ bam nyi ra gŋ ne cok ah mai mo tǝ 'yahra. 27 Kpuu ga lee syẽmme, 'wah laŋ a ga joŋ fakpãhpǝǝ, zune daŋ a ga kaa pǝ sǝr ah jam. Ne cok me hah celeelu jol za ɓe ge lal me wǝǝ ra jol za mai mo gbahra ra ɓo na byak myah ɓe, so a ga tǝra, ame ye Dǝɓlii. 28 Zahban maki ah ra ka gin ɗaŋ ra faɗa yao, fafyãh cok ka ga gbah ra ryak nǝǝ ɓǝǝ yao, a ga kaara jam, koo dǝɓ vaŋno ka ga joŋ ra ɗuu gal faɗa yao. 29 Me ga nyi 'wah masãh ah ma joŋ fan lii nyi ra, me ga joŋ ka koŋ mo yea pǝ sǝr ah ka. Za ki ka ga syẽa ra faɗa yao. 30 Zune daŋ a ga tǝ, me tǝ byak za Israel, mor ara ye za ɓe. Ame Dǝɓlii Masǝŋ me faa naiko.
31 Awe pǝsǝ̃ǝ ɓe, ŋgaɓ fan mai me tǝ piini, awe ye za ɓe, me ye Masǝŋ ɓiiri. Ame Dǝɓlii Masǝŋ me faa naiko.
© Bible Moundang © Alliance Biblique du Tchad, 1996.
