Dǝɓlii ga ŋgoŋ kiita tǝ masǝŋ ki ra
1 Dǝɓlii faa ɓǝ nyi me: 2 We dǝfuu, mo ɓaŋ nahnǝn ẽe waa Israel ra, ka mo faa ɓǝ ɓe nyi ra. 3 Mo faa nyi waa Israel daŋ mo syiira sok laa ɓǝ faa Dǝɓlii, mo laara ɓǝ mai ame Dǝɓlii Masǝŋ me tǝ faa nyi waa ne geere, ne el tǝkine cok ma tǝforoŋ ah ra daŋ. Me ga pee sal ge ka ɓeɓ cok mai daŋ za moo juura pel wo masǝŋ ki ra gŋ. 4 A ga dahra cok joŋ syiŋ ah ra ga sǝŋ, a ga 'walra cok tǝǝ ɓǝrdi ah ra ga lal ta. Me ga ik za mai mo gŋ daŋ pel masǝŋ ki ɓǝǝra. 5 Me ga myah wul za Israel haihai, me ga myah woiŋ ɓǝǝ ryaŋ cok joŋ syiŋ ɓǝǝ ra ɓoo kǝsyil ne cyõ. 6 Yaŋ maluu pǝ sǝr Israel daŋ a ga ɓeɓɓe, cok joŋ syiŋ ɓǝǝ ne masǝŋ ki ah ra daŋ a ga dah laŋ na summi, cok tǝǝ ɓǝrdi ɓǝǝ ra daŋ a ga 'wal ga lalle, fan mai mo zyeɓra ɓo zyeɓ daŋ a ga vǝrri. 7 A ga ikra za pǝ sǝr ah cok camcam pǝ wulli, za mai mo coŋra ɓo sǝŋ ne cee daŋ, a ga tǝra, ame ye Dǝɓlii.
8 Me ga soɓ za ki kǝsyil ɓii ǝ̃ǝ zah wulli, a ga myahra kǝsyil za sǝr camcam. 9 A ga kaara kǝsyil za mai mo woora ra ge ɓo gŋ ne ko, so a ga foora ɓǝ ɓe gŋ ŋhaako, a ga tǝra, ame ye ŋgoŋ kiita ɓo tǝ ɓǝǝ me cuu swãa ɓǝǝ ɓo, mor zahzyil ɓǝǝ soɓ me ɓoo, so kal tǝ syeera mor masǝŋ ki ra. So a ga syiŋra ɓǝ maɓe' ah ne fan maɓea ah mai mo joŋra ɓo ne suu ɓǝǝra. 10 A ga tǝra, ame ye Dǝɓlii, lai ɓe me tǝ lai ra ne ko, kyẽm ye ka.
11 Masǝŋ Dǝɓlii faa: Mo kǝ̃ǝ jol ge wo ki, mo kǝ̃ǝ ɓal ge tǝ sǝrri, ka mo ɓyaŋ ɓǝ mo faa, kaiya za mana, tǝ ɓǝɓe' za Israel ne fan maɓea ah mai daŋ mo joŋra. A ga wukra zah salle, ne koŋne, tǝkine syem maɓe' ahe. 12 Za mai ara mo lal pǝɗǝkki, a ga wukra ne syem maɓe' ahe. Za mai mo gwari, sal ga ik ra. Za mai mo ǝ̃ǝra mo coŋra ɓo sǝŋ ne cee laŋ, koŋ ga ik ra pǝ wulli. A ga laara yǝk kpãh ɓe me ɓaŋ ɓo tǝtǝl ɓǝǝ naiko. 13 Wul ɓǝǝ ga myah kǝsyil masǝŋ ki ɓǝǝ ra kah cok joŋ syiŋ ɓǝǝ ryaŋ kiŋ cyõ, a ga myah pǝ cok ma tǝgee sǝŋ ah ra, ne tǝlǝǝ waare, mor kpuu mapǝ̃ǝ ah ra, ne maluu ahe, ne pǝ cok mai daŋ moo joŋra syiŋ suŋwii wo masǝŋ ki ɓǝǝ ra gŋ. So za daŋ a ga tǝra, ame ye Dǝɓlii. 14 Oho, me ga cuu swah ɓe tǝ ɓǝǝ me ɓeɓ sǝr ɓǝǝra. Me ga joŋ cok ah na cok kolle, tǝŋ daga kǝsyicok ma fah morkǝsǝŋ sǝr ahe, ŋhaa ka ga dai yaŋ Ribla ne fahsǝŋ, ka coŋ cok mai za Israel mo kaara ɓo gŋ ya. So za daŋ a ga tǝra, ame ye Dǝɓlii.
© Bible Moundang © Alliance Biblique du Tchad, 1996.
