Bone Jerusalem
1 So me laa Masǝŋ ɓyaŋ ɓǝ ne kyaŋ pǝ'man faa: Awe za mai we tǝ ga cuu bone nyi yaŋ nyẽeko, we ge, we woo fan sal ma ɓeɓ yaŋ ah mor jolle. 2 Me so kwo za yea, ɓaŋra fahlii ma ga zahfah yaŋ Masǝŋ ma nefah kǝsǝŋ ɓo tǝ ginra, zune daŋ ɓaŋ fan sal ɓo mor jolle, so me kwo dǝɓ ki kǝsyil ɓǝǝ ɓoo mbǝro mafãi ah ɓo, so ɓaŋ fan ŋwǝǝ fan ɓo, ka ŋwǝǝ fan tǝl ahe. Ara daŋ ge uura kah cok joŋ syiŋ ma ne vãm syẽ. 3 So yǝk Masǝŋ zol gin tǝtǝl cerubim mai mo yea gŋ, kal ge zahfah yaŋ Masǝŋ. Dǝɓlii ɗii dǝɓ mai mo ɓoo mbǝro mafãi ah ɓo. 4 Faa nyi ko: Mo ge kyãh tǝgǝǝ yaŋ Jerusalem daŋ, ka mo kan lamba zahpel za mai mo tǝ 'meera tǝkine yeyee tǝ ɓǝ fan maɓea ah mai mo tǝ joŋra yaŋ nyẽe daŋ.
5 Me so laa Masǝŋ faa nyi tǝcoŋ za maki ahe: We syee ge mor dǝɓ ah tǝgǝǝ yaŋ ah daŋ, we ik za yaŋ ah ra pǝ wulli, we yee syak tǝ dǝɓ ka, we kwo syak tǝ dǝɓ vaŋno ka ta. 6 We ik za matam ah ra, ne wee tǝbanna, wee maŋwǝǝre, ne ŋwǝǝ luuri, ne ŋwǝǝ macuuri, tǝkine wee manyee daŋ. Amma we juu koo dǝɓ vaŋno kǝsyil za mai mo ne lamba zahpel ka. We tǝŋ gin ɓǝr yaŋ ɓe nyee sǝ. So tǝŋra ik zaluu mai mo uura ɓo zah yaŋ Masǝŋ.
7 Masǝŋ so faa nyi ra: We ii yaŋ Masǝŋ, we ik wul baa zahpiicel ah kǝrkǝrri. We ge joŋ yeɓɓe! So tǝŋ ikra za mai mo yaŋ Jerusalem pǝ wulli.
8 Ne cok mo tǝ ikra za ganne, ame kaa syak ɓe. Me so ɗǝŋ zahpel ge tǝ sǝrri, me ɓyaŋ ɓǝ faa: Masǝŋ Dǝɓlii, mo 'yah ka vǝr za Israel mai mo coŋra ɓo ne ɓaŋ kpãh pǝ'man tǝ yaŋ Jerusalem nai ne? 9 Masǝŋ zyii zah ɓe faa: Za Israel ne za Yuda daŋ joŋra faɓe' ɓo pǝ'manne, ikra wul ɓo pǝ sǝr nyẽe ne lii ah daŋ, baara yaŋ Jerusalem ɓo ne ɓǝ maɓea ah gǝɓɓi. A faara, Dǝɓlii soɓ sǝr ɓǝǝ ɓoo ɓe, ka kwo ra yao. 10 Amma me ka ga kwo syak tǝ ɓǝǝ ya, me ga joŋ wo ɓǝǝ na mai mo joŋra wo za ki ta.
11 So dǝɓ mai mo ɓoo mbǝro ɓo pǝfãi kŋ pii soo, ge kee ɓǝ yeɓ ah mo joŋko nyi Dǝɓlii faa: Ame joŋ ɓǝ mai mo pee me ɓo ka joŋ kŋ ɓe.
© Bible Moundang © Alliance Biblique du Tchad, 1996.
