Goŋ Kirus nyi fahlii nyi Yahuduen
(2 KeeƁ 36:22-23)1 Ne syii patǝ vaŋno ah Kirus mo kaa goŋ sǝr Persia ɓo ne ko, Dǝɓlii ur zahzyil ahe, lai ɓǝ pǝ sǝr ahe, so pee ɓǝ ah ne zah tǝkine leetǝr kal ge pǝ sǝr goŋ ah daŋ ka za mo keera. Fan ah joŋ nai mor ka baa ɓǝ mai Dǝɓlii mo faa ɓo ne zah profeto Jeremias.
2 Ɓǝ mai Kirus goŋ sǝr Persia mo lai a naiko: Dǝɓlii Masǝŋ ma coksǝŋ ɓaŋ me kan goŋ ɓo ne tǝ za sǝr daŋ, nyi fahlii nyi me ka me vuu yaŋ mor ah yaŋ Jerusalem pǝ sǝr Yuda. 3 Awe za mai we ye zan ah daŋ, Masǝŋ mo yea ne we. We ge yaŋ Jerusalem pǝ sǝr Yuda, ka vuu yaŋ Dǝɓlii Masǝŋ Israel, Masǝŋ mai moo juura pel wol ah yaŋ Jerusalem. 4 Koo zune mo kǝsyil zan ah mai mo pǝ byak zah sǝr za mo 'yah gbah jol ka pii soo ɓe, ka za jǝk ah mo gbahra jol ah mo nyira vãm solai, ne vãm kaŋnyeeri, ne farel ne faɓal tǝkine fan ma nyi mor yaŋ Masǝŋ yaŋ Jerusalem daŋ nyi ko.
5 So zaluu ma morsǝ̃ǝ za camcam kǝsyil zahban Yuda ne Benyaamin, za joŋzahsyiŋrĩ, ne Lewitien, ne koo zune mai Dǝɓlii mo ur zahzyil ah ɓo daŋ, mo zyeɓko suu ka ga vuu yaŋ Dǝɓlii yaŋ Jerusalem, tǝgba faa, 6 za mai za jǝk ɓǝǝ mo gbah jol ɓǝǝ mo nyira fan camcam ɓo nyi ra, tǝgbana fan yeɓ ma vãm solai, vãm kaŋnyeeri, farelle, faɓalle, ne fan sãh manyeeki ah tǝkine fan ma nyi mor yaŋ Masǝŋ daŋ.
7 Goŋ Kirus so jin nyi fan ma joŋ yeɓ yaŋ Masǝŋ mai goŋ Nebukanezar mo woo yaŋ Jerusalem ge rǝk ɓǝr yaŋ masǝŋ ah ra daŋ nyi ra. 8 Kirus goŋ sǝr Persia faa nyi Mitredat pa ma lwaa ɓǝ yeɓ byak fan goŋ ka mo wooko fan ah ra mo keeko nyi Sesbasar govener sǝr Yuda. 9 Pãa ah ra a naiko: Tahsah ma vãm kaŋnyeeri 30, tahsah ma vãm solai 1.000, nyah 29, 10 tahsah vãm kaŋnyeeri manyee ah 30, tahsah vãm solai manyee ah 410. Fan yeɓ manyeeki ah camcam 1.000.
11 Pãa fan ma vãm solai ne ma vãm kaŋnyeeri tai daŋ 5.400. Fan marai daŋ Sesbasar woo tǝkine za mai mo pǝ byak sǝr Babilon mo tǝ zolra ga yaŋ Jerusalem daŋ kal ne ko.
© Bible Moundang © Alliance Biblique du Tchad, 1996.
