EZRA 10 - Bible Moundang (MUA)

Yahuduen syelra ki ne wee za gwǝǝre

1 Ne cok Ezra mo ɗǝŋ ɓo tǝ juupel zah yaŋ Masǝŋ, yeyee, so kee ɓǝ faɓe' mai za Israel mo joŋni, ka za Israel daŋ no gŋ: za wǝǝre, ŋwǝǝre tǝkine wee manyee daŋ taira ɓo kah ahe, ara daŋ yera yee pǝlli. 2 So Sekania we Jehiel dǝɓ morsǝ̃ǝ Elam, faa nyi Ezra: Na joŋ faɓe' wo Masǝŋ man ɓe, mor na zǝǝ tǝ ɓǝ ah na woo wee za gwǝǝ kanne, amma ne daŋ laŋ byak fan za Israel a no ba. 3 Zǝzǝ̃ǝko, sai na gbǝ zah ne Masǝŋ man na faa, na ga nĩi wee za gwǝǝ mai na kan ɓo myah ne wee ɓǝǝ daŋ. Ru ga syee mor ɓǝ mai mo faa ɓo nyi ru, ne mǝ za ma ɗuu Masǝŋ manyeeki ah mo faara ɓo nyi ru daŋ. Ru ga joŋ tǝgbana mai ɓǝ lai Masǝŋ mo faa ɓo. 4 Ɓǝ ah daŋ a jol ɓo, mo ur ne yeɓ ah o, ru no fahfal ɓo, mo syee ge pel ne yeɓ ah mo joŋ o.

5 So Ezra urri, joŋ zaluu Israel ne za joŋzahsyiŋrĩ, ne Lewitien, ne tǝcoŋ za pãa daŋ ka mo haara zah mo faara: Ru ga joŋ fan mai Sekania mo faa ɓǝ ah ɓo ka ru joŋ. 6 Ezra so ur gin pǝ cok mai mo gŋ zah yaŋ Masǝŋ kal ge yaŋ Johanan we Eliasiɓ, nǝn suŋ moo gŋ cii ne foo ɓǝ faɓe' mai za ma pǝ byak mo pii soora ɓo mo tǝ joŋra. Re fan a, zwǝ fan a ta.

7 So peera pee ge yaŋ Jerusalem ne pǝ sǝr Yuda daŋ, ka za mai mo pii soora gin pǝ byak ge ɓo daŋ mo taira yaŋ Jerusalem. 8 Zaluu ma pel za ne zaluu tǝsal ɓǝ faara: Zah'nan sai mo pǝ̃ǝ kal dǝɓ mo ge ya ɓe, ru ga woo fan ah mo ne daŋ, so ru ga nǝǝ ko gin kǝsyil za pãa ga lalle. 9 Tǝgǝǝ zah'nan sai, pǝ fĩi doraŋ ne zah'nan jemma gwa ahe, za mai mo kaara ɓo sǝr Yuda ne sǝr Benyaamin daŋ gera yaŋ Jerusalem, ge taira pǝ cok matǝ gbai ah zah yaŋ Masǝŋ. Za coora coo jol ɓǝ tai ahe, so coora coo jol mai bam mo tǝ tan pǝlli.

10 Pa joŋzahsyiŋ Ezra ur uu sǝŋ faa nyi ra: Awe joŋ faɓe', we 'nahm ɓǝɓe' ge tǝ za Israel ne ko, ne mai we woo wee za gwǝǝ kanne. 11 Zǝzǝ̃ǝko, we kee faɓe' ɓii nyi Dǝɓlii Masǝŋ pa ɓii lii ra, ka we so joŋ fan ma 'nyah suu ahe. We woŋ ki ne za gwǝǝ mai mo kaara ɓo pǝ sǝr mana, we nĩi ŋwǝǝ za gwǝǝ mai we kan ɓo myahe.

12 Za zyiira ɓǝ zahki daŋ faara: Ru ga joŋ fan mai mo faa ɓǝ ah ɓo nyi ru. 13 Amma so faara: Za pǝpãa pǝlli, so laŋ bam tǝ tan pǝlli ta, ru ka gak uu lal nyee nai ya, so laŋ na ka gak joŋ ɓǝ mai vǝr tǝgǝǝ zah'nan vaŋno, wala gwa sǝ ya, mor za pǝlli kǝsyil man joŋra faɓe' nyẽe ɓo. 14 Pǝram zaluu man mo kaara yaŋ Jerusalem nyee ka mo ẽera ɓǝ ahe, za mai mo pǝ yaŋ man maluu camcam mo woora wee za gwǝǝ kan ɓo mo gera ne cok ŋgoŋ ɓǝ ah mo kan ɓo ne zaluu ne za lakaali yaŋ ɓǝǝra, ka kpãh mai Masǝŋ mo ɓaŋ ɓo tǝtǝl man mo wuu. 15 Amma sai Yunatan we Asayel, ne Jakazia, we Tikva zyiira ɓǝ ah ya, so Mesulam ne Saɓtai Lewitiyo zyiira ɓǝ ge mor ɓǝǝra.

16 Za mai mo pii soora gin pǝ byak ge daŋ zyiira ɓǝ ahe, so pa joŋzahsyiŋ Ezra woo zaluu ma pel za morsǝ̃ǝ camcam rǝk ka mo ŋwǝǝra tǝɗii za ɓǝǝra. Pǝzyil fĩi jemma, ne zah'nan vaŋno ahe, tǝŋra mor ẽe ɓǝ za mai mo kanra wee za gwǝǝ ɓo daŋ ne ko. 17 Vǝrra yeɓ ah ne fĩi patǝ vaŋno ne zah'nan vaŋno ah ta.

Za mai mo kanra wee za gwǝǝre

18 Za mai mo kanra wee za gwǝǝ ɓo a naiko, za joŋzahsyiŋ ne morsǝ̃ǝ ɓǝǝra:

Ma kǝsyil za ma morsǝ̃ǝ Joswa we Josadak ne wee pah ah ra ye Maaseja, Eliezar, Jariɓ, ne Gedalia. 19 Faara, rǝ ga syel ki ne ŋwǝǝ ɓǝǝra, so gbǝra kǝbǝr ge ne ka joŋ syiŋ ne mor faɓe' ɓǝǝ mo joŋra ɓo.

20 Ma kǝsyil za ma morsǝ̃ǝ Immer ye Hanani ne Zebadia.

21 Ma kǝsyil za ma morsǝ̃ǝ Harim ye Maaseja, Elija, Semaja, Jehiel, ne Osias.

22 Ma kǝsyil za ma morsǝ̃ǝ Pasur ye Eljonai, Maaseja, Ismael, Netanel, Jozabad, ne Elasa.

23 Ma kǝsyil Lewitien a naiko: Jozabad, Syimai, Kelaja (wala Kelita), Petaja, Yuda, ne Eliezar.

24 Ma kǝsyil za ma ɗǝǝ lǝŋ yaŋ Masǝŋ ye Eliasiɓ. Ma kǝsyil za ma byak yaŋ Masǝŋ ye Sallum, Telem, ne Uri.

25 Ma kǝsyil za ma morsǝ̃ǝ Paros ye Ramia, Jizzia, Malkia, Mijamin, Eleasar, Malkia, ne Benaja.

26 Ma morsǝ̃ǝ Elam ye Mattania, Zakarias, Jehiel, Abdi, Jerimot, ne Elija.

27 Ma morsǝ̃ǝ Zattu ye Eljonai, Eliasiɓ, Mattania, Jerimot, Zabad, ne Aziza.

28 Ma morsǝ̃ǝ Bebai ye Jokanan, Hanania, Zabbai, ne Atlai.

29 Ma morsǝ̃ǝ Bani ye Mesulam, Maluk, Adaija, Jasuɓ, Syeal, ne Jerimot.

30 Ma morsǝ̃ǝ Pakat-Moab ye Adna, Kelel, Benaja, Maaseja, Mattania, Bezalel, Binwi, ne Manasse.

31-32 Ma morsǝ̃ǝ Harim ye Eliezar, Isija, Malkia, Semaja, Simon, Benyaamin, Maluk, ne Semaria.

33 Ma morsǝ̃ǝ Hasum ye Matenai, Mattata, Zabad, Elifelet, Jeremai, Manasse, ne Syimai.

34-37 Ma morsǝ̃ǝ Bani ye Maadai, Amram, Uel, Benaja, Bedia, Keluku, Vania, Merimot, Eliasiɓ, Mattania, Matenai, ne Jaasai.

38-42 Ma morsǝ̃ǝ Binwi ye Syimai, Selemia, Natan, Adaija, Maknabai, Saskai, Syarai, Azarel, Selemia, Semaria, Sallum, Amaria, ne Yuseɓ.

43 Ma morsǝ̃ǝ Nebo ye Jiel, Matatias, Zabad, Zebina, Jaddai, Joel, ne Benaja. 44 Za marai daŋ woora wee za gwǝǝ kan ɓo. So syelra ki ne ra, nĩira ra ne wee ɓǝǝ daŋ myahe.