Tǝŋra yeɓ vuu yaŋ Masǝŋ faɗa
1 Profetoen matǝ gwa, Hagai ne Zakarias we Iddo, Masǝŋ Israel so tǝŋ faa ɓǝ nyi ra, so a faara nyi Yahuduen mai mo kaara ɓo sǝr Yuda ne yaŋ Jerusalem. 2 Ne cok Serubabel we Salatiel, ne Joswa we Josadak mo laara ɓǝ ahe, so tǝŋra vuu yaŋ Dǝɓlii yaŋ Jerusalem, profetoen matǝ gwa gbahra jol ɓǝǝra.
3 Ne cok ah Tatnai govener sǝr ma morcomlil kah el Efrat, ne Setar-Boznai, ne zaluu ma ne ra, urra kal ge yaŋ Jerusalem, fiira Yahuduen: Azu ye nyi fahlii nyi we ka we vuu yaŋ Masǝŋ mai tǝkine ur ɓaale ga sǝŋ ne? 4 So fiira tǝɗii za mai mo tǝ vuura yaŋ Masǝŋ ahe. 5 Amma Masǝŋ tǝ byak zaluu Yahuduen. Zaluu Persien faara: Na faa ɓǝ ki ka ba, sai ka na pee ɓǝ ah ge nyi goŋ Darius, ka laa ɓǝ faa ma zah ah ɓe. 6 Ɓǝ mai mo zyeɓra pee ge nyi goŋ a naiko:
7 Ru ŋwǝǝ leetǝr mai wo goŋ Darius. Goŋ mo yea jam. 8 Ru 'yah goŋ mo tǝ, ru ge pǝ sǝr Yuda ru ge lwaa ra tǝ vuu yaŋ Masǝŋ mayǝkki, a zyeɓra tǝsal pǝ'ah na darŋgel tǝkine pea kpuu gŋ vuu ne ko, yeɓ ɓǝǝ pǝsãh no cam, a syee ga pel jol ɓǝǝ pǝlli ta. 9 So aru fii zaluu ɓǝǝ ru faa: Azu ye nyi fahlii nyi we ka we vuu yaŋ Masǝŋ mai tǝkine ur ɓaale ah ga sǝŋ ne? 10 Ru so fii ɗii ɓǝǝra, mor ka ru cuu zaluu ma lwaa ɓǝ yeɓ ah gee mo. 11 Zyiira zah ɓuu faa: Aru ye za Masǝŋ ma joŋ sǝŋ tǝkine sǝrri. Aru tǝ vuu yaŋ Masǝŋ mai mo yea vuu ɓo nyee daga ɓaaɓe, goŋ Israel maswah ah ye vuu. 12 Amma mor pa ɓuu lii ra ɓeɓra zahzyil nyi Masǝŋ ma coksǝŋ, so soɓ Nebukanezar goŋ sǝr Babilon ge ɗaŋ ra, yaŋ ah ɓeɓ ɓe, so woora za kal ge pǝ byak ne sǝr Babilon. 13 So faara, ne syii patǝ vaŋno ah Kirus mo kaa goŋ sǝr Babilon, nyi fahlii ka vuu yaŋ Masǝŋ. 14 So faara faɗa, vãm kaŋnyeeri, ne vãm solai, tǝkine fan ma joŋ yeɓ yaŋ Masǝŋ mai goŋ Nebukanezar mo woo yaŋ Masǝŋ yaŋ Jerusalem kal ne ko, mo ge rǝk pǝ yaŋ masǝŋ mǝ ah yaŋ Babilon, goŋ Kirus woo fan ah ra nyi dǝɓ ma ɗii ne Sesbasar mo yea kaa govener sǝr Yuda ɓo. 15 Goŋ faa nyi ko, mo wooko fan ah ra jin ge rǝk pǝ yaŋ Masǝŋ yaŋ Jerusalem pǝ cok ah mai mo yea gŋ kǝpelle. 16 Sesbasar so ge kpii mor yaŋ Masǝŋ, daga cok ahe, yeɓ vuu ah tǝ syee ga pel ŋhaa zǝzǝ̃ǝko, amma ɓah vǝr a ba. 17 Zǝzǝ̃ǝko, goŋ mo zyii ɓe, mo nyi fahlii ka mo mgbaira ɗerewol ma pǝ yaŋ rǝk ɗerewol goŋ Babilon, mor ka tan goŋga ɓǝ ahe, ɗah goŋ Kirus ye nyi fahlii ka vuu yaŋ Masǝŋ mai yaŋ Jerusalem 'manna ne? Wala ko ye ka ne? Ka fahfal ah goŋ mo so cuu ɓǝ mǝ ah mo 'yah joŋ ah gee ru.
© Bible Moundang © Alliance Biblique du Tchad, 1996.
