Ezra laa ɓǝ kan wee za gwǝǝre
1 Fahfal fan marai daŋ mo joŋni, za ki kǝsyil zaluu Israel ge faara nyi me, za pãa ne za joŋzahsyiŋ ne Lewitien ka woŋra ki ne za sǝr mai mo kaa ryaŋ ra ɓo ya - sǝr Kanaan, Ammon, Moab ne Egiɓ, wala Hetien, Perisien, Jebusien, ne Amorien. A joŋra fan maɓea ah na zai moo joŋra ta. 2 A kanra wee za gwǝǝ maŋwǝǝre, so a woora nyi wee ɓǝǝ mawǝǝ kan ta. Za matǝdaŋdaŋ mǝ Masǝŋ so suura ki ne za gwǝǝre. Zaluu ma pel za ne zaluu tǝsal ɓǝ ara ye tǝŋ joŋ faɓe' mai kǝpelle. 3 Ne cok me laa ɓǝ ahe, me gbǝ mbǝro wo suu ɓe ra ŋgǝ̃ǝre, me lwǝǝ rĩi tǝtǝl ɓe ne pyaŋ ɓe, me so kaa ge sǝŋ, tǝtǝl jin me ne ɓǝ foo pǝryak. 4 Me kaa gŋ ne ɓǝ foo nooko ŋhaa cok joŋ syiŋ ma ne lil ge daini, za tǝŋ taira gin wo ɓe. Za mai mo gŋ daŋ gal re ra pǝlli, mor ɓǝ mai Masǝŋ Israel mo faa ɓo tǝ ɓǝ faɓe' za mai mo pii soora gin pǝ byak ge ɓo.
5 Ne cok ah cok joŋ syiŋ ma ne lil mo ge dai o, me ur gin pǝ cok mai me kaa ɓo gŋ ne ɓǝ fooni, mbǝro mai me ŋgǝ̃ǝ kŋ a wo suu ɓe ba, ame kea ge sǝŋ ne zahciŋɓal me juupelle, me woo jol gwa daŋ ge sǝŋ wo Dǝɓlii Masǝŋ ɓe. 6 Me faa: Masǝŋ, swãa ɓaŋ nahnǝn ɓe ga sǝŋ pel ɓo re me ɓo no cam, faɓe' ɓuu ru tǝ joŋ so giŋ pǝ̃ǝ tǝtǝl ɓuu ɓe, ŋhaa ge dai masyiibam ɓo. 7 Daga ne zah'nan pa ɓuu lii ra, ŋhaa ge dai tǝ'nahko, aru za ɓo ru joŋ faɓe' pǝlli. Mor faɓe' ɓuu ruu joŋ naiko, amo soɓ ru ne za goŋ ɓuu ne za joŋzahsyiŋ ɓuu daŋ ge mor jol za goŋ za gwǝǝre, mor ka mo ikra ru, ka mo woora fan ɓuuru, mo gbahra ru kal ne ko, ka ru lwaa swãa tǝgbana mai mo tǝ joŋ ru ga tǝ'nahko. 8 Zǝzǝ̃ǝko, Dǝɓlii Masǝŋ ɓuuru, ne cok matǝ biŋ mai mo joŋ gboŋgboŋ wo ɓuuru, mo soɓ za ki kǝsyil ɓuu ka mo yeara ne cee ka mo kaara pǝ cok matǝ biŋ mai jam. Amo ǝ̃ǝ ru gin pǝ byakke, mo so nyi 'yak nyi ru. 9 Dǝɓlii, aru yea pǝ byakke, amma ne daŋ laŋ mo soɓ ru pǝ byak ɓuu ya. Mo ur zahzyil za goŋ Persia joŋra gboŋgboŋ wo ɓuu nyira fahlii nyi ru, ka ru ge vuu yaŋ Masǝŋ ɓo mai mo ɓeɓ ciŋ gboŋ ɓo, ka ru kaa yaŋ Jerusalem pǝ sǝr Yuda nyee jam.
10 Amma zǝzǝ̃ǝko Masǝŋ, ru gak faa ɗah ɓǝ fẽe fahfal fan mai mo joŋ ɓo ɗǝne? Aru zǝǝ tǝ ɓǝ lai ɓo 11 mai mo nyi nyi ru ne zah za yeɓ ɓo profetoen ɓe. Faara nyi ru, sǝr mai ru tǝ ga gŋ ka ren sǝr ah a pǝɓe', mor za mai mo kaara ɓo gŋ ye ɓeɓra ne fan joŋ maɓea ah ŋhaa zyaŋ sǝr ah ɓo ne lii ah daŋ. 12 So faara nyi ru: We 'yah ka laa pǝ'nyah ne ren sǝr ah ne goŋga, ka so soɓ nyi morsǝ̃ǝ ɓii ma fahfal ga lii ta ɓe, we nyi wee ɓii maŋwǝǝ nyi wee ɓǝǝ mawǝǝ kan ka, we woo wee ɓǝǝ maŋwǝǝ nyi wee ɓii mawǝǝ kan ka ta, we foo ɓǝ mor ka gbah jol ɓǝǝ ka mo yeara jam ne fan ɓǝǝ ka, mor ka we yea pǝswahe, ka we re lee syẽm kpuu sǝr ahe, ka we so soɓ nyi morsǝ̃ǝ ɓii ma fahfal ɓii ga lii o. 13 Koo fahfal fan mai daŋ mo joŋ wo ɓuu, ru laa bone tǝ ɓǝ faɓe' ɓuu ne ɓǝɓe' ɓuu ru joŋ pǝlli ko laŋ, ru tǝ ɓe, Masǝŋ ɓuuru, mo ŋgoŋ kiita ɓo ka tǝ ɓuu na faɓe' mai ru joŋ ɓo ya, mo so soɓ ru ɓo ka ru yea sǝŋ ne cee kpǝ. 14 So fahfal gaɓ mai daŋ, ru so ga tǝŋ zǝǝ tǝ ɓǝ faa ɓo ka so kan ki ne za maɓea mai faɗa ne? Ru so joŋ nai ɓe, mo ga ɓaŋ kpãh tǝ ɓuu mo vǝr ru tǝɗe', mo ka soɓ koo dǝɓ vaŋno laŋ ǝ̃ǝ ya. 15 Dǝɓlii Masǝŋ Israel, amo ye Dǝɓ tǝ goŋga, mo soɓ ru tǝcoŋ ah ɓo no sǝŋ ne cee tǝ'nahko. Ru kee ɓǝ faɓe' ɓuu ru joŋ nyi mo, ru ka ne fahlii ka gin uu pel ɓo ya.
© Bible Moundang © Alliance Biblique du Tchad, 1996.
