We ɓaŋ faswaa tǝkǝ̃ǝ ki
1 Wee pa ɓe, we lwaa dǝɓ ki lee ɓo pǝ faɓe' ɓe, awe za mai we ne Tǝ'yak Masǝŋ we ɓaŋ ko ur sǝŋ, sai we joŋ ne won suu. Amma ka mo laŋ mo byak suu ɓo, ka mo lee pǝ faɓe' ka. 2 We ɓaŋ faswaa tǝkǝ̃ǝ ki, we joŋ nai ɓe, ka we syee mor ɓǝ lai Kristu ɓe. 3 Dǝɓ mo lǝŋ ne suu ah zye pǝyǝkki, so mo ka noo ya ɓe, ka tǝ zyak suu ahe. 4 Koo zune daŋ mo lii yeɓ suu ahe, yeɓ ah mo pǝsãh ɓe, a lwaa yǝk ne mor ahe, amma mo liiko ne yeɓ dǝɓ ki ka. 5 Koo zune daŋ mo ɓaŋ faswaa suu ah ne suu ahe.
6 Dǝɓ ma fee ɓǝ Masǝŋ mo woŋko fan sãh ah daŋ ne dǝɓ ma cuu ɓǝ Masǝŋ nyi ko.
7 We tǝ ɓǝ mai pǝsãhe: dǝɓ ka gak roo Masǝŋ ya, fan mai dǝɓ moo ruu daŋ a ga tai fan ah ta. 8 Dǝɓ mo tǝ ruu pǝ 'wah 'yah suu ahe, a ga tai sõo suu ahe. Amma dǝɓ mo ruu pǝ 'wah 'yah Tǝ'yakke, a ga lwaa cee ma ga lii. 9 Na gaɓ ne joŋ fan sãh ka, na ga ce tǝbyaŋ ah ne cok mai mo tǝ yah gin ba. 10 Cok ah mo no ɓe, na joŋ fan sãh wo za daŋ, ma kal daŋ ah na joŋ wo wee pa man ma ne iŋ ah ra.
Lai tǝkine haozah wol ma fahfal tǝ lii
11 We ẽe syel masin maluu rai ɗǝ, ame ye ŋwǝǝ wo ɓii ne jol ɓe. 12 Za mai mo tǝ joŋra doole nyi we ka we daakan a kyeɓra fan ma 'nyah suu dǝfuu, a joŋra nai mor ka rǝ laa bone mor ɓǝ kpuucee Kristu ka. 13 Za ma daakan rai ne suu ɓǝǝ laŋ ka syeera mor ɓǝ lai Mosus ya, amma a 'yahra we daakan mor ka mo yiira suu ɓǝǝ ne ɓǝ ɓiiri. 14 Masǝŋ mo cak me ne yii suu, yǝk ɓe vaŋno ako ye ɓǝ wul Dǝɓlii man Yesu Kristu to, mor ah me wo fan sǝr na wulli, fan sǝr laŋ wo ɓe na wulli. 15 Daakanne, tǝkine bai daakanne, ɓǝ mayǝk ye ka, amma ɓǝ mayǝk ah ako ye byaŋ pǝfuu. 16 Za ma syeera mor ɓǝ mai daŋ jam Masǝŋ tǝkine kwan syak ah mo yea tǝ ɓiiri, tǝkine za Masǝŋ daŋ.
17 Dǝɓ mo ge gaɓ me ka, mor me no ne suŋnwãh mai me lwaa mor yeɓ Yesu Kristu wo suu ɓe.
18 Wee pamme, Dǝɓlii man Yesu Kristu mo joŋ gboŋgboŋ wo ɓii daŋ. Amen.
© Bible Moundang © Alliance Biblique du Tchad, 1996.
