Yaŋ mawah ma pǝ sǝr Babilon
1 Za sǝr daŋ yea tǝ faara zah vaŋno. 2 Ne cok mo ɓaŋra fahlii ga fah kǝmorcomzah'nanne, ge lwaara cok tǝbǝǝ sǝr Babilon, so haira gŋ. 3 Faara tǝgǝǝ ki: Na ge nǝǝ darŋgelle, ka na suŋ ne wii. Darŋgel joŋ yeɓ wo ɓǝǝ pǝ cok tǝsalle, vuulwah joŋ yeɓ wo ɓǝǝ pǝ cok simãa. 4 So faara tǝgǝǝ ki faɗa: Na ge vuu yaŋ malii, na vuu yaŋ mawah gŋ ka tǝtǝl ah mo dai masyiibamme. Na kan tǝɗii nyi suu mana, ka na myah ge wo sǝr daŋ ka.
5 Dǝɓlii ɗǝr ge ka ẽe yaŋ mawah mai dǝfuu mo tǝ vuura. 6 So Dǝɓlii faa: Oho, ara ye ban vaŋno, a faara zah vaŋno ta. Mo tǝŋra joŋ fan nai ɓe, fan ki ka gak cak ra ne joŋ fan makẽne mo foora ɓo ka joŋ ya. 7 Na ɗǝrri, na ge nyi zah nyi ra camcam ka mo laara zah ki ka. 8 Dǝɓlii so myah ra wo sǝr daŋ naiko, soɓra vuu yaŋ ahe. 9 Mor mai ɗiira yaŋ ah ne Babel , mor Dǝɓlii woŋ zah nyi za sǝr daŋ gŋ, so myah ra wo sǝr daŋ.
Wee ɓǝr Sem
10 Wee ɓǝr Sem ara naiko: Sem joŋ syii temere vaŋno, byaŋ Arfasak ne patǝ gwa syii fahfal bii mo vǝr sǝrri. 11 Fahfal Sem mo byaŋ Arfasak, joŋ syii temere dappe, so bem wee wǝǝ tǝkine wee ŋwǝǝre. 12 Ne cok Arfasak mo joŋ syii jemma sai tǝtǝl dappe, byaŋ Sala. 13 Fahfal mo byaŋ Sala, joŋ syii temere nai tǝtǝl sai, bem wee wǝǝ tǝkine wee ŋwǝǝre. 14 Sala joŋ syii jemma sai, byaŋ Eber. 15 Fahfal Sala mo byaŋ Eber, joŋ syii temere nai tǝtǝl sai, bem wee wǝǝ tǝkine wee ŋwǝǝre. 16 Eber laŋ joŋ syii jemma sai tǝtǝl nai so byaŋ Pelek. 17 Fahfal Eber mo byaŋ Pelek, joŋ syii temere nai ne jemma sai, bem wee wǝǝ tǝkine wee ŋwǝǝre. 18 Ne cok Pelek mo joŋ syii jemma sai, byaŋ Regu. 19 Fahfal Pelek mo byaŋ Regu, joŋ syii temere gwa tǝtǝl doraŋ, bem wee wǝǝ tǝkine wee ŋwǝǝre. 20 Regu joŋ syii jemma sai tǝtǝl gwa, byaŋ Seruk. 21 Fahfal Regu mo byaŋ Seruk, joŋ syii temere gwa tǝtǝl rǝŋ, bem wee wǝǝ tǝkine wee ŋwǝǝre. 22 Seruk joŋ syii jemma sai, byaŋ Nakor. 23 Fahfal Seruk mo byaŋ Nakor, joŋ syii temere gwa, bem wee wǝǝ tǝkine wee ŋwǝǝre. 24 Nakor joŋ syii jemma gwa tǝtǝl doraŋ, byaŋ Tarak. 25 Fahfal Nakor mo byaŋ Tarak, joŋ syii temere ne jemma vaŋno tǝtǝl doraŋ, bem wee wǝǝ tǝkine wee ŋwǝǝre. 26 Tarak joŋ syii jemma rǝŋ, byaŋ Abram, Nakor ne Haran.
27 Wee ɓǝr Tarak a naiko: Tarak byaŋ Abram, Nakor ne Haran. Haran byaŋ Lot. 28 Haran ye wǝ kǝpel nyi pah ah pǝ sǝr byaŋ ah Ur sǝr Babilon. 29 Abram ne Nakor kanra ŋwǝǝre, a ɗii mawin Abram ne Sarai, a ɗii mawin Nakor ne Milka, mǝlaŋ Haran pah Milka ne Jiska. 30 Sarai masoor o, ka ne wel a.
31 Tarak ɓaŋ wel ah Abram ne Lot we nan ah Haran tǝkine gor ah Sarai mawin Abram, zol ne ra daga Ur sǝr Babilon ka ga sǝr Kanaan. Amma ne cok mo ge daira yaŋ Karan o, haira gŋ. 32 Ne cok Tarak mo joŋ syii temere gwa tǝtǝl dappe, ge wǝ yaŋ Karan.
© Bible Moundang © Alliance Biblique du Tchad, 1996.
