Abram ǝ̃ǝ Lot
1 Ne cok zah'nan Amrafel goŋ Babilon, Arjok goŋ Ellasar, Kedorlaomer goŋ Elam tǝkine Tidal goŋ Gojim, 2 urra sal ne Bera goŋ Sodoma ne Birsa goŋ Gomorra, Sinaɓ goŋ Adma, Semeber goŋ Zeboim tǝkine goŋ Bela, tǝgba faa: Zoar. 3 Goŋ matǝ dappe rai taira ki ge pǝ cok tǝforoŋ Siddim, mabii Tǝmmi. 4 Joŋra yeɓ mor Kedorlaomer syii jemma tǝtǝl gwa amma ne syii jemma tǝtǝl sai ah ŋwoora kyaŋ ne ki. 5 Ne syii jemma tǝtǝl nai ah Kedorlaomer ne za goŋ ma ne ki ge ikra Refaimien pǝ cok Asterot-Karnaim ne Susien ma pǝ cok Ham, ne Emien ma tǝbǝǝ Save-Kirjataim, 6 tǝkine Horien ma tǝ waa Edom ŋhaa ge dai Elparan mai mo gwari ne kǝsyicokki. 7 Pii soora ge En-Mispat, tǝgba faa: Kades, ikra Amalekien pǝ sǝr ɓǝǝ tǝkine Amorien mai mo haira ɓo Hasason-Tamar daŋ.
8 So goŋ Sodoma, goŋ Gomorra, goŋ Adma ne goŋ Zeboim tǝkine goŋ Bela pǝ̃ǝra ge zyeɓ suu ruu sal ne ra pǝ cok tǝforoŋ Siddim, 9 ka ruura sal ne Kedorlaomer goŋ Elam, Tidal goŋ Gojim, Amrafel goŋ Babilon, tǝkine Arjok goŋ Ellasar, za goŋ nai ka ruu sal ne za goŋ dappe. 10 Amma cok tǝforoŋ Siddim lak vuu gŋ no cam, goŋ Sodoma ne goŋ Gomorra ɗuura lea ge pǝ lak ahe, tǝcoŋ za ki ɗuura kal ge tǝ waare. 11 Za ma nĩira ra woora joŋ Sodoma ne Gomorra tǝkine fan ɓǝǝ daŋ kalra ne ko. 12 Woora Lot we naa mah Abram mo kaa ɓo Sodoma tǝkine fan ah daŋ kal ne ta.
13 Dǝɓ ki vaŋno ǝ̃ǝ gŋ ge faa ɓǝ ah nyi Abram Yahuduyo mai mo kaa ɓo mor kpuu luu mǝ Mamre. Amoriyo ma ɗii ne Mamre tǝkine naa mah Eskol ne naa mah Aner gbǝra zah ɓo ne Abram. 14 Ne cok Abram mo ge laa, gbǝra we naa mah ah ɓo na byakke, ɗii za ma tanra ɓǝ sal mai mo bemra yaŋ ahe, ara temere sai ne jemma tǝtǝl nama, foora mor ɓǝǝ ŋhaa ge dai Dan. 15 Abram ryaŋ tǝ ɓǝǝ ne suŋ ne zan ahe, ik ra, nĩi ra ŋhaa ge dai yaŋ Hoba mai mo fahkǝsǝŋ Damaskus. 16 So woo fan mai mo woora zah sal daŋ pii soo ne ko, nyiŋ we naa mah ah Lot ne fan ah tǝkine ŋwǝǝ ne za wǝǝ daŋ ta.
Melkisedek ẽe Abram
17 Fahfal Abram mo pii soo gin cok nĩi Kedorlaomer ne za goŋ mai mo ne ki, goŋ Sodoma pǝ̃ǝ ge ka zyaŋ tǝl ah pǝ cok tǝforoŋ Save, tǝgba faa: cok tǝforoŋ goŋe. 18 Melkisedek goŋ Salem ge ne tǝwaa ne bii lee kpuu vin, ako ye pa joŋzahsyiŋ Masǝŋ mayǝkki. 19 Eẽ Abram faa: Masǝŋ mayǝk mai mo joŋ sǝŋ tǝkine sǝr mo ẽe mo. 20 Osoko wo Masǝŋ mayǝk mo soɓ za ma syiŋra mo ge mor jol ɓo. So Abram nyi patǝ jemma fan mai mo wooko daŋ nyi ko.
21 Goŋ Sodoma faa nyi Abram: Mo nyi za nyi me to o, amma mo kaa ne fan o. 22 So Abram zyii faa nyi goŋ Sodoma: Me haa zah ne tǝɗii Dǝɓlii Masǝŋ ma coksǝŋ mai mo joŋ sǝŋ tǝkine sǝrri, 23 me ka ɓaŋ fan ki pǝzyil fan ɓo ya, koo gǝrǝǝji ne sal sǝɓal laŋ me ka ɓaŋ gin gŋ ya, ka mo faa sõone me ye kǝ̃ǝ ɓo ne Abram ka. 24 Me 'yah fan ki mor suu ɓe ya, sai fan mai tǝbanna ɓe mo rera, tǝkine zah fan ɗǝǝ mǝ za mai mo gera ne me: Eskol, Aner ne Mamre, a ga ɓaŋra fan gaɓ ɓǝǝra.
© Bible Moundang © Alliance Biblique du Tchad, 1996.
