Faɓe' za Sodoma
1 Angeloi matǝ gwa kŋ ge daira yaŋ Sodoma ne lilli. Lot kaa ɓo zahfah ɓaale yaŋ Sodoma. Ne cok Lot mo kwo ra, ur ge zyaŋ tǝ ɓǝǝra, kea ge sǝŋ, ɗǝŋ tǝtǝl ge sǝŋ. 2 Faa nyi ra: Me pǝǝ we zaluu ɓe, we ge ɗǝr yaŋ ɓe ka we vãh ɓalle, we swǝ gŋ, ne zah'nan pim ɓe, we ur ɓaŋ fahlii ɓii ba. Amma zyiira faa: A'a, ru swah lal ba. 3 Amma Lot pǝǝ ra pǝlli, so kalra ne ki, ge ɗǝrra yaŋ ahe. Nyi fazwan nyi ra, joŋ paŋgasso nyi ra bai fan mbǝ̃ǝre, so rera.
4 Ka ɓah swahra sǝŋ yaŋ ya ba, za yaŋ Sodoma, daga zaluu ne wee tǝbanna daŋ ryaŋra yaŋ Lot, 5 ɗiira Lot, faara nyi ko: Za mai mo kalra ge yaŋ ɓo ne suŋ ko ara kẽne? Mo soɓ ra pǝ̃ǝ ge lal ka ru swah ne ra. 6 Lot pǝ̃ǝ ge wo ɓǝǝ lalle, so coo zahfah ne fahfalle. 7 So faa nyi ra: Me pǝǝ we wee pa ɓe, we joŋ faɓe' nai ka. 8 We laa ɗao, me no ne wee pǝwoi gwa, me ga ɗii ra gee we ne ko ka we joŋ fan mai zahzyil ɓii mo 'yah daŋ wo ɓǝǝra. Amma we joŋ fan ki wo za mai ka, mor gera ɓo yaŋ ɓe. 9 Zyii faara: Mo tǝɓ ge lalle. Amo ge ɓo na mowoore, amo so joŋ suu ɓo na lakaali. Mo tǝɓ ge lal a ɓe, ru ga joŋ mo pǝɓe' ka kal ra. Waara Lot ne swahe, so tǝɓra ge ka hao zahfahe. 10 Amma angeloi matǝ gwa nyenra jol gbǝ Lot kal ge wo ɓǝǝ kǝɓǝr yaŋ ne ko, so coora zahfahe. 11 Rǝ̃ǝra nahnǝn za ma zahfahe, daga zaluu tǝkine wee tǝbanna daŋ, ŋhaa gaɓra ne kyeɓ zahfahe.
Lot soɓ Sodoma
12 Za matǝ gwa faara nyi Lot: Mo no ne za ki nyee ɓe, koo bǝǝ ɓo ra, wala wee ɓo mawǝǝ ne maŋwǝǝ tǝkine zahzum ɓo mo no yaŋ mai daŋ mo pǝ̃ǝra ge lalle. 13 Ru ga vǝr cok maiko, mor ɓǝɓea za mai a pel Dǝɓlii pǝ'manne, mor ah Dǝɓlii pee ru ge ka vǝr yaŋ ahe.
14 Lot kal ge faa ɓǝ ah nyi bǝǝ ah mai mo tǝ ga kanra wee ahe, faa: We urri, we pǝ̃ǝ cok mai ge lalle, mor Dǝɓlii tǝ ga vǝr yaŋ ahe. Amma bǝǝ ah ra laara na ɓǝ syakke.
15 Zah'nan ge cee ɓe, angeloi hǝǝra Lot, faara: Mo ɓaŋ mawin ɓo tǝkine wee ɓo maŋwǝǝ gwa daŋ, mor ka mo muŋra mor ɓǝɓe' yaŋ mai ka. 16 Amma so tǝ joŋ fan pǝrolle, za rai gbǝra jol ah ne jol mawin ah tǝkine jol wee ah maŋwǝǝ gwa daŋ, pǝ̃ǝra ge lal ne ra, ge soɓra ra fahfal yaŋ lalle. Mor Dǝɓlii kwo syak tǝl ahe. 17 Ne cok mo pǝ̃ǝra ge lal ne ra, pa pee ma coksǝŋ maki ah faa nyi ko: Mo ɗuu mo ǝ̃ǝ suu ɓo. Mo pak nahnǝn fahfal ka, mo uu ɓǝr pee ka ta, mo ɗuu yee ge tǝ waare, ka mo muŋ ka. 18 Lot zyii faa nyi ra: A'a, ka nai ya, dǝɓlii ɓe. 19 Mo ẽe ɗǝ, mo joŋ gboŋgboŋ ɓo wo ɓe, mo joŋ ɓǝ 'nyah ɓo wo ɓe pǝlli mor ka ǝ̃ǝ me. Amma me ka gak ɗuu yee ga tǝwaar a, maki ɓeɓ ah lwaa me tǝ fahlii me wuu. 20 Mo kwo yaŋ malaŋ ma ŋhaa ɓe ne, so a gwari ta. Mo soɓ me ɗuu ge gŋ ka me ǝ̃ǝ, ka me wǝ ka. 21 Zyii faa nyi ko: Me zyii ɓǝ ah laŋ ɓe, me ka ɓeɓ yaŋ mai mo tǝ fii ɓǝ ah zah ɓe ya. 22 Mo hǝǝ ɗuu ge gŋ gwari, me ka joŋ fan ki ya sai ka mo dai gŋ ɓe. Mor mai ɗiira yaŋ ah ne Zoar.
23 Ne cok Lot mo dai yaŋ Zoar, ka com zoo ɓe. 24 Ne pel sǝ Dǝɓlii tǝ wii ne sulfer gin sǝŋ ge tǝ Sodoma ne Gomorra tǝgbana bamme. 25 Ɓeɓ yaŋ ah ne za ma haira gŋ ne fan ma ceciŋ tǝ sǝr ah tǝkine cok pee ah daŋ. 26 Amma mawin Lot pak nahnǝn ah nǝfalle, so ciŋ tǝsal tǝm uu gŋ.
27 Abraham ur ne zah'nan pim kal ge pǝ cok mai mo uu gŋ ne Dǝɓlii. 28 Ɓaŋ nahnǝn ah ẽe cok ge fah kǝ Sodoma ne Gomorra tǝkine cok pee ah daŋ, kwo suŋwii zoo gin tǝ sǝr tǝgbana suŋwii mai mo yea pǝ lak wii suŋ darŋgel. 29 Ne cok Masǝŋ mo ɓeɓ yaŋ mai mo pǝ cok pee ahe, so foo ɓǝ Abraham, so ǝ̃ǝ Lot gin pǝzyil cok ɓeɓ yaŋ ah ne cok mo tǝ ɓeɓ yaŋ mai Lot mo yea kaa ɓo gŋ.
30 Lot soɓ yaŋ Zoar ge kaa tǝ waa ne wee ah maŋwǝǝ gwa daŋ, mor a ɗuu gal kaa yaŋ Zoar, so ge kaa pǝ yii ne wee ah gwa daŋ. 31 Mǝlaŋ ah malii faa nyi malaŋne: Pa man tam ɓe, dǝwor maki ah ka wo sǝr ka mo ge swah ne na tǝgbana zahsyiŋ mai dunia daŋ moo joŋ ya. 32 Mo ge, na nyi yim nyi pa man zwǝ ka mo swǝko ne na, ka na lwaa kan nah pa mana. 33 Nyira yim nyi pa ɓǝǝ zwǝ ne suŋ ahe, mǝlaŋ malii ge swǝ ne pamme, pah ah tǝ sõone ge swǝ ɓo ne ki ya, tǝ kal ah laŋ ya ta. 34 Ne zah'nan mǝlaŋ malii faa nyi malaŋne: Me swǝ ne pa man ne suŋ ko. Na nyi yim nyi ko zwǝ ne suŋ kpǝ, ka mo ge swǝ ne ki, mor ka na lwaa kan nah pa mana. 35 So nyira yim nyi pa ɓǝǝ zwǝ ne suŋ moo kpǝ, mǝlaŋ malaŋ kal ge swǝ ne ki, pah ah tǝ sõone ge swǝ ɓo ne ki ya, so tǝ kal ah laŋ ya. 36 Wee Lot gwa daŋ gbahra ɓil ne pa ɓǝǝra. 37 Mǝlaŋ malii byaŋ we worre, ɗii wel ah ne Moaɓ. Ako ye pah Moabien ŋhaa tǝ'nahko. 38 Mǝlaŋ malaŋ byaŋ we wor ta, ɗii mǝ ah ne Ben-Ammi, ako ye pah Ammonien ŋhaa tǝ'nah ta.
© Bible Moundang © Alliance Biblique du Tchad, 1996.
